ސްޕެނިޝް ލަލީގާ: މެސީގެ ހަތަރު ލަނޑުން އެއިބާގެ މައްޗަށް ބާސާ ކުރިހޯދައިފި

ސްޕެނިޝް ލަލީގާގައި ލިއޮނެލް މެސީގެ ހަތަރު ލަނޑުން އެއިބާގެ މައްޗަށް ބާސެލޯނާ ކުރިހޯދައިފި އެވެ.

އަންގާރަ ދުވަހުގެ ރޭ ކުޅުނު މެޗު އެއިބާއާ ވާދަކޮށް ބާސާ މޮޅުވީ 1-6 ގެ ނަތީޖާއަކުންނެވެ.

ބާސާ ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅުނީ ބާސާ އެވެ. އެގޮތުން އެޓީމުން ވަނީ 20 ވަނަ މިނެޓުގައި މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ލިބުނު ޕެނަލްޓީއަކުން ލިއޮނެލް މެސީ އެވެ.

މި ލަނޑަށްފަހުވެސް ރަނގަޅަށް ކުޅެމުންދިޔައީ ބާސާ އެވެ. އެގޮތުން 38 ވަނަ މިނެޓުގައި އެޓީމުން ވަނީ މެޗުގެ ލީޑު ފުޅާކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ޕައުލީނިއޯ އެވެ.

ފުރަތަމަ ހާފް ނިމުނީ 0-2 ގެ ނަތީޖާއިން އެއިބާގެ މައްޗަށް ބާސާ ކުރީގައި އޮވެގެންނެވެ.

ދެވަނަ ހާފް ފެށިގެންވެސް މޮޅަށް ކުޅެމުންދިޔައީ ބާސާ އެވެ. އެގޮތުން 53 ވަނަ މިނެޓުގައި އެޓީމުން ވަނީ ލީޑު އިތުރަށް ފުޅާކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ޑެނިސް ސުއަރޭޒް އެވެ.

އެހެންނަމަވެސް 57 ވަނަ މިނެޓުގައި އެއިބާ އިން ވަނީ ނަތީޖާގެ ފަރަގު ކުޑަކޮށްފައެވެ. އޭގެ ދެ މިނެޓު ފަހުން މެސީ ވަނީ ބާސާ އަށް އިތުރު ލަނޑެއް ކާމިޔާބުކޮށްފައެވެ.

މެސީ އޭނާގެ ހެޓްރިކް ފުރިހަމަކުރީ 62 ވަނަ މިނެޓުގައި އެވެ. މެޗު ނިމެން ތިން މިނެޓަށްވެފައިވަނިކޮށް މެސީ ވަނީ އިތުރު ލަނޑެއް ކާމިޔާބުކޮށް ބާސާގެ ހަވަނަ ލަނޑު ކާމިޔާބުކޮށްފައެވެ. މި އަހަރު މެސީ ވަނީ ބާސާ އަށް ކުޅުނު 40 މެޗުގައި 40 ލަނޑު ކާމިޔާބުކޮށްފައެވެ.

ބާސާ ވަނީ ލީގުގައި ކުޅުނު ފަސް މެޗުވެސް ކާމިޔާބުކޮށްފައެވެ. އެޓީމު އޮތީ ލިބުނު 15 ޕޮއިންޓާއެކު ފަސް ޕޮއިންޓްގެ ލީޑަކާއެކު، ޕޮއިންޓް ތާވަލުގެ އެއްވަނައިގައެވެ. މެޗުން ބަލިވި އެއިބާ އޮތީ ކުޅުނު ފަސް މެޗުން ލިބުނު ހަ ޕޮއިންޓާއެކު ޕޮއިންޓް ތާވަލުގެ 13 ވަނައިގައެވެ.