އަހުމަދިއްޔާ އާއި ވިލާ އެއްވަރު، ސީއެޗްއެސްއީ މާލެ އަށް ދެ ވަނަ މޮޅު

ރާއްޖޭގެ ފުޓުބޯޅަ އަށް 75 އަހަރު ފުރުން ފާހަގަ ކުރުމުގެ ގޮތުން، 19 އަހަރުން ދަށަށް ކުރިއަށް ގެންދާ ޑައިމަންޑް ޖުބިލީ އިންވިޓޭޝަނަލް މުބާރާތުގައި އަހުމަދިއްޔާ އިންޓަނޭޝަނަލް އިން ކުޅުނު ދެ ވަނަ މެޗު އެއްވަރުވީއިރު، ސީއެޗްއެސްއީ މާލެ އިން ކުޅުނު ދެ ވަނަ މެޗުން ވެސް މޮޅުވެއްޖެ އެވެ.

ހޯމަ ދުވަހުގެ ހަވީރު ގަލޮޅު ރަސްމީ ދަނޑުގައި އަހުމަދިއްޔާ އާއި ވިލާ އިންޓަނޭޝަނަލް ހައި ސްކޫލް ބައްދަލު ކުރި މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މެޗުގައި ވިލާ އަށް ލީޑު ނަގައިދިނީ އަޙުމަދު ލައިތު އައްބާސް އެވެ. އޭގެ ފަހުން އަހުމަދިއްޔާ އަށް ނަތީޖާ ހަމަހަމަ ކޮށްދިނީ އިބްރާހީމް އަވްސަމް ޢަބްދުﷲ އެވެ.

ހޯމަ ދުވަހުގެ ރޭ ސީއެޗްއެސްއީ ހުޅުމާލެއާ ދެކޮޅަށް ކުޅުނު މެޗު، ސީއެޗްއެސްއީ މާލެ އިން ކާމިޔާބު ކުރީ 7-1 އިންނެވެ. މެޗުގައި ސީއެޗްއެސްއީ މާލޭގެ ލަނޑުތައް ޖެހީ ނާޝިއު އަޙުމަދު ޝިހާމް، މުޙައްމަދު އާޔަން ޝާޒް، އިސްމާއީލް ޝާމިލް، އަޙުމަދު މިކްޔަން މުއީން އަދި މުޙައްމަދު ސާއިމް އިބްރާހީމް ފާއިޒް އެވެ. މީގެ ތެރެއިން އާޔަން އާއި، މިކްޔަލް ވަނީ ދެ ލަނޑު ޖަހައިފަ އެވެ. މެޗުގައި ސީއެޗްއެސްއީ ހުޅުމާލޭގެ ހަމައެކަނި ލަނޑު ޖެހީ އަޙުމަދު އާއިޝް އެވެ. 

ހަތަރު ޓީމުގެ މެދުގައި ކުރިއަށްދާ މުބާރާތުގެ ފައިނަލްގެ ޖާގަ ލިބެނީ، ކޮންމެ ޓީމެއް ކޮންމެ ޓީމަކާ ބައްދަލު ކުރުމަށް ފަހު، ތާވަލްގެ އެއް ވަނަ އާއި ދެ ވަނަ އަށް ދާ ޓީމު ތަކަށެވެ. ދެ މެޗުން ވެސް މޮޅުވެ މިވަގުތު އެންމެ ކުރީގައި އޮތީ ސީއެޗްއެސްއީ މާލެ އެވެ. ދެ ވަނައިގައި އަޙުމަދިއްޔާ އޮތްއިރު، ތިން ވަނައިގައި އޮތީ ވިލާ އެވެ. ދެ މެޗުން ވެސް ބަލިވި ސީއެޗްއެސްއީ ހުޅުމާލެ އޮތީ ހަތަރު ވަަނައިގަ އެވެ.