"ބްރިޖް ލިޓްލް ލަރނާރސް ޕްރީސްކޫލުގެ ފެއަރ 2017" މިއަދު ފަށާނެއެވެ.
ހުކުރު ދުވަހުގެ ހަވީރު 4.00 އިން ރޭގަނޑު 11:00 އަށް އާރޓިފިޝަލް ބީޗްގައި ކުރިއަށްދާ މިފެއަރއަކީ ބްރިޖް ލިޓްލް ލަރނާރސް ޕްރީ ސްކޫލުގެ ޕީޓީއޭ އިން ކުރިއަށް ގެންދާ ފެއަރއެކެވެ.
މިފެއަރގެ މައިގަނޑު މަޤްޞަދަކީ ދަރިވަރުންގެ އުނގެނުމުގެ އެކިއެކި ހަރަކާތްތައް ރާވައި ކުރިއަށް ގެންދިއުމަށް ފައިސާ ހޯދުމާއި އަދި ޕްރީސްކޫލަކީ ތަޢުލީމީ ޙަޔާތުގެ ބިންގާ އަޅާ މަރުހަލާގެ ދަރިވަރުންނަށް ޚިދުމަތްފޯރުކޮށްދޭ މާހައުލު ކަމުގައިވާތީ، ކިޔަވައިދިނުމަށް ބޭނުންވާ ޒަމާނީ ވަޞީލަތްތައް ހޯދުމުގެ އިތުރުން، ދަރިވަރުންގެ އިޖުތިމާޢީ ހަރަކާތްތަކާއި ފިޒިކަލް ހަރަކާތްތައް ތަރައްޤީކުރުމަށް ބޭނުންވާ ވަޞީލަތްތައް ހޯދުމެވެ.
މި ފެއަރގައި ކުޑަކުދިން ޝައުޤުވެރިވާފަދަ ގިނަ ހަރަކާތެއް ކުރިއަށް ގެންދާގޮތަށްވަނީ ހަމަޖެހިފައެވެ. މި ހަރަކާތްތައް ރާވާފައިވަނީ ކްލާސްތަކުގެ މެދުގައި ވާދަވެރިކަމުގެ ރޫހެއްގައި، އެކިއެކި ސްޓޯލްތަކުގައި އެކި ހަރަކާތް ކުރިއަށް ގެންދާގޮތަށެވެ.
މިގޮތުން ކުރިޔަށް ގެންދާ ހަރަކާތްތަކުގެ ތެރޭގައި ފޭސް ޕެއިންޓިންގ، ހީނާފަތްއެޅުން، އޮރިގާމީ، ގާރލޭންޑް މޭކިންގ ، ކުލަޖެއްސުން، އަދި ބައުންސިންގ ކާސްލް ފަދަ ހަރަކާތްތައް ހިމެނެއެވެ.
މީގެއިތުރުން ޕިން ދަ ޓެއިލް، ފިޝިންގ، ގޮލްފް ގޭމް، ސްކޫޓީ ރޭސް، ބެލޫން އާރޓް، ކިޑްސް ޕްލޭ ކޯނަރ ފަދަ ކޮންމެ ހަރަކާތަކީ ވެސް ތުއްތު ކުދިންނަށް އަމާޒުކޮށް މިފެއާގައި ކުރިޔަށް ގެންދިއުމަށް ނިންމާފައިވާ ހަރަކާތްތަކެކެވެ.
މިއިން ކޮންމެ ހަރަކާތަކީވެސް، ހަރަކާތުގައި ބައިވެރިވާ ތުއްތު ކުދިންނަށް އިނާމު ކަނޑައެޅިފައިވާ ހަރަކާތްތަކެއް ކަމަށާއި މީގެއިތުރުން ކުޑަކުދިންނަށް ތައްޔާރުކުރެވިފައިވާ ޕޮކްޕޯން ވިއްކުމުގެ އިތުރުން، ކެންޓީނުގެ ޚިދުމަތާއި ޖަމްބްލް ސޭލްވެސް މި ފެއާގައި ކުރިޔަށް ދާނެއެވެ.
މިފަހަރުގެ ފެއަރގެ ޚާއްޞަ ކަންތައްތަކުގެ ތެރޭގައި 1438 ބޮޑުބެރު ގްރޫޕާއެކު، އޮއިވަރު ބޭންޑް އަދި ހުނަރުވެރި ޒުވާން ފަންނާނުންގެ ލަވަކިޔުން ވެސް ކުރިޔަށް ދާނެއެވެ. މިގޮތުން މި ޝޯގައި އިޝާން، އަމަން، ޝަމްވީލް، ހަމްދާން މުސީ އަދި ޖައިޝާ ފަދަ އެތައް ލަވަކިޔުންތެރިންނެއް ފެނިގެންދާނެއެވެ. މީގެއިތުރުން ތުއްތުކުދިންނަށް ޚާއްޞަކޮށް ތައްޔާރުކޮށްފައިވާ ފޮތްތަކެއް ވެސް ނެރެދިނުން މި ފެއަރގައި އޮންނާނެއެވެ.
މި ފެއަރގައި ބައިވެރިވުމަށް 5 ކޫޕަން ގަތުމުން ނަޞީބު ކޫޕަން ލިބޭގޮތަށް ހަމަޖެހިފައިވާއިރު، ކެންޓީނުން 25 ރުފިޔާއަށް ވުރެ މަތީ ޢަދަދަކަށް ތަކެތި ގަތުމުން ވެސް ނަޞީބު ކޫޕަނެއް ލިބޭނެއެވެ. ނަޞީބު ނަންބަރު ނެގުން ދެ ގަޑިއަކަށް ބަހާލާފައިވާއިރު ހަވީރު 5:45 އާއި ރޭގަނޑު 21:30 ގައި ވެސް ނަސީބު ނަންބަރު ނަގާގޮތަށް ވަނީ ހަމަޖެހިފައެވެ.
ނަޞީބުވެރި ފަރާތްތަކަށް ކަނޑައަޅާފައިވާ އިނާމްތަކުގެ ތެރޭގައި.
- 2 އެއަރ ޓިކެޓް - ކޮރެއަން އެއަރ އިން ސްރީލަންކާ އަށް
- 1 އެއަރ ޓިކެޓް މޯލްޑިވިއަންގެ ފަރާތުން
- ހުދުރަންފުށި ރިޒޯޓުގެ ފަރާތުން 2 މީހެއްގެ 2 ރޭގެ ހުރުން
- އެރިޔަދޫ ރިޒޯޓުގެ ފަރާތުން ހުށަހަޅާފައިވާ 2 މީހެއްގެ 1 ރޭގެ ހުރުން (2 ކުދިންނާއެކު)
- ޝައިން ސެލޫންގެ ފަރާތުން 1000 ރުފިޔާގެ 2 ގިފްޓް ވައުޗަރ
- ބްރީތު ލައިފްގެ ފަރާތުން 1 މަސްދުވަހުގެ ފިޓްނަސް ޕެކޭޖެއް
- މާޑު ގަރާޖުން 1200 ރުފިޔާގެ 1 ސައިކަލް ސަރވިސް
- ބާސެލޯސްގެ ފަރާތުން 4 ފުޑް ވައުޗަރ (4 މީހުންގެ ގްރޫޕް)
- ސީ ހައުސްގެ ފަރާތުން 1 ފުޑް ވައުޗަރ 2 މީހަކަށް
- މޫވީ ލިންކުން 500 ރުފިޔާގެ 1 ގިފްޓް ވައުޗަރ
މި ފެއަރގައި އިސްކޮށް ހަރަކާތެރިވަނީ ބީ.އެލް.އެލް ގެ ޕީޓީއޭ ގެ ހިންގާ ކޮމެޓީ އާއި ސްކޫލުގެ ބެލެނިވެރިންނެވެ.
