ރިފަރެންޑަމްގައި އިޓަލީގެ ބޮޑު ވަޒީރު މެލޯނީ އަށް ރައްޔިތުން ނޫނެކޭ ބުނެފި

އިޓަލީގެ ބޮޑު ވަޒީރު ޖޯޖިއާ މެލޯނީ ހުށަހެޅުއްވި އަދުލު އިންސާފު ނިޒާމު އިސްލާޙު ކުރުމުގެ ރިފަރަންޑަމް ގައި އެކަމަނާ ބަލިވެއްޖެ އެވެ.

ރަސްމީ ނަތީޖާތައް ދައްކާ ގޮތުން ބޮޑު ވަޒީރު މެލޯނީ ހުށަހެޅުއްވި އިސްލާހު ތަކަަށް އިޓަލީގެ ރައްޔިތުން ވަނީ ނޫނެކޭ ބުނެ ވޯޓު ދީފަ އެވެ.

އިންތިޚާބުގެ ނަތީޖާތައް ދައްކާ ގޮތުން، ބޮޑު ވަޒީރު މެލޯނީ ހުށަހެޅުއްވި އިސްލާހުތަކާ ދެކޮޅަށް 53.74 އިންސައްތަ ރައްޔިތުން ވަނީ ވޯޓު ދީފަ އެވެ. އިސްލާހު ތަކަަށް ތާއީދު ކޮށްފައި ވަނީ 42.26 އިންސައްތަ ރައްޔިތުންނެވެ.

ރިފަރެންޑަމްގައި ރައްޔިތުން ނޫނެކޭ ބުނުމުން، ބޮޑު ވަޒީރު ވަނީ ބަލި ޤަބޫލު ކުރައްވައިފަ އެވެ. މެލޯނީ ކުރެއްވި ޕޯސްޓެއްގައި ވިދާޅުވީ، އިޓަލީ ރައްޔިތުން ގޮތެއް ނިންމަވައިފި ކަމަށާއު، އެ ނިންމުމަށް އިޙުތިރާމް ކުރައްވާނެ ކަމަށެވެ. އެއާ އެކު މެލޯނީ ވިދާޅުވީ މީގެ ކުރިން ވެސް މަސައްކަތް ކުރައްވާފައިވާ ގޮތަށް، އަބަދު ވެސް މަސައްކަތް ކުރައްވާނީ އިޓަލީގެ ރައްޔިތުންނަށް އިޙުތިރާމް ކޮށްގެން ކަމަށެވެ. 

ރިފަރެންޑަމްގައި ބަލިވުމާ އެކު، ކަނާއަތު ފިޔައިގެ ލީޑަރު މެލޯނީގެ ސިޔާސީ ބާރުވެރިކަން ދަށް ވާނެ ކަމަށް ލަފާ ކުރެވެ އެވެ. ޚާއްސަކޮށް އަންނަ އަހަރު ނިމުމުގެ ކުރިން އޮންނާނެ ކަމަށް ލަފާ ކުރެވޭ އާންމު އިންތިޚާބުގެ ކުރިން މިއީ ބޮޑު ވަޒީރު މެލޯނީ އަށް ކުރިމަތިވި ބޮޑު ނާކާމިޔާބެކެވެ. 

އިޓަލީގެ ކަނާއަތު ފިޔައިގެ ސިޔާސީ ލީޑަރުން އަބަދު ވެސް ބުނަމުން އައިސްފައި ވަނީ، އެ ޤައުމުގެ އަދުލު އިންސާފުގެ ނިޒާމަކީ ސިޔާސީ ނުފޫޒު އޮތް ނިޒާމެއް ކަމަށެވެ. އަދި އެއީ ކަނާއަތު ފިޔައިގެ ފަރާތްތަކާ ދެކޮޅަށް އޮތް ނިޒާމެއް ކަމަށް ބުނެ އެވެ.

ރިފަރެންޑަމްގައި ވޯޓު ލުމަށް އެދިފައި ވަނީ ގާޒީންނާއި، ޕްރޮސެކިއުޓަރުންގެ މަސައްކަތް ބެލެހެއްޓުމާއި، އިސްތިއުނާފު ކުރުމުގެ ނިޒާމަށް ގެނައުމަށް ހުށަހެޅި ބަދަލު ތަކެވެ. އެގޮތުން ދެ ފަރާތުގެ ވަޒީފާގެ މަގުތައް ވަކި ކުރުމާއި، ބެލެހެއްޓުމުގެ އިދާރާ ތައް އައު ކުރުން ހިމެނެ އެވެ.