ފްލެޓް ލިބޭ މީހުންގެ ލިސްޓްގައި އެއް ފޯމް ނަމްބަރުތަކެއް ތަކުރާރުވެފައި!

ހައުސިންގ މިނިސްޓްރީން ފްލެޓް ލިބޭ މީހުން ކަމަށްބުނެ، ނަން ސިއްރު ކުރުމަށްފަހު އާއްމުކޮށްފައިވާ ލިސްޓްގައި ބައެއް ނަމްބަރުތައް ތަކުރާރު ވެފައިވާ މައްސަލަ ފެންމަތިވެއްޖެއެވެ.

ހައުސިން މިނިސްޓްރީން މި ހަފްތާގައި ވަނީ މާލެއާއި ހަތަރު އަތޮޅެއްގައި އިމާރާރާތް ކޮށްފައިވާ ފްލެޓްތަކުގެ ތެރެއިން ފްލެޓް ލިބޭ މީހުންގެ ނަންތައް ސިއްރު ކުރުމަށްފަހު، ފްލެޓަށް އެދޭ ފޯމް ނަމްބަރު ހިމަނައިގެން ލިސްޓް އާއްމު ކޮށްފައެވެ.

އެގޮތުން މާލެއިން ފްލެޓް ލިބޭ ކަމަށް ބުނާ ލިސްޓްގައި ބައެއް ފޯމް ނަމްބަރުތައް ތަކުރާރުވެފައިވާ ކަމަށާއި އަދި ނަން ނުހިމަނާ ހަމަ އެކަނި ފްލެޓަށް އެދުނު ފޯމް ނަމްބަރު ހިމަނައިގެން ލިސްޓް އާއްމުކޮށްފައިވާތީ ގިނަ ރައްޔިތުން ދަނީ އެކަމާ ކަންބޮޑުވުން ފާޅު ކުރަމުންނެވެ.

ހަތަރު ރަށަކުން ފްލެޓް ލިބުނު ކަމަށްބުނާ މީހުންގެ ލިސްޓްތައް ހައުސިންގ މިނިސްޓްރީން ބުރާސްފަތި ދުވަހު އާއްމުކޮށްފައިވާއިރު މި ހުރިހާ ލިސްޓްތަކެއްގައިވެސް ބައެއް ފޯމް ނަމްބަރުތައް ތަކުރާރުވެފައިވެއެވެ.

ބުރާސްފަތި ދުވަހު ހައުސިންގ މިނިސްޓްރީން ވަނީ ގދ. ގައްދޫ އާއި ގދ.ހޯޑެއްދޫއާއި ގއ.ވިލިނގިލި އަދި،ހއ. ދިއްދޫގެ ހައުސިން ޔުނިޓްތައް ލިބޭ ފަރާތްތަކުގެ ވަގުތީ ލިސްޓް އާއްމުކޮށްފައެވެ. އެގޮތުން ހއ. ދިއްދޫގެ ވަގުތީ ލިސްޓުގައި ހިމެނެނީ ގެޓަގަރީ A އިން 124 މީހުންގެ ފޯމް ނަންބަރާއި ގެޓެގަރީ B އިން 14 މީހެއްގެ ފޯމު ނަންބަރެވެ. ދިއްދޫ ކައުންސިލުން ބުނީ އެލިސްޓްގައި އެއް ފޯމް ނަމްބަރެއް ދެ ފަހަރަށް ހިމަނާފައިވާ ކަމަށެވެ.

މީގެ އިތުރުން ދިއްދޫ ކައުންސިލުން ވަނީ އެރަށުން ފްލެޓް ލިބުނު ފަރާތްތަކުގެ ނަންތަކާއި ޕޮއިންޓް ލިބިފައިވާ ގޮތުގެ ތަފްސީލީ ލިސްޓެއް ހާމަ ކޮށްފައެވެ.