ފުރަތަމަ މޮޅު އަހުމަދިއްޔާ އާއި، ސީއެޗްއެސްއީ މާލެ އަށް

ރާއްޖޭގެ ފުޓުބޯޅަ އަށް 75 އަހަރު ފުރުން ފާހަގަ ކުރުމުގެ ގޮތުން، 19 އަހަރުން ދަށަށް ކުރިއަށް ގެންދާ ޑައިމަންޑް ޖުބިލީ އިންވިޓޭޝަނަލް މުބާރާތުގައި އަހުމަދިއްޔާ އިންޓަނޭޝަނަލް ސްކޫލް އާއި، ސީއެޗްއެސްއީ މާލެ ކުޅުނު ފުރަތަމަ މެޗުން މޮޅުވެއްޖެ އެވެ.

ހޮނިހިރު ދުވަހުގެ ހަވީރު އަހުމަދިއްޔާ ބައްދަލު ކޮށްފައި ވަނީ ސީއެޗްއެސްއީ ހުޅުމާލެއާ އެވެ. އެ މެޗު އަހުމަދިއްޔާ އިން ކާމިޔާބު ކޮށްފައި ވަނީ 6-0 ގެ ތަފާތު ބޮޑު ނަތީޖާ އަކުންނެވެ. މެޗުގައި އަހުމަދިއްޔާގެ ލަނޑުތައް ޖެހީ ހުސެއިން އާއިޝް ޢަބްދުލް ވާހިދު އާއި، މުޙައްމަދު ޒޮރޮން އަޔާޒް އާއި، އައްފާން ބިން އަޙުމަދު އަދި އަޙުމަދު އަކްލަމް ރަޝީދު އެވެ. މީގެ ތެރެއިން އަކްމަލް ވަނީ ދެ ލަނޑު ޖަހައިފަ އެވެ. އަދި އަނެއް ލަނޑަކީ ސީއެޗްއެސްއީ ހުޅުމާލާގެ މުޙައްމަދު މިޔާޒް އަޙުމަދު ރިޔާޒް އަތުން ބައި ކޮޅަށް ވަތް ލަނޑެކެވެ. 

ހޮނިހިރު ދުވަހުގެ ރޭ ވިލާ އިންޓަނޭޝަނަލް ހައި ސްކޫލްއާ ދެކޮޅަށް ކުޅުނު މެޗު ސީއެޗްއެސްއީ މާލެ އިން ކާމިޔާބު ކުރީ 2-1 އިންނެވެ. މެޗުގައި ސީއެޗްއެސްއީ މާލެ އަށް ލީޑު ލިބުނީ ވިލާގެ ޔޫސުފް ނާމިކް އަލީ ނަސީރު އަތުން ބައި ކޮޅަށް ވަތް ލަނޑުންނެވެ. އޭގެ ފަހުން އަޙުމަދު ލައިތު އައްބާސް ޖެހި ލަނޑުން ވިލާ އިން ވަނީ ނަތީޖާ ހަމަހަމަ ކޮށްފަ އެވެ. ވިލާ އަތުން ސީއެޗްއެސްއީ މާލެ މޮޅުވީ މުޙައްމަދު ސާއިމް އިބްރާހީމް ފާއިޒް ޖެހި ލަނޑުންނެވެ. 

ހަތަރު ޓީމުގެ މެދުގައި ކުރިއަށްދާ މުބާރާތުގެ ފައިނަލްގެ ޖާގަ ލިބެނީ، ކޮންމެ ޓީމެއް ކޮންމެ ޓީމަކާ ބައްދަލު ކުރުމަށް ފަހު، ތާވަލްގެ އެއް ވަނަ އާއި ދެ ވަނަ އަށް ދާ ޓީމު ތަކަށެވެ. މުބާރާތުގެ މެޗުތައް ދެން އޮންނާނީ ހޯމަ ދުވަހު އެވެ. އެ ދުވަހުގެ ހަވީރު ބައްދަލު ކުރާނީ އަހުމަދިއްޔާ އާއި ވިލާ އެވެ. ހޯމަ ދުވަހުގެ ރޭ ބައްދަލު ކުރާނީ ސީއެޗްއެސްއީ ހުޅުމާލެ އާއި، ސީއެޗްއެސްއީ މާލެ އެވެ.