އެމްބާޕޭ ހުރި ފޯމާމެދު އޭނާ ދެރަވާނެ: ފްރާންސްގެ ކޯޗު

ފްރާންސްގެ ކެޕްޓަން ކީލިއަމް އެމްބާޕޭ މިހާރު ހުރި ފޯމާމެދު ކުޅުންތެރިޔާ ދެރަވާނެކަމަށް ގައުމީ ކޯޗު ޑިޑިއޭ ޑެޝޯން ބުނެފި އެވެ.

އޭނާ މިހެން ބުނީ ވޯލްޑްކަޕް ކޮލިފައިން އަށް ތައްޔާރުވާން ނެގި ސްކޮޑާ ބެހޭގޮތުން ވާހަކަ ދައްކަމުންނެވެ. މި ސްކޮޑުގައި އެމްބާޕޭ ހިމެނުނަސް ޑެޝޯން ބުނީ އެންމެ ފަހުގެ ވޯލްޑްކަޕުގެ ރަންބޫޓު ހޯދި ފޯވަޑް ހުރީ ވަރަށް ދަށް ފޯމެއް ކަމަށެވެ.

މި ސީޒަން ފެށުމުގެ ކުރިން ރެއާލް މެޑްރިޑަށް ބަދަލުވާން ކުރި މަސައްކަތާއެކު ވެސް ކޮންޓްރެކްޓް ނިމެންދެން ޕީއެސްޖީގައި ހުންނަން އެމްޕާބޭ އަށް ވަނީ މަޖުބޫރުވެފަ އެވެ. ނަމަވެސް އޭނާގެ ފުށުން އެކަށީގެންވާ ވަރާ ގާތަށް ވެސް މޮޅު ކުޅުމާއި ލަނޑު ޖެހުމެއް ނުފެނެ އެވެ.

ގައުމީ ޓީމުގައި ފާއިތުވެދިޔަ އަށް އަހަރު އެމްބާޕޭ އަށް ކޯޗުކޮށްދިން ޑެޝޯން ބުނީ މިއީ އެމްބާޕޭ ފޯމު ގެއްލުނު ފުރަތަމަ ފަހަރު ނޫން ކަމަށާއި މިހެންވެ އަލުން އޭނާ ފޯމަކަށް އަންނާނެ ކަމާމެދު ކަންބޮޑުނުވާ ކަމަށެވެ. އަދި އެމްބާޕޭެ ފޯމު ދަށްވި ސަބަބެއް ކަމަށް ގަބޫލުކުރެވެނީ ކުލަބާ މައްސަލަޖެހި، ހިނގި ކަންތައްތަކުގެ ތެރޭގައި ޕްރީ ސީޒަން ރަނގަޅަށް ނުދިއުން ކަމަށެވެ.

މި ސީޒަން ފެށުނުއިރު ޕްރީ ސީޒަންތެރޭގައި އެމްބާޕޭ ޕްރެކްޓިސް ކުރީ އެކަނިމާއެކަނި އަދި ބައެއް ފަހަރު ޕީއެސްޖީގެ ޒުވާން ކުދިންނާއެކުގަ އެވެ. އެއީ ރެއާލް މެޑްރިޑަށް ބަދަލުވާން ގަދަ ދެއްކުމުން ދިން އަދަބެއްގެ ގޮތުގަ އެވެ.