ސިނަމާލެ އާއި މާލެހިޔާ ފްލެޓްތަކުގެ ވެރިންނަށް އެއްލައްކަ ރުފިޔާ ދޭން ރައީސް މުއިއްޒު ނިންމެވި ނިންމެވުން އޭސީސީން ހުއްޓުވަން ޖެހޭ: އަލީ ހުސެއިން
އަލީ ހުސެއިން ވިދާޅުވީ ދައުލަތުގެ ފައިސާ ބޭނުންކުރަންވާނީ ގާނޫނީ އޮނިގަނޑުގެ ތެރެއިން ހަމަހަމަކަމާއެކު ކަމަށްވާއިރު، ވަކި ބަޔަކަށް ފައިސާ ބެހުމަކީ އިންތިޚާބަށް ނުފޫޒު ފޯރުވުމުގެ އަމަލެއް ކަމަށެވެ. މިފަދަ އާއިލާތަކަށް އެހީތެރިކަން ފޯރުކޮށްދެންޏާ އެއްހާލަތެއްގައި ތިބި ހުރިހާ އެންމެނަށް ވެސް އެ އެހީތެރިކަން ސަރުކާރުން ފޯރުކޮށްދޭން ޖެހޭ ކަމަށް އޭނާ ވިދާޅުވި. އަދި ވިދާޅުވީ އިންތިޚާބު ބޯމަތިވުމުން ހަމައެކަނި ސިނަމާލެ އާއި މާލޭހިޔާ ފްލެޓްތަކުގެ ވެރިންނަށް އެއްލައްކަ ރުފިޔާ ދޭން ނިންމި ނިންމުމަކީ ރިޝްވަތުގެ އަމަލެއް ކަމަށް.
ރައީސް މުހައްމަދު މުއިއްޒު ސިނަމާލެ އަދި މާލެހިޔާ ފްލެޓްތަކުގައި ދިރިއުޅޭ ފަރާތްތަކާ ބައްދަލުކުރައްވައި، 100،000ރ. ދެއްވަން ރިޔާސީ ގަނޑުވަރު މުލީއާގޭ ގައި ބޭއްވި ބައްދަލުވުމުގައި ޕީއެންސީގެ ކެންޑިޑޭޓުން ވަނީ ބައިވެރިވެފައި. | އެކްސް
ލޯކަލް ކައުންސިލް އިންތިޚާބު ބޯމަތިވެފައިވަނިކޮށް، ސިނަމާލެ އާއި މާލެހިޔާ ފްލެޓްތަކުގެ ވެރިންނަށް އެއްލައްކަ ރުފިޔާ ދޭން ރައީސް ޑރ.މުހައްމަދު މުއިއްޒު ނިންމެވި ނަމަވެސް އެގޮތަށް އެކަން ނުކުރެވޭނެ ކަމަށާއި، އެމައްސަލަ އެންޓި ކޮރަޕްޝަން ކޮމިޝަން (އޭސީސީ)އިން ސީރިއަސް މައްސަލައެއްގެ ގޮތުގައި ތަހުގީގުކޮށް ހުއްޓުވަން ޖެހޭ ކަމަށް މަޝްހޫރު ގާނޫނީ ވަކީލް އަލީ ހުސެއިން ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި އަލީ ހުސެއިން ވިދާޅުވީ، ދައުލަތުގެ ފައިސާއަކީ ރައީސުލްޖުމްހޫރިއްޔާ ހިތްޕުޅަށް އަރައިވަޑައިގަތުމުން ހަރަދު ކުރެވޭނެ ފައިސާއެއް ނޫން ކަމަށާއި، އެއީ ދިވެހި ރައްޔިތުންގެ ފައިސާ ކަމަށެވެ. ނަމަވެސް ސިނަމާލެ އާއި މާލެހިޔާ ފްލެޓްތަކުގެ ވެރިންނަށް އެހީތެރިވާން ބޭނުންވެ، ރައީސް މުއިއްޒުގެ އަމިއްލަ ހަލާލު ފައިސާއިން ބަހާ ކަމަށްވާނަމަ މައްސަލައެއް ނެތް ކަމަށް އޭނާ ވިދާޅުވި އެވެ.
އަލީ ހުސެއިން ވިދާޅުވީ ދައުލަތުގެ ފައިސާ ދެވޭނީ ގާނޫނެއްގެ ތެރެއިން ކަމަށާއި، އެ މަސައްކަތް ކުރުމުގައި އަދުލުވެރިކަމާއި އިންސާފު އޮންނަން ޖެހޭ ކަމަށެވެ.
ދައުލަތުން އެހެން ދޭ ފައިސާއަކީ ސަބްސިޑީ އެއްތޯ. އެހީތެރިކަން ފޯރުކޮށްދެވޭނީ ގާނޫނުގައި ކަނޑައަޅާފައިވާ ގޮތުގެ މަތީން. ކޮން ގާނޫނެއްގެ ދަށުން ކޮން ގާނޫނެއް ފާސްކޮށްގެން ތޯ ރައީސުލްޖުމްހޫރިއްޔާ އެ ދެއްވާގެން އުޅުއްވަނީ. އަނެއްކާ ދެއްވާ ކަމަށްވަންޏާ އެއް ހާލަތެއްގައި ތިބި ބަޔަކާ ގުޅޭގޮތުން އަމަލު ކުރެވެން ޖެހެނީ ވެސް އެއްގޮތަކަށް ތެދެއްތޯ. ހަމަ އެކަނި ފްލެޓުގައި އުޅޭ މީހުން ހާލުގައި އުޅެނީ ނުވަތަ ފްލެޓުތަކުގައި މައްސަލަ ޖެހިފައި ހުރީ ސިނަމާލެ ފްލެޓުތަކުގައި އުޅޭ މީހުންނެއް ނޫން. ކޮބައިތޯ ހިޔާ ފްލެޓުގައި އުޅޭ މީހުން. ކޮބައިތޯ ފަހިޔޫނިއަންގައި އުޅޭ މީހުން.މަޝްހޫރު ގާނޫނީ ވަކީލް އަލީ ހުސެއިން
ހިޔާ ފްލެޓުތަކުގެ ވެރީންނަށް ދެ ލައްކަ ރުފިޔާ ދެއްވާނެ ކަމަށް ރައީސް މުއިއްޒު ވައުދުވެވަޑައިގެންނެވިކަން ފާހަގަކުރައްވައި އަލީ ހުސެއިން ވިދާޅުވީ މިއަދާ ހަމައަށް އެ ފައިސާ ދީފައިނުވާ ކަމަށާއި، ކުލި ދައްކާ މުއްދަތު ދިގު ދަންމާލީ ކަމަށެވެ. އެޑްޖަސްޓްމަންޓުތައް ގެނެސް، ކުރިއަށް އޮތް 7 އަހަރު ދުވަހުގެ ކުލި ކުޑަ ކުރި ކަމަށާއި، ދައްކަން ޖެހޭ ފައިސާއިން އެންމެ އަދަދެއް ވެސް އުނި ނުވާ ކަމަށް އޭނާ ވިދާޅުވި އެވެ. އަދި ވިދާޅުވީ އެއީ ސަރުކާރުން އޮޅުވާލި އޮޅުވާލުމެއް ކަމަށެވެ.
މީގެ އިތުރުން އަލީ ހުސެއިން ވިދާޅުވީ ފަހި ފްލެޓުތަކުގެ ވެރީންނަށް ވެސް ވަރަށް ގިނަ މައްސަލަތައް ދިމާވަމުންދާ ކަމަށާއި، ބައެއް އާއިލާތަކަށް ދިރިއުޅުން ބަދަލު ނުކުރެވިފައިވާ ކަަމަށެވެ. އަދި އަތޮޅުތެރޭގައި ވެސް ގެދޮރުގެ ދަތިކަން ކުރިމަތިވެފައިވާ އެތައް އާއިލާއެއް ތިބި ކަމަށް އޭނާ ވިދާޅުވި އެވެ.
އަލީ ހުސެއިން ވިދާޅުވީ މިފަދަ އާއިލާތަކަށް އެހީތެރިކަން ފޯރުކޮށްދެންޏާ އެއްހާލަތެއްގައި ތިބި ހުރިހާ އެންމެނަށް ވެސް އެ އެހީތެރިކަން ސަރުކާރުން ފޯރުކޮށްދޭން ޖެހޭ ކަމަށެވެ. އިންތިޚާބު ބޯމަތިވުމުން ހަމައެކަނި ސިނަމާލެ އާއި މާލެހިޔާ ފްލެޓްތަކުގެ ވެރިންނަށް އެއްލައްކަ ރުފިޔާ ދޭން ނިންމި ނިންމުމަކީ ރިޝްވަތުގެ އަމަލެއް ކަމަށާއި، އެއީ އިންތިޚާބަށް ނުފޫޒު ފޯރުވުމަށް ކުރާ މަސައްކަތެއް ކަމަށް އަލީ ހުސެއިން ވިދާޅުވި އެވެ. އަދި ވިދާޅުވީ މިމައްސަލަ އޭސީސީން ސީރިއަސް މައްސަލައެއްގެ ގޮތުގައި ތަހުގީގު ކުރަން ޖެހޭ ކަމަށާއި، ކޮމިޝަންގެ މެންބަރުންގެ ޒިންމާ ނަގައި، މި އަމަލު ހުއްޓުވަން ޖެހޭ ކަމަށެވެ.
ސިނަމާލޭގެ ހަތަރު ފްލެޓާއި މާލެހިޔާގެ ދެ ފްލެޓުގައި ޖުމްލަ 161 އެޕާޓްމަންޓު ހުންނައިރު، އޭގެއިން ކޮންމެ އެޕާޓްމަންޓެއްގެ ވެރިޔަކަށް އެއް ލައްކަ ރުފިޔާ ދޭން ޖުމްލަ 16.1 މިލިއަން ރުފިޔާ ހަރަދުވާނެ އެވެ. މި މައްސަލަ އޭސީސީއަށް މިހާރު ރަސްމީކޮށް ވަނީ ހުށަހަޅާފަ އެވެ.
ސިނަމާލެ އާއި މާލެހިޔާ ފްލެޓްތަކުގެ މައްސަލައަށް ދާއިމީ ހައްލެއް ހޯދައިދިނުމަށް ރައީސް މުއިއްޒު ވަނީ ވައުދުވެވަޑައިގެންފަ އެވެ. އެމަނިކުފާނުގެ ރިޔާސީ ވައުދަކަށްވާއިރު، ރައީސް މުއިއްޒު މާލެ ސިޓީގެ މޭޔަރުކަމުގައި ހުންނެވި ދުވަސްވަރު ވެސް ސިނަމާލެ ފްލެޓްތައް ތަޅާލައި އަލުން ތަރައްގީ ކުރުމުގެ މަޝްރޫއުގެ ދަށުން ދެ ފިޔަވައްސަކަށް ބަހާލައިގެން 1500 ހައުސިން ޔުނިޓު ގާއިމު ކުރުމުގެ މަޝްރޫއުއެއް 2023 ގެ ކުރީކޮޅު މާލެ ސިޓީ ކައުންސިލުން އިއުލާން ކުރި އެވެ. އޭރު ސިޓީ ކައުންސިލުން ޕްލޭންކުރީ ފުރަތަމަ ފިޔަވަހީގެ ދަށުން ފަސް ޓަވަރުގައި 700 ހައުސިން ޔުނިޓު ގާއިމުކުރުމަށެވެ. އަދި ދެވަނަ ފިޔަވަހީގައި އަޅާ ފަސް އިމާރާތުގައި 800 ޔުނިޓު އިމާރާތް ކުރުމަށް ވެސް އިއުލާން ކޮށްފައިވެ އެވެ.
މިސަރުކާރަށް ދެ އަހަރަށް ވުރެ ގިނަ ދުވަސްވެގެންދާއިރު، މިކަމާ ގުޅޭ އެއްވެސް މަސައްކަތެއް ކޮށްފައިނުވެ އެވެ.
