ވީއައިއޭ އަށް އާދިއްތަ ދުވަހު އަންނަން އޮތް 14 އަށްވުރެ ގިނަ ފްލައިޓް ކެންސަލް ވާނެ
މެދުއިރުމަތީގެ މަސްރަހު ގޯސްވެ، ވައިގެ ދަތުރުފަތުރަށް ބުރޫއެރުމުގެ ސަބަބުން ވެލާނާ އިންޓަނޭޝަނަލް އެއަރޕޯޓަށް އަންނަން އޮތް ގިނަ ފްލައިޓްތަކެއް ކެންސަލްވެ، ޓާމިނަލް ވަނީ ވަރަށް ބޮޑަށް ތޮއްޖެހިފައި. މި ހާލަތާ ގުޅިގެން، ރާއްޖޭގެ އިގްތިސާދާއި ފަތުރުވެރިކަން ހިމާޔަތްކުރުމަށް މިފަދަ ކުއްލި ހާލަތްތަކުން އަރައިގަނެވޭނެ ފަދަ ދިގު މުއްދަތުގެ އިސްތިރާޖީ ޕްލޭންތަކެއް އެކުލަވާލުމަށް ކަމާބެހޭ ފަރާތްތަކުން ބާރުއަޅާފައިވޭ.
އެއަރޕޯޓު ވެލާނާ އިންޓަނޭޝަނަލް އެއަރޕޯޓު ސަރަހައްދުގައި ބަޔަކު މަޑުކޮށްލައިގެން.
މެދުއިރުމަތީގެ މަސްރަހު ގޯސްވުމާއި ގުޅިގެން ރާއްޖޭގެ މައި އެއަރޕޯޓު ވެލާނާ އިންޓަނޭޝަނަލް އެއަރޕޯޓު (ވީއައިއޭ) އަށް އާދިއްތަ ދުވަހު އަންނަން އޮތް 14 އަށްވުރެ ގިނަ ފްލައިޓް ކެންސަލް ވާނެ ކަމަށް ލަފާކޮށްފި އެވެ.
އިސްރާއީލާއި އެމެރިކާއިން އީރާނަށް ވަރުގަދަ ހަމަލާތަކެއް ދިނުމާ ގުޅިގެން، އީރާނުން ދެމުންދާ ރައްދު ހަމަލާތަކާ ގުޅިގެން މެދުއިރުމަތީގެ މަސްރަހު ވަނީ ވަރަށް ގޯސްވެފަ އެވެ. އެއާއެކު ވައިގެ ދަތުރުފަތުރަށް ބުރޫއަރައި، އެ ސަރަހައްދުން ރާއްޖެ އަންނަ ފުލައިޓުތައް ކެންސަލްވުމުގެ ސަބަބުން ވައިގެ ދަތުރުފަތުރަށް ވަނީ ވަރަށް ބޮޑަށް ބުރޫ އަރާފަ އެވެ.
ހަނގުރާމައާ ގުޅިގެން ހޮނިހިރު ދުވަހުގެ ވެސް ގިނަ ފްލައިޓްތައް ކެންސަލްވެ، ވީއައިއޭގެ ބައިނަލްއަގުވާމީ ޓާމިނަލް އޮތީ ތޮއްޖެހިފަ އެވެ.
އޭވިއޭޓާސް މޯލްޑިވްސް އިން ބުނީ، އާދިއްތަ ދުވަހު ރާއްޖެ އަންނަން ހަމަޖެހިފައި އޮތް 12 ފުލައިޓެއް ކެންސަލް ކޮށްފައިވާ ކަމަށެވެ.
މީގެ އިތުރުން އިނާ މޯލްޑިވްސްގެ ސީއީއޯ މުހައްމަދު ފިރާގު އެކްސްގައި ވިދާޅުވީ، އާދިއްތަ ދުވަހު ވީއައިއޭއަށް އަންނަން ހަމަޖެހިފައި އޮތް 14 ފުލައިޓެއް ކެންސަލްވާނެ ކަމަށެވެ. މިކަމުގެ ސަބަބުން މިހާރުގެ ހާލަތު ނާޒުކު މިންވަރު ހާމަވާ ކަމަށް އޭނާ ވިދާޅުވި އެވެ.
ވައިގެ ދަތުރުފަތުރާއި ފަތުރުވެރިކަމަށް ބޮޑުތަނުން ބަރޯސާވެފައިވާ ގައުމެއްކަން ފާހަގަކުރައްވައި ފިރާގު ވިދާޅުވީ، ގައުމުގެ ތަރައްގީގެ ޕްލޭންތައް ބިނާކުރަންވާނީ ދިމާވެދާނެ މިފަދަ ކުއްލި ހާލަތްތަކުން އަރައިގަނެވޭނެ ގޮތަށް ކަމަށެވެ. އަދި މިފަދަ ހާލަތްތަކަކީ ހަމައެކަނި ވަގުތީ ކަމެއްގެ ގޮތުގައި ދެކުމުގެ ބަދަލުގައި، ގައުމުގެ ދިގު މުއްދަތުގެ އިސްތިރާޖީ ވިސްނުމުގެ ތެރޭގައި ހިމަނަންޖެހޭ ކަމެއް ކަމަށް އޭނާ ވިދާޅުވި އެވެ.
ފިރާގު ވިދާޅުވީ، ސަރުކާރުގެ ކަމާބެހޭ އިދާރާތަކާއި، ސިނާއީ ބައިވެރިންނާއި، އަމިއްލަ ކުންފުނިތަކުގެ އިތުރުން އާންމު ރައްޔިތުންގެ ބައިވެރިވުން މިކަމުގައި މިހާރަށްވުރެ ބޮޑަށް ބޭނުންވާ ކަމަށެވެ. އަދި ރާއްޖޭގެ އިގްތިސާދު ހިމާޔަތްކޮށް، ފަތުރުވެރިކަމުގެ މަންޒިލެއްގެ ގޮތުގައި އޮތް އިތުބާރު ދެމެހެއްޓޭނީ ދެފުށް ފެންނަ ސިޔާސަތުތަކާއި، ޒިންމާދާރުކަމާއި އަދި އެއްބައިވަންތަކަމާއެކު މަސައްކަތް ކޮށްގެން ކަމަށް އޭނާ ވިދާޅުވި އެވެ.
