ފުލުހުންގެ ޚާއްސަ އޮޕަރޭޝަންތަކެއްގައި 11 މީހަކު ހައްޔަރުކޮށް، ދެ ލައްކައަށް ވުރެ ގިނަ ރުފިޔާ ހޯދައިފި
ވޭތުވެދިޔަ 48 ގަޑިއިރުގެ ތެރޭގައި ފުލުހުން ހިންގި ޚާއްޞަ އޮޕަރޭޝަންތަކުގައި 11 މީހަކު ހައްޔަރުކޮށް، ވައްކަމާއި އެކި ކުށްތަކާ ގުޅުންހުރި 231,000 އަށް ވުރެ ގިނަ ރުފިޔާ ވަނީ ހޯދާފައި. މީގެ އިތުރުން މާލޭގެ އެކި ޕޮލިސް ސްޓޭޝަންތަކަށް ހުށަހެޅުނު ގިނަ މައްސަލަތަކަކާ ގުޅިގެން ކުރެވުނު މަސައްކަތްތަކުން ގިނަ އަދަދެއްގެ ފައިސާ ގަލޮޅު ޕޮލިސް ސްޓޭޝަނުން ވެސް ހޯދާފައިވޭ.
ސްކޭމްތަކުގެ ސަބަބުން ގެއްލުނު ފައިސާތަކެއް ފުލުހުން ހޯދާފައި. ފައިލް ފޮޓޯ | ޕޮލިސް
ފުލުހުން ހިންގި ޚާއްސަ އޮޕަރޭޝަންތަކެއްގައި 11 މީހަކު ހައްޔަރުކޮށް، ވައްކަމާއި އެކި ކުށްތަކާ ގުޅުންހުރި ދެ ލައްކައަށް ވުރެ ގިނަ ރުފިޔާ ހޯދާފައިވާ ކަމަށް އެސިސްޓަންޓް ކޮމިޝަނަރު އަހުމަދު ޝިފާން ވިދާޅުވެއްޖެ އެވެ.
ބުދަ ދުވަހުގެ ރޭ ޝިފާން ވިދާޅުވީ، ވޭތުވެދިޔަ 48 ގަޑިއިރުގެ ތެރޭގައި ފުލުހުން ހިންގި ޚާއްސަ އޮޕަރޭޝަންތަކެއްގައި 11 މީހަކު ހައްޔަރުކޮށް، ވައްކަމާއި އެކި ކުށްތަކާ ގުޅުންހުރި 231،000 ދިވެހި ރުފިޔާ ހޯދާފައިވާ ކަމަށެވެ.
ޝިފާން ވިދާޅުވީ، މާލެ ސަރަހައްދަކީ އަމާން ތަނެއްގެ ގޮތުގައި ބޭއްވުމަށް ފުލުހުން މެދުނުކެނޑި ކުރިއަށްގެންދާ ޕެޓްރޯލް ކުރުންތަކާއި، އާންމު ރައްޔިތުންނާ ގުޅިގެން ކުރާ މަސައްކަތްތަކަކީ މިފަދަ ކުށްތައް ހުއްޓުވުމަށް ކުރާ އެންމެ މުހިންމު މަސައްކަތް ކަމުގައެވެ.
ޝިފާން މިހެން ވިދާޅުވިއިރު، މިފަހުން ސްކޭމްގެ މައްސަލަތައް ވަނީ އިތުރުވެފަ އެވެ.
މިމަހުގެ 9 އަދި 10 ވަނަ ދުވަހު ކުރިއަށް ގެންދިޔަ މަސައްކަތްތަކާ ގުޅޭގޮތުން ފުލުހުން ބުނީ، ހެންވޭރު ޕޮލިސް ސްޓޭޝަނަށް މި މުއްދަތުގައި 21 މައްސަލައެއް ހުށަހަޅާފައިވާ ކަމަށާއި، 17 ކޯލެއް އައިސްފައިވާ ކަމަށެވެ. އަދި އެ މުއްދަތުގައި ދެ މީހަކު ހައްޔަރުކުރިއިރު، ވައްކަމާއި އެ ނޫންވެސް މައްސަލަތަކާއި، ގެއްލުނު 24،400 ރުފިޔާގެ ތެރެއިން 4،000 ރުފިޔާ ހޯދިފައިވާ ކަމަށް ފުލުހުން ބުނެ އެވެ.
ގަލޮޅު ޕޮލިސް ސްޓޭޝަނަށް މި މުއްދަތުގައި 33 މައްސަލައެއް ހުށަހެޅުނުކަން ފާހަގަކޮށް ފުލުހުން ބުނީ، 21 ކޯލެއް އައިސްފައިވާ ކަމަށެވެ. އަދި އެ މުއްދަތުގައި ފަސް މީހަކު ހައްޔަރުކުރިއިރު، ދެ ހާދިސާއަކާއި ގުޅުން ހުރި 224،600 ރުފިޔާ ހޯދާފައިވާ ކަމަށް ފުލުހުން ބުނެ އެވެ.
މީގެ އިތުރުން މާފަންނު ޕޮލިސް ސްޓޭޝަނަށް މި މުއްދަތުގައި 37 މައްސަލައެއް ހުށަހެޅުނުއިރު، 26 ކޯލެއް އައިސްފައިވާ ކަމަށް ފުލުހުން ބުނެ އެވެ. އަދި އެ މުއްދަތުގައި ހަތަރު މީހަކު ހައްޔަރު ކޮށްފައިވާ ކަމަށާއި، ވައްކަމާއި އެ ނޫންވެސް މައްސަލަތަކާއި ގެއްލުނު 62،400 ރުފިޔާގެ ތެރެއިން 2،400 ހޯދާފައިވާ ކަމަށް ފުލުހުން ބުނެ އެވެ.
