ރާއްޖޭގައި ބާއްވާ އެންމެ ބޮޑު ފޮޓޯގްރަފީ ޗެލެންޖު ރަންފައުނުން ބާއްވަނީ، ރެޖިސްޓަރ ވުމަށް ހުޅުވާލައިފި

ރާއްޖޭގައި ބާއްވާ އެންމެ ބޮޑު ފޮޓޯގްރަފީ ޗެލެންޖު ކުރިއަށް ގެންދިއުމަށް ރަންފައުނުން ތައްޔާރުވެއްޖެއެވެ.

ރާއްޖެއެމްވީއަށް ރަންފައުނުން މައުލޫމާތު ދިން ގޮތުގައި މިއީ ސޮނީ އާ ގުޅިގެން ކުރިއަށް ގެންދާ ބައިނަލްއަޤުވާމީ ޗެލެންޖެކެވެ. އެގޮތުން 6 ޤައުމެއްގައި މި ޗެލެންޖު ކުރިއަށްދާއިރު، މިއީ މި ޗެލެންޖު ރާއްޖޭގައި ބާއްވާ ފުރަތަމަ ފަހަރެވެ.

ރާއްޖޭގައި މި ޗެލެންޖު ކުރިއަށްދާނީ މި މަހުގެ 22 ގައި މެންހެޓަންގައެވެ.

ރަންފައުނުން މައުލޫމާތު ދޭ ގޮތުގައި މިހާރު މި ޗެލެންޖުގައި ބައިވެރިވުމަށް ރަޖިސްޓްރީ ވުމުގެ ފުރުސަތު ވަނީ ހުޅުވާލެވިފައެވެ. އެގޮތުން 3 ގިންތިއަކުން ބައިވެރިވުމުގެ ފުރުސަތު ވަނީ ހުޅުވާލެވިފައެވެ. އެއީ ފޮޓޯގްރަފީ، ފޮޓޯގްރަފީ ޔޫތު އަދި ވީޑިއޯގްރަފީއެވެ. ޖުމުލަ 80 ސްލޮޓެއް މި ޗެލެންޖުގައި ރަޖިސްޓްރީވުމަށް ހިމެނިފައިވެއެވެ.

ރާއްޖެއެމްވީއަށް ރަންފައުނުން މައުލޫމާތު ދިން ގޮތުގައި މި ޗެލެންޖުގައި ލިބޭ އިނާމުތަކުގެ ޖުމުލަ އަގު ހަތަރު ލައްކަ ރުފިޔާއަށްވުރެ މައްޗެވެ. އެގޮތުން އިނާމުތަކަށް ބަލާއިރު، ސޮނީ ކެމެރާ އާއި، ހުރިހާ ޚަރަދުތަކެއް ކަވަރ ކޮށްފައިވާ ސިންގަޕޫރު ދަތުރުތައް ހިމެނެއެވެ.  

މީގެ އިތުރުންވެސް ބައިވެރިވާ ކޮންމެ ފަރާތަކަށްވެސް ހަދިޔާ ދިނުމަށް ހަމަޖެހިފައިވެއެވެ.

މި ޗެލެންޖުގައި ބައިވެރިވުމަށްޓަކައި ރަޖިސްޓަރ ވުމުގެ ފުރުސަތު ހުޅުވާލާފައިވާއިރު، ރަޖިސްޓްރޭޝަން ފީއަކީ 300 ރުފިޔާއެވެ. ރަޖިސްޓްރޭޝަން ލިންކަށް ވަނުމުން މުބާރާތާ ގުޅޭ އިތުރު މައުލޫމާތުތައްވެސް ލިބިގެންދާނެއެވެ. އަދި ޗެލެންޖުގައި ބައިވެރިވާ ފަރާތްތަކުން އެ ދުވަހު މެންހެޓަންއަށް ދިއުމުން ފޮޓޯ ނަގަންޖެހޭ ތީމް ހަވާލު ކުރެވޭނެއެވެ.