ރެއާލް މެޑްރިޑަށް ކުޅެމުން އަންނަ ސްޕެއިންގެ ޑިފެންޑަރ ޑެނީ ކަވަހާލް އެ ކްލަބާއެކު ހަދާފައިވާ އެއްބަސްވުން އާކޮށްފިއެވެ.
ރެއާލް މެޑްރިޑަށް 167 މެޗު ކުޅެދީފައިވާ ކަވަހާލް ވަނީ ހޯމަދުވަހު އެ ކްލަބާއެކު އާ އެއްބަސްވުމެއްގައި ސޮއިކޮށްފައެވެ. އޭނާ މި ކޮންޓްރެކްޓްގައި ސޮއި ކުރުމާއެކު 2022 ވަނަ އަހަރާ ހަމަޔަށް އޭނާ ދެމިހުންނާނީ ރެއާލްގެ ކުޅުންތެރިޔެއްގެ ގޮތުގައެވެ. ހަމައެހެންމެ އާ ކޮންޓްރެކްޓާއެކު އޭނާގެ ރިލީސް ފީ 308 މިލިއަން ޕައުންޑަށް އުފުލިގެން ދާނެއެވެ. ކަވަހާލްއަށް ރެއާލްއިން ހުށަހެޅި މުސާރަ އެ ޓީމުން އާންމު ކޮށްފައެއް ނުވެއެވެ.
ރެއާލްގެ ރައީސް ފްލޮރެންޓީނޯ ޕެރޭޒްއާއެކު އެއްބަސްވުމުގައި ސޮއި ކުރުމަށް ފަހު ކަވަހާލް ބުނެފައިވަނީ ކޮންޓްރެކްޓްގައި ސޮއި ކުރެވުނު ދުވަހަކީ ވަރަށް މުހިންމު ދުވަހެއް ކަމަށާއި އާ ކޮންޓްރެކްޓެއް ރެއާލްއިން ހުށަހެޅުމުގެ މާނައަކީ މިހާތަނަށް އޭނާއަށް އެ ކްލަބުގައި ދެއްކިފައިވާ ކުޅުމާ މެދު ރެއާލްގެ މެނޭޖްމަންޓާއި ސަޕޯޓަރުން ހިތްހަމަޖެހުން ކަމަށެވެ. ހަމައެހެންމެ އޭނާއަށް ރެއާލްއާއެކު ހުރިހާ ތައްޓެއް ވެސް ކާމިޔާބު ކުރެވިފައިވާ ކަމަށާއި އެހެނަސް އޭނާގެ އުއްމީދަކީ އަދިވެސް ރެއާލްއާއެކު ކާމިޔާބު ހޯދުން ކަމަށް ކަވަހާލް ބުންޏެވެ.
ކަވަހާލް އިތުރަށް ބުނެފައި ވަނީ އެހެން ކްލަބުތަކުން އޭނާއަށް ހުށަހެޅުންތަށް އައި ކަމަށާއި އެހެން ނަމަވެސް އޭގެ ތެރެއިން އެއްވެސް ހުށަހެޅުމަކަށް އޭނާ އިޖާބަ ދިފައިނުވާ ކަމަށެވެ. އަދި އޭނާއަށް ކިތަންމެ ބޮޑު މުސާރައެއް އެހެން ކްލަބަކުން ހުށަހެޅި ނަމަވެސް ރެއާލް ދޫ ނުކޮށްލާނެ ކަމަށެވެ. މި ނޫސްވެރިންގެ ބައްދަލުވުމުގައި އޭނާވަނީ ކެރިއަރުގައި އޭނާއަށް މިހާތަނަށް އެހީތެރިވި ހުރިހާ މީހުންނަށާއި އޭނާގެ ސަޕޯޓަރުންނަށް ވަރަށް ބޮޑަށް ޝުކުރު އަދާކޮށްފައެވެ.
ލެގަނޭސްއިން 2004 ވަނަ އަހަރު ރެއާލްގެ އެކަޑަމީއާ ގުޅުމަށް ފަހު ކަވަހާލް ވަނީ ހަރުފަތަކަށް ފަހު ހަރުފަތެއް ގިރާކުރަމުން އައިސް 2012 ވަނަ އޭނާ ވަނީ ރެއާލްގެ ފުރަތަމަ ޓީމާ ގުޅިފައެވެ. އެހެނަމަސް އޭނާގެ ފުރަތަމަ ސީޒަން ހޭދަކޮށްފައިވަނީ ލޯނު އެއްބަސްވުމެއްގެ ދަށުން ޖަރުމަނުގެ ބަޔާ ލެވަކޫސަންގައެވެ. އަދި 2013 ވަނަ އަހަރު އެނބުރި އައުމަށް ފަހު އޭނާވަނީ މިހާތަނަށް ރެއާލްއާއެކު 11 ތަށި ކާމިޔާބު ކޮށްފައެވެ.
