ރައީސް އަބުދުﷲ ޔާމީންގެ އަނބިކަނބަލުން މެޑަމް ފާތިމަތު އިބުރާހިމް ރ. މީދުއަށް ވަޑައިގަތުމުން އަނަސްއަށް އިންސާފު ހޯދައިދުނުމަށް ގޮވާލާ ގިނަ އަދަދެއްގެ ޒުވާނުން ހަމަހިމޭންކަމުގެ އިހުތިޖާޖުކޮށްފިއެވެ.

ރާއްޖެއެމްވީއަށް މައުލޫމާތު ދެއްވަމުން މިކަން އިންތިޒާމް ކުރުމުގައި އިސްކޮށްއުޅުނު އަނަސްގެ އާއިލީ މެންބަރަކު ބުނީ، މި އިހުތިޖާޖަކީ އަނަސްގެ މަރަށް އަވަސް އިންސާފެއް ހޯދައިދިނުމަށް ގޮވާލާ އާއިލާއާއި، އެރަށުގެ ގިނަ ޒުވާނުން ގުޅިގެން ކުރިއަށް ގެންދިޔަ އެއްވުމެއް ކަމަށެވެ.

އޭނާ ބުނީ، މި އެއްވުމުގެ އެންމެ ބޮޑު ބޭނުމަކީ ރައީސްގެ އަނބިކަނބަލުންނާއި އަދި އެރަށަށް ވަޑައިގެންނެވި ސަރުކާރުގެ އިސްބޭފުޅުންގެ ސަމާލުކަމަށް މިކަން ގެނައުން ކަމަށެވެ. އަދި އެކަމުގެ ނަތީޖާއެއްގެ ގޮތުން އަނަސްގެ އާއިލާގެ ބައެއް މެންބަރުންނާއި މެޑަމް ފާތުން ބައްދަލު ކޮށްލެއްވިކަމަށް އަނަސްގެ އާއިލާގެ މެމްބަރަކު ބުންޏެވެ.  އަދި އަނަސްއަށް އިންސާފު ހޯދައި ދިނުމަށް ކަމާގުޅޭ އެންމެހާ ފަރާތްތަކުން ވަރަށް ސީރިއަސްކޮށް މިކަން ތަހުގީގު ކުރަމުންދާ ކަމަށް މެޑަމްގެ ފަރާތުން ވާހަކަފުޅު ދެއްކެވި އިކޮނޮމިކް މިނިސްޓަ ސައީދު ވިދާޅުވިކަމަށް އާއިލާއިން ބުންޏެވެ. އެހެންނަމަވެސް މެޑަމް މިކަމާ އެއްވެސް ބަސްފުޅޭއް ވިދާޅުވެފައި ނުވާކަމަށް އާއިލާގެ ފަރާތުން ވާހަކަދެއްކި މީހާ ބުންޏެވެ.

މެޑަމް ފާތުމަތު އިބްރާހިމް މިހާރު ރ. އަތޮޅަށް ކުރައްވަމުންގެންދަވާ މި ދަތުރުފުޅުގައި މީދޫއަށް ވަޑާއިގަތީ އަންގާރަދުވަހުގެ ހަވީރު 4.45 ހާއިރުއެވެ. އޭރު މީދޫގެ ބަނދަރު ސަރަހައްދުގައި އަނަސްއަށް އިންސާފު ހޯދައި ދިނުމަށް ގޮވާލާ ކުރިއަށް ގެންދިޔަ ހަމަހިމޭން އިހުތިޖާޖު ދިޔައީ ކުރިއަށެވެ. އެ އިހުތިޖާޖުގައި ޒުވާނުން ތިބީ، އަނަސްއަށް އިންސާފު ހޯދައިދިނުމަށް ގޮވާލާ ޝުއއޫރުތައް ލިޔެފައިވާ ބޯޑްތަކާއި ބެނާތައް ހިފައިގެންނެވެ."ޓީޝާޓް ކުށްވެރިނުކުރޭ" "ޖަސްޓިސް ފޯ އަނަސް" ލިޔެފައިވާ ބެނާތައް ހިފައިގެން ޒުވާނުން ތިބިއިރު، އަނަސް މަރާލިލޭ ލައިގެން ހުރި ޒާތުގެ ކެމޮފްލާޖް ބޮޑު ޓީޝާޓެއް ވެސް މި އިހުތިޖާޖްގައި ޒުވާނުން ވަނީ ބޭނުން ކޮށްފައެވެ.

މައުލޫމާތު ލިބިފައިވާގޮތުގައި މެޑަމް ފާތުމަތު އިބްރާހިމް ރ. އަތޮޅަށް ކުރައްވާ މި ދަތުރުފުޅަކީ، އިލެކްޝަންސް ކޮމިޝަނުން ހުސްވެފައިވާ ކަމަށް ކަނޑާއަޅާފައިވާ ރ. މަޑުއްވެރީ ދާއިރާގެ ބައިލެކްޝަންގެ ކެމްޕެއިނަށް ތާއީދުހޯދުމަށް ކުރައްވާ ދަތުރުފުޅެކެވެ. މި ދަތުރުފުޅުގައި މީދޫގައި އަންގާރަދުވަހުގެ ރޭ ޖަލްސާއެއް ބޭއްވުމަށްވެސް ވަނީ ނިންމާފައެވެ.

އަނަސް މަރާލާފައިވަނީ ޖުލައި މަހުގެ 31 ވަނަ ދުވަހުގެ ރޭ ލިޓަސް ސަރވިސް ސެންޓަރު ތެރޭގައި ހުއްޓަ އެވެ.

އާންމުވެފައިވާ ވީޑިއޯއިން ފެންނަ ގޮތުގައި ހަތަރު މީހުންގެ ގްރޫޕަކުން ތޫނު ހަތިޔާރާއެކު ލިޓަސް ސަރވިސް ސެންޓަރު ތެރެއަށް ވަދެ އަނަސްގެ ހަށިގަނޑުގެ އެކި ތަންތަނަށް ހަމަލާދީފައިވެއެވެ. ލިޓަސް ސަރވިސް ސެންޓަރަށް އަނަސް ދުވެފައި ގޮސް ވަދެފައި ވަނީ އެމީހުން އޭނާގެ ފަހަތުން ދުވެފައި ދިއުމުން ކަން ވީޑިއޯއިން ފެނެ އެވެ. އަނަސް އަށް ހަމަލާދިން އެންމެން ވެސް ތިބީ މާސްކް އަޅައިގެންނެވެ.

އަނަސްގެ ހަށިގަނޑުގެ 37 ތަނަކަށް މަދު ސިކުންތުކޮޅެއްގެ ތެރޭގައި ހަމަލާދިން އިރު، އޭޑީކޭ ހޮސްޕިޓަލަށް ގެންދިޔަ އިރުވެސް އޭނާ އޮތީ މަރުވެފަ އެވެ.

އަނަސްގެ މަރުގެ މައްސަލަ އާއި ގުޅިގެން ކޯޓް އަމުރެއްގެ ދަށުން މާފަންނު ދިމިޝްކް ގެ ކިޔާ ގެއަކުން، އުމުރުން 23 އަހަރުގެ ފިރިހެނަކާއި 18 އަހަރު ނުފުރޭ ފިރިހެނަކު ފުލުހުން ވަނީ ހައްޔަރުކޮށްފައެވެ.

އަނަސްގެ މަރުގެ ތަހުގީގު ކުރިއަށްދާއިރު، އެ މައްސަލައިގެ ތަހުގީގު ކުރިއަށް ގޮސްފައިވާ ވަރާއި ގުޅޭގޮތުން ފުލުހުން ވަނީ އަނަސްގެ ބައްޕައާއި ބައްދަލުކޮށް މައުލޫމާތު ހިއްސާކޮށްފައެވެ. އެހެން ނަމަވެސް ތަހުގީގު ކުރިއަށް ގޮސްފައިވާ ވަރާގުޅޭ އެއްވެސް މައުލޫމާތެއް އަދި މިހާތަނަށް މީޑއާއަށް ފުލުހުން ހިއްސާކޮށްފައެ އްނުވެއެވެ.