ހަކަތައިގެ ދާއިރާއިން ބޫޓާނަށް ދޭ އެހީތެރިކަން އިތުރުކުރުމަށް އިންޑިއާއިން ނިންމައިފި އެވެ.

އިންޑިއާގެ ބޮޑުވަޒީރު ނަރެންދްރަ މޯދީ ބޫޓާނަށް ކުރައްވަމުން ގެންދަވާ ދަތުރުފުޅުގައި އަންގާރަ ދުވަހު ވަނީ އެޤައުމުގައި އިންޑިއާގެ އެހީގައި ބިނާކުރި 1020 މެގަވޮޓްގެ ހައިޑްރޯ އިލެކްޓްރިކް ޕަވަރ ޕްރޮޖެކްޓް އިފްތިތާޙްކޮށްފައެވެ. މިއީ އިންޑިއާގެ އެހީތެރިކަމާއެކު އެޤައުމުގައި ހިންގި މިފަދަ 5 ވަނަ ޕްރޮޖެކްޓެވެ. އިންޑިއާގެ އެހީގައި ހިންގި ހައިޑްރޯ އިލެކްޓްރިކް ޕްރޮޖެކްޓްތަކުން މިހާރު 3000 މެގަވޮޓްގެ ހަކަތަ ބޫޓާނުން އުފައްދައެވެ. އަދި އިއްޔެ އިފްތިތާހުކުރި ޕްރޮޖެކްޓާއެކު ބޫޓާނުގައި ހައިޑްރޯޕަވަރ ޖެނެރޭޓް ކުރުމުގެ ޤާބިލްކަން 40 އިންސައްތަ އިތުރުވެގެން ދިޔަކަމަށް މޯދީ ވިދާޅުވި އެވެ.

މީގެ އިތުރުން 455 މިލިއަން އެމެރިކާ ޑޮލަރުގެ ކްރެޑިޓް ލައިނެއްވެސް އިންޑިއާއިން ބޫޓާނަށް ހުޅުވައިދިނެވެ. މި ކްރެޑިޓް ފެސިލިޓީވެސް ބޭނުންކުރާނީ ބޫޓާނުގެ ހަކަތައިގެ ދާއިރާ ތަރައްޤީކުރުމަށެވެ.

މޯދީ ވިދާޅުވީ އިންޑިއާ އާއި ބޫޓާނުގެ ގާތް ގުޅުމަކީ ސަރަހައްދީ ގުޅުންތަކުގެ މިސާލެއްކަމަށެވެ. އެގޮތުން ދެޤައުމުންވެސް ތަރައްޤީ ހޯދަމުން އަންނައިރު، ހަކަތައިގެ ދާއިރާއިން ދެޤައުމުގެ ގުޅުން ބަދަހިކޮށް އެއްބާރުލުން ދިނުމަކީ އޭގެ ސަބަބުން ދެޤައުމުގެވެސް ތަރައްޤީގެ ދުވެލި ހަލުވި ވެގެންދާ ސަބަބެއް ކަމަށް މޯދީ ވިދާޅުވި އެވެ.

ބޫޓާނާއެކު ގުޅުން ބަދަހިކުރުމަށް ޗައިނާ އާއި އިންޑިއާއިން ވާދަކުރަމުން އަންނައިރު، ބޫޓާނާއި ޗައިނާ އާއި ދެމެދު ސަރަހައްދީ ރޮނގުގެ މައްސަލައިގައި އުފެދިފައިވާ ދެބަސްވުންތަކުގެ ސަބަބުން އިންޑިއާ އަށް އެކަމުގެ ފައިދާ ލިބެ އެވެ.