ކުޅުން ހުއްޓާލި މާޒިޔާއާ ގްރީންސްޓްރީޓުގެ މެޗުން މާޒިޔާ މޮޅުވިކަމަށް ނިންމައިފި

އުރީދޫ ދިވެހި ޕްރިމިއާ ލީގުގައި މައްސަލަޖެހި ކުޅުން ހުއްޓާލި މާޒިޔާ އާއި ގްރީން ސްޓްރީޓް ކުޅުނު މެޗުން މާޒިޔާ މޮޅުވި ކަމަށް އެފްއޭމްއިން ނިންމައިފިއެވެ.

ރެފްރީގެ ސަބަބުން ކުޅުން ހުއްޓާލި މި މެޗާ މެދު ގޮތެއް ނިންމާފައިވަނީ މެޗް ކޮމިޝަނަރޒް ރިޕޯޓާ ރެފްރީސް ރިޕޯޓާއި އަދި މެޗުގެ ރެފްރީއާއި މެޗު ކޮމިޝަނަރު މުބާރާތުގެ ކޮމިޓީއަށް ހާޒިރުކޮށް އެފަރާތުގެ ވާހަކައަށް ރިއާޔަތްކުރުމަށް ފަހު ކަމަށް އެފްއޭމްއިން ނެރުނު ބަޔާނެއްގައިވަނީ ބުނެފައެވެ.

މި މެޗުގައި މައްސަލަ ދިމާވާން މެދުވެރިވީ މި މެޗުގެ 51 ވަނަ މިނުޓުގައި ގްރީންގެ ބިދޭސީ ކުޅުންތެރިޔާ ސުބޯލް އިލިއާ ރެފްރީއާ ދިމާލަށް ހުތުރު އެއްޗެއް ބުނި ކަމަށް ބުނެ އޭނާއަށް ދެވަނަ ރީނދޫ ކާޑެއް ދެއްކުމާ ވިދިގެން ގްރީންގެ ކުޅުންތެރިން މިކަމާ ހިތްހަމަނުޖެހި ނުރުހުން ފާޅުކުރަމުން ދަނިކޮށް ރެފްރީ ނިއުޝާދް މެޗުގެ ކުޅުން ހުއްޓާލުމަށް ފަހު ދަނޑުން ފައިބައިގެން ދިޔުމުންނެވެ. މި މެޗުގެ ކުޅުން ފުރިހަމަ ވަގުތު ހަމަނުވަނީސް ނިންމާލާފައިވާއިރު އޭރު 1-0 ގެ ނަތީޖާއަކުން ކުރީގަ އޮތީ މާޒިޔާއެވެ.

މި މެޗުން މާޒިޔާ މޮޅުވެފައިވާކަމަށް ނިންމާފައިވާއިރު ގްރީންގެ ކޯޗު މުހައްމަދު ސޮބާހް ރާއްޖެއެމްވީއަށް ދިން އިންޓަވިއުއެއްގައި ބުނެފައިވަނީ ގްރީންގެ ކުޅުންތެރިން ތިބީ އެހެން ރެފްރީއެއް އަރުވައިގެން މެޗުގެ ކުޅުން ކުރިޔަށް ގެންދިޔުމަށް ކަމަށާ އަދި މެޗުގެ ހަތަރު ވަނަ އޮފިޝަލެއް ހުއްޓައި ލައިންސްމަނެއް ރެފްރީއެއްގެ ގޮތުގައި އެރުވުމަކީ ގަވާއިދުތަކާ މުޅިން ހިލާފް ކަމެއް ކަމަށެވެ. ހަމައެހެންމެ ގްރީންއިން މި މެޗުގައި ރެފްރީކަން ކުރި މުހައްމަދު ނިއުޝާދާ ގުޅޭގޮތުން ދެ ފަހަރެއްގެ މަތިން އެފްއޭމަށް މައްސަލަ ހުށަހަޅާފައިވާ ކަމަށެވެ.

މީގެކުރިން އެފްއޭމްއިން ވަނީ މި މެޗުގައި ރެފްރީކަންކުރި ނިއުޝާދު ސަސްޕެންޑްކޮށް އެ އިދާރާގެ ރެފްރީސް ޑިޕާޓްމެންޓާ ހަވާލުވެ ހުރި އަހުމަދު އަމީޒް އެ މަގާމުން ވަކިކޮށްފައެވެ.

މި މެޗާ މެދު އެފްއޭމްއިން ގޮތެއް ނިންމުމާ ވިދިގެން މާޒިޔާއަށް ވަނީ މެޗުން މޮޅުވުމުން ތިން ޕޮއިންޓާ ފައިދާ ތިން ގޯލު ލިބިފައެވެ.