ޑޯއުގެ ދެ ލަނޑާ އެކު، ފްރާންސް އިން ކޮލަމްބިއާ ބަލިކޮށްފި

ބައިނަލްއަޤުވާމީ ރަޙުމަތްތެރި ކަމުގައި ކޮލަމްބިއާއާ ދެކޮޅަށް ކުޅުނު މެޗުން ވެސް މޮޅުވެ، ފްރާންސް އިން އެ ޓީމުގެ ފޯމު ދަމަހައްޓައިފި އެވެ.

އާދީއްތަ ދުވަހުގެ ރޭ ދަންވަރު ކޮލަމްބިއާއާ ދެކޮޅަށް ކުޅުނު މެޗު ފްރާންސް އިން ކާމިޔާބު ކުރީ 3-1 އިންނެވެ. މެޗުގެ ފުރަތަމަ ހާފުގައި ފްރާންސް އިން ދެ ލަނޑު ޖެހިއިރު، އަނެއް ލަނޑު ޖެހީ ދެ ވަނަ ހާާފުގަ އެވެ. ކޮލަމްބިއާ އިން އެ ޓީމުގެ ހަމައެކަނި ލަނޑު ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 29 ވަނަ މިނެޓުގައި ފްރާންސް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ފްރާންސް އަށް ޖަހައިދިނީ  ޑެޒައިއާ ޑޯއު އެވެ. އޭގެ ފަހުން ފުރަތަމަ ހާފު ނިމެން ހަތަރު މިނެޓަށް ވެފައި ވަނިކޮށް، ފްރާންސްގެ މާކަސް ތުރަމް ވަނީ އެ ޓީމުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ.

މެޗުގެ ދެ ވަނަ ހާފު ފަށައިގެން 11 ވަނަ މިނެޓުގައި ޑޯއު ވަނީ ފްރާންސްގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ. އެ ލަނޑު ޖަހަން ޑޯއު އަށް ފުރުސަތު ތަނަވަސްކޮށްދިނީ ތުރަމް އެވެ. އޭގެ ފަހުން މެޗުގެ 77 ވަނަ މިނެޓުގައި ކޮލަމްބިއާގެ ހަމައެކަނި ލަނޑު ޖެހީ ޖަމިންޓޮން ކަމްޕާޒް އެވެ.

މިއީ މިއަހަރުގެ ޖޫން މަހު ފަށާ ފީފާ ވޯލްޑް ކަޕަށް ތައްޔާރުވުމުގެ ގޮތުން ފްރާންސް އިން ކުޅުނު މެޗެކެވެ. ކޮލަމްބިއާ މެޗުގެ ކުރިން ފްރާންސް އިން ވަނީ ބްރެޒިލްއާ ދެކޮޅަށް ކުޅެ، އެ ޓީމުގެ މައްޗަށް ވެސް ކުރި ހޯދައިފަ އެވެ.