އޮޔާޒަބަލްގެ ދެ ލަނޑާ އެކު، ސްޕެއިން އިން ސާބިއާ ބަލިކޮށްފި

ބައިނަލްއަޤުވާމީ ރަޙުމަތްތެރި ކަމުގައި ސާބިއާއާ ދެކޮޅަށް ކުޅުނު މެޗުން ސްޕެއިން މޮޅުވެއްޖެ އެވެ. 

ހުކުރު ދުވަހުގެ ރޭ ދަންވަރު ސާބިއާއާ ދެކޮޅަށް ކުޅުނު މެޗު ސްޕެއިން އިން ކާމިޔާބު ކުރީ 3-0 އިންނެވެ. މެޗުގެ ފުރަތަަމަ ހާާފުގައި ސްޕެއިން އިން ދެ ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 16 ވަނަ މިނެޓުގައި ސްޕެއިން އަށް ލީޑު ނަގައިދިނީ މިކޭލް އޮޔާޒަބަލް އެވެ. އެ ލަނޑު ޖަހަން އޮޔާޒަބަލް އަށް ފުރުސަތު ތަނަވަސްކޮށްދިނީ ފާމިން ލޮޕޭޒް އެވެ. އޭގެ ފަހުން ފުރަތަމަ ހާފު ނިމެން މިނެޓަކަށް ވެފައި ވަނިކޮށް، އޮޔާޒަބަލް ވަނީ ސްޕެއިންގެ ދެ ވަނަ ލަަނޑު ޖަހައި ލީޑު ފުޅާ ކޮށްފަ އެވެ. އެއީ ޕައު ސުބާސީ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގެ ދެ ވަނަ ހާފުގައި ވެސް ސްޕެއިން އިން ވަނީ ރަނގަޅަށް ކުޅެ ލަނޑު ޖަހަން ފުރުސަތު ތަކެއް ހޯދައިފަ އެވެ. މެޗުގައި ސްޕެއިންގެ ތިން ވަނަ ލަނޑު، މެޗުގެ 72 ވަނަ މިނެޓުގައި ޖެހީ ވިކްޓޯ މުނޯޒް އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ.

ބައިނަލްއަޤުވާމީ ރަޙުމަތްތެރި ކަމުގައި ސްޕެއިން އިން ދެން ކުޅޭނީ މިޞްރާ ދެކޮޅަށެވެ. މިއީ ޖޫން މަހު ފަށާ ފީފާ ވޯލްޑް ކަޕަށް ތައްޔާރުވުމުގެ ގޮތުން ސްޕެއިން އިން ކުޅޭ ރަޙުމަތްތެރި ކަމުގެ މެޗު ތަކެކެވެ.