އިންޑިއާ އިން ރާއްޖެ އަށް ދޭ އެހީ މަދުކޮށްފި
އިންޑިއާގެ 2026-27 ވަނަ އަހަރުގެ ބަޖެޓުގައި ބަންގްލަދޭޝް، ރާއްޖެ އަދި މިޔަންމާ އަށް ދޭ އެހީ މަދުކޮށްފައިވާއިރު، ބޫޓާނަށް ދޭ އެހީ ވަރަށް ބޮޑަށް އިތުރުކޮށްފައިވޭ. ބަންގްލަދޭޝް އަށް ދޭ އެހީ 120 ކްރޯޑުން 60 ކްރޯޑަށް ވަނީ މަދުކޮށްފައި. ރާއްޖެ އަށް ދޭ އެހީ 600 ކުރޯޑުން 550 ކްރޯޑަށް މަދުކޮށްފައިވާއިރު، ބޫޓާނަށް 2،288.55 ކްރޯޑް ރުޕީސް ކަނޑައަޅާފައިވޭ.
އިންޑިއާގެ މަރުކަޒީ ބަޖެޓް ހުށަހެޅުއްވުމަށްޓަކައި، އެ ގައުމުގެ ފިނޭންސް މިނިސްޓަރު ނިރްމަލާ ސީތާރާމަން އާއި ފިނޭންސް މިނިސްޓްރީގެ އިސް ބޭފުޅުން ނިއުދިއްލީގައި ހުންނަ އެ މިނިސްޓްރީން ނުކުމެވަޑައިގެން ޕާލަމެންޓަށް ވަޑައިގަންނަވަނީ - ފެބްރުއަރީ 1، 2025. | ގެޓީ އިމޭޖަސް
އިންޑިއާ އިން ދިވެހިރާއްޖެ އަށް ދޭ އެހީ މަދުކޮށްފިކަން އިންޑިއާ ސަރުކާރުން ހުށަހެޅި އައު އަހަރުގެ ބަޖެޓުން ހާމަ ވެއްޖެ އެވެ.
އެހީ މަދު ކުރި ގައުމުތަކުގެ ތެރޭގައި ރާއްޖޭގެ އިތުރުން ބަންގްލަދޭޝް އާއި މިޔަންމާ ހިމެނޭ އިރު، ބޫޓާނަށް ދޭ އެހީ ވަނީ ބަޖެޓުގައި އިތުރު ކޮށްފަ އެވެ.
އިންޑިއާ ސަރުކާރުގެ 2026-27 ވަނަ އަހަރުގެ މަރުކަޒީ ބަޖެޓުގައި، ބަންގްލަދޭޝް އަށް ދޭ މާލީ އެހީ ވަރަށް ބޮޑަށް މަދުކޮށްފައިވާކަން ފާހަގަ ކުރެވެ އެވެ. މިދިޔަ އަހަރު ބަންގްލަދޭޝް އަށް 120 ކްރޯޑް ރުޕީސް (ގާތްގަނޑަކަށް 13 މިލިއަން ޑޮލަރު) ކަނޑައެޅި ނަމަވެސް، މިއަހަރު ކަނޑައަޅާފައިވަނީ އެންމެ 60 ކްރޯޑް ރުޕީސް (6.5 މިލިއަން ޑޮލަރު) އެވެ. މިއީ އިންޑިއާ އިން ބަންގްލަދޭޝް އަށް ދޭ އެހީ ދެބައިކުޅަ އެއްބައި ދަށްވުމެކެވެ.
މި ބަދަލު މި އައީ އިންޑިއާ އާއި ބަންގްލަދޭޝްއާ ދެމެދު އޮތް ގުޅުން ވަރަށް ބޮޑަށް ގޯސްވެފައިވާ ދަނޑިވަޅެއްގަ އެވެ. 2024 ވަނަ އަހަރު ޝައިޚް ހަސީނާގެ ސަރުކާރު ވެއްޓުމަށްފަހު، ބަންގްލަދޭޝްއިން ވަނީ ޕާކިސްތާނާއެކު އޮންނަ ގުޅުން ރަނގަޅު ކުރަން ފަށާފަ އެވެ.
އިންޑިއާއިން އެހީ ކަނޑައެޅި މައިގަނޑު ގައުމުތައް
ދިވެހިރާއްޖެ އަށް އިންޑިއާއިން މިއަހަރު ކަނޑައަޅާފައިވަނީ 550 ކްރޯޑް ރުޕީސް (ގާތްގަނޑަކަށް 60 މިލިއަން ޑޮލަރު) އެވެ. މިއީ މިދިޔަ އަހަރު ކަނޑައަޅާފައި އޮތް 600 ކުރޯޑް ރުޕީސް އާ އަޅާބަލާއިރު މަދު އަދަދެއްކަން ފާހަގަ ކުރެވެ އެވެ. މިޔަންމާ އަށް 300 ކްރޯޑް ރުޕީސް ކަނޑައަޅާފައިވާއިރު، އެއީވެސް ކުރިއަށްވުރެ މަދު އަދަދެކެވެ. މިއާ ހިލާފަށް، ބޫޓާނަށް ވަނީ 2،288.55 ކްރޯޑް ރުޕީސް (249.5 މިލިއަން ޑޮލަރު) ކަނޑައަޅާފަ އެވެ. މިއީ މިދިޔަ އަހަރަށްވުރެ ގާތްގަނޑަކަށް 138 ކްރޯޑް ރުޕީސް އިތުރު އަދަދެކެވެ.
އިންޑިއާގެ ބަޖެޓުގައި އެފްރިކާގެ ގައުމުތަކަށް 2.25 ބިލިއަން ރުޕީސް، ލެޓިން އެމެރިކާގެ ގައުމުތަކަށް 1.2 ބިލިއަން ރުޕީސް، އަދި ޔޫރޭޝިއާ ސަރަހައްދުގެ ގައުމުތަކަށް 3.8 ބިލިއަން ރުޕީސް ވަނީ ކަނޑައަޅާފަ އެވެ. ނަމަވެސް، މި ސަރަހައްދުތަކުގައި ހިމެނޭ ވަކިވަކި ގައުމުތަކަށް ދޭނެ ފައިސާގެ މިންވަރެއް އަދި ސާފެއް ނުވެއެވެ.
އިންޑިއާ ސަރުކާރުން 2026-27 ވަނަ އަހަރަށް އެ ގައުމުގެ ހާރިޖީ ވުޒާރާއަށް ޖުމްލަ 22،118 ކްރޯޑް ރުޕީސް (2.6 ބިލިއަން ޑޮލަރު) ގެ ބަޖެޓެއް ވަނީ ކަނޑައަޅާފައެވެ. މީގެ ތެރޭގައި އެ ވުޒާރާގެ އިދާރީ ހަރަދުތަކާއި އެހެނިހެން މުހިންމު މަސައްކަތްތަކަށް ހިނގާނެ ހަރަދުތައް ހިމެނެއެވެ. މިއީ މިދިޔަ އަހަރާ އަޅާބަލާއިރު ކުޑަ އިތުރުވުމެކެވެ.
