ރާއްޖޭން ބޭރުގެ އެއްވެސް ޤައުމެއްގައި ކައުންސިލް އިންތިޚާބުގެ ވޯޓު ފޮށި ނުހުންނާނެ

ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު އަދި ރައްޔިތުންގެ ޚިޔާލު ހޯދުމުގެ ޢާންމު ވޯޓު 2026 ގައި ވޯޓުލާން ރަޖިސްޓަރީވެފައިވާ ތަން ނޫން އެހެން ތަނަކަށް ވޯޓުލުމަށްޓަކައި ރަޖިސްޓަރީވުމުގެ ފުރުޞަތު ހަމަވި އިރު ރީ-ރަޖިސްޓްރީ ވެފައިވަނީ 26,454 މީހަކު ކަމަށް އިލެކްޝަންސް ކޮމިޝަނުން ބުނެފި އެވެ. 

ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީއާއި ހިޔާލު ހޯދުމުގެ އާންމު ވޯޓު ނެގުން އޮންނާނީ އެޕްރީލް މަހުގެ 4 ވަނަ ދުވަހު އެވެ. ރީ-ރަޖިސްޓްރީ ވާން ހުޅުވާލީ މި މަހުގެ 10 ވަނަ ދުވަހު އެވެ. އަދި 15 ވަނަ ދުވަހު މުއްދަތު ހަމަވި ނަމަވެސް، ފެންނަ ނުފެންނަ ވޯޓާއި ގުޅިގެން 21 ފެބްރުއަރީ އަށް ރީ-ރަޖިސްޓްރީވުމުގެ ފުރުސަތު އިތުރު ކުރި އެވެ. 

މި މުއްދަތުގެ ތެރޭގައި 26,454 މީހަކު ރީ ރަޖިސްޓްރީވެފައިވެ އެވެ. މީގެ ތެރޭގައި ޖަލުތަކުގައި ވޯޓުލާން 1،326 މީހުން،  ސިނާއީ ސަރަހައްދުގައި ވޯޓުލުމަށް 11 މީހުން، މެލޭޝިޔާގައި ވޯޓުލާން 499 މީހުން އަދި ސްރީލަންކާގައި ވޯޓުލާން 189 މީހުން ރީރަޖިސްޓަރީވެފައިވެ އެވެ. އަދި ރަށްރަށާއި މާލޭގައި ވޯޓުލާން 24،429 މީހުން ރީރަޖިސްޓަރީ ވި އެވެ.

އިލެކްޝަންސް ކޮމިޝަނުން ބުނީ އިންތިޚާބުގައި 29 ރިސޯޓެއްގައި ވޯޓުފޮށި ނުބަހައްޓާނެކަމަށެވެ. ވޯޓު ފޮށި ބެހެއްޓޭ ވަރަށް ރީ-ރަޖިސްޓްރީވީ 21 ރިސޯޓުންނެވެ. ސިނާޢީ މަސައްކަތްކުރާ ތަންތަނުގެ ތެރެއިން ހުޅުލެއާއި ތިލަފުއްޓާއި ގދ.ކާޑެއްދޫ ގައި އެކަށީގެންވާ ވަރަށް ރީ-ރަޖިސްޓްރީ ވެފައި ނުވާތީ ވޯޓު ފޮށި ނުބަހައްޓާނެ އެވެ. މީގެ އިތުރުން ބޭރުގެ އެއްވެސް ގައުމަކުން ވޯޓުފޮށީގެ އަދަދު ހަމަވާ ވަރަށް ރީރަޖިސްޓްރީވެފައި ނުވާތީ އެއްވެސް ޤައުމެއްގައި ވޯޓު ފޮށި ނުބަހައްޓާނެ ކަމަށް އިލެކްޝަންސް ކޮމިޝަނުން ބުނެ އެވެ. 

އިންތިޚާބު ކުރިއަށްދާނީ 2026 އެޕްރީލް 4 ވާ ހޮނިހިރު ދުވަހުގެ ހެނދުނު 8 އިން ހަވީރު 4 އަށެވެ. މިފަހަރުގެ އިންތިޚާބުގައި ކައުންސިލްތަކުގެ ޖުމްލަ 225 ދާއިރާއަކަށް މެންބަރުން އިންތިޚާބު ކުރަންޖެހެ އެވެ. އަދި ލޯކަލް ކައުންސިލްތަކަށް 678 މެންބަރުން އިންތިޚާބުކުރަންޖެހޭއިރު، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށްވެސް 678 އިންތިޚާބުކުރަންޖެހެ އެވެ. އެހެންކަމުން މިފަހަރުގެ އިންތިޚާބުގައި ޖުމްލަ 1,356 މެންބަރުން އިންތިޚާބުކުރެވިގެންދާނެ އެވެ. އަދި މިއަހަރު ބާއްވާ އިންތިޚާބުގައި 144,527 އަންހެނުންނާއި، 150,410 ފިރިހެނުން ހިމެނޭހެން ޖުމްލަ 294,937 މީހުންނަށް ވޯޓުލުމުގެ ޙައްޤު ލިބިފައިވެެ އެވެ.