ހުސްވި އަހަރުގެ ހަތަރު ވަނަ ކުއާޓަރގެ ސާފު ފައިދާގެ ގޮތުގައި ބީއެމްއެލް އަށް 837.5 މިލިއަން ރުފިޔާ ލިބިފައިވާ ކަމަށް ހާމަ ކޮށްފި

ބޭންކް އޮފް މޯލްޑިވްސް (ބީއެމްއެލް) އިން އާންމުކޮށްފައިވާ 2025 ވަނަ އަހަރުގެ ހަތަރުވަނަ ކުއާޓަރުގެ މާލީ ހިސާބުތަކަށް ބަލާއިރު، އެ ބޭންކަށް މިދިޔަ އަހަރު ރެކޯޑް މިންވަރެއްގެ މާލީ ކުރިއެރުމެއް ލިބިފައިވާކަން ހާމަވެއްޖެ އެވެ.

ބޭންކުން ބުނެފައިވާ ގޮތުގައި ހުސްވި އަހަރުގެ ހަތަރުވަނަ ކުއާޓަރުގައި ބޭންކުގެ ހިންގުމުގެ ފައިދާގެ ގޮތުގައި 828.7 މިލިއަން ރުފިޔާ ލިބިފައިވާއިރު، ސާފު ފައިދާގެ ގޮތުގައި ވަނީ 837.5 މިލިއަން ރުފިޔާ ލިބިފަ އެވެ. މިއީ އޭގެ ކުރީ ކުއާޓަރާ އަޅާބަލާއިރު ފާހަގަކޮށްލެވޭ ބޮޑު ކުރިއެރުމެކެވެ. ބޭންކުން ހާމަކޮށްފައިވާ ގޮތުގައި މި ނަތީޖާ ހާސިލްކުރެވުނީ ބޭންކަށް ލިބޭ އާމްދަނީ އިތުރުވުމާ އެކު، ހިންގުމުގެ ޚަރަދުތައް ހަރުދަނާކޮށް ބެލެހެއްޓުމުގެ ސަބަބުންނެވެ.

2025 ވަނަ އަހަރުގެ މުޅި އަހަރަށް ބަލާއިރު، ބޭންކަށް ޖުމްލަ އާމްދަނީގެ ގޮތުގައި 5.5 ބިލިއަން ރުފިޔާ ލިބިފައިވެ އެވެ. މިއީ 2024 ވަނަ އަހަރާ އަޅާބަލާއިރު 16.1 އިންސައްތައިގެ ކުރިއެރުމެކެވެ. މީގެ އިތުރުން، ޓެކްސް އަށް ކެނޑުމުގެ ކުރިން ލިބުނު ފައިދާ ވަނީ 10 އިންސައްތަ އިތުރުވެ، 3.2 ބިލިއަން ރުފިޔާ އަށް އަރާފައެވެ. އަހަރު ނިމުނުއިރު ބޭންކުގެ ޖުމްލަ މުދަލުގެ އަގު (ޓޯޓަލް އެސެޓްސް) ވަނީ 15 އިންސައްތައިގެ ކުރިއެރުމަކާއެކު 55.7 ބިލިއަން ރުފިޔާ އަށް ވުރެ މައްޗަށް ގޮސްފަ އެވެ. އަދި އާމްދަނީއާ އަޅާބަލާއިރު ޚަރަދު ހުރި ނިސްބަތް (ކޮސްޓް-ޓު-އިންކަމް ރޭޝިއޯ) ހުރީ 27 އިންސައްތައިގަ އެވެ.

މިދިޔަ 2025 ވަނަ އަހަރުގެ ތެރޭގައި ބޭންކުން ވަނީ އަމިއްލަ ފަރުދުންނާއި ވިޔަފާރިތަކަށް އައު ލޯނުގެ ގޮތުގައި 10 ބިލިއަން ރުފިޔާ ދޫކޮށްފަ އެވެ. މީގެ އިތުރުން، ބޭންކުގެ ރައުސްމާލާއި ނަގުދު ފައިސާ ހުރި މިންވަރު (ކެޕިޓަލް އެޑިކުއަސީ އެންޑް ލިކުއިޑިޓީ ރޭޝިއޯ) ވަނީ ކަމާބެހޭ އިދާރާތަކުން ކަނޑައަޅާފައިވާ މިންގަނޑަށްވުރެ މަތީގައި ހިފެހެއްޓިފައި ކަމަށް ބީއެމްއެލް އިން ހާމަ ކޮށްފައިވެ އެވެ.