ރައީސް ސޯލިހު ގެ ސަރުކާރުން ހަމަޖައްސައިދިން ފަންޑު މިސަރުކާރުން ނުދީގެން، މަސައްކަތް ނިމިފައިވާ ފޯކައިދޫ ކޮމިއުނިޓީ ސެންޓަރު ނުހުޅުވިފަ!
ށ. ފޯކައިދޫ ކޮމިއުނިޓީ ސެންޓަރުގެ މަސައްކަތް ކުރީގެ ސަރުކާރުގައި ނިމި، ފަރުނީޗަރާއި އިކުއިޕްމަންޓަށް އިންޑިއާގެ ފަންޑު ހަމަޖެހިފައި އޮތަސް މި ސަރުކާރުން އެ ފަންޑު ދެ އަހަރުވީއިރު ކައުންސިލަށް ޖަމާނުކުރާކަމަށް ކައުންސިލް ރައީސް އަހުމަދު އާސިފް ވިދާޅުވެއްޖެއެވެ. މިދިޔަ ސަރުކާރުގެ ފަހުކޮޅު އެތަނަށް ބޭނުންވާ ފަރުނީޗަރު އަދި އިކުއިޕްމަންޓް ވެސް ވަނީ ހަމަޖެހިފަ.
ރައީސް ސޯލިހު ގެ ސަރުކާރުން ށ. ފޯކައިދޫ ގައި ތަރައްގީކޮށް ނިންމާފައިވާ ކޮމިއުނިޓީ ސެންޓަރު
ކުރީގެ ރައީސް އިބްރާހިމް މުހައްމަދު ސޯލިހު ގެ ސަރުކާރުން ށ. ފޯކައިދޫ ގައި ތަރައްގީކޮށް ނިންމާފައިވާ ކޮމިއުނިޓީ ސެންޓަރު ރަސްމީކޮށް ނުހުޅުވި ހުރީ، ހަމަޖެހިފައި އޮތް ފަންޑު މި ސަރުކާރުން ނުދީގެން ކަމަށް އެރަށު ކައުންސިލް ގެ ރައީސް އަހުމަދު އާސިފް ވިދާޅުވެއްޖެ އެވެ.
ރާއްޖެ އެމްވީ އާއި ވާހަކަ ދައްކަވަމުން އާސިފް ވިދާޅުވީ، ރައީސް ސޯލިހު ގެ ސަރުކާރުގައި ފޯކައިދޫ ކޮމިއުނީޓީ ސެންޓަރުގެ މަސައްކަތް ވަނީ އެއްކޮށް ނިމިފައި ކަމަށާއި އަދި މިދިޔަ ސަރުކާރުގެ ފަހުކޮޅު އެތަނަށް ބޭނުންވާ ފަރުނީޗަރު އަދި އިކުއިޕްމަންޓް ވެސް ވަނީ ހަމަޖެހިފަ ކަމަށެވެ. އާސިފް ވިދާޅުވީ އޭރުގެ އުސޫލުތައް އޮންނަ ގޮތުން ކައުންސިލް އަށް ފައިސާ ލިބެނީ ދައުލަތު ގެ ކަމާގުޅުންހުރި މިނިސްޓްރީތައް މެދުވެރިކޮށް ކަމަށެވެ. އަދި އެ އެފަންޑަކީ އިންޑިއާ ސަރުކާރު ހަމަޖައްސައިދީފައިވާ ފަންޑެއް ކަން ފާހަގަ ކުރައްވާ އާސިފް ވިދާޅުވީ މި ސަރުކާރަށް ދެ އަހަރު ވެގެން ދިޔައިރު ވެސް ފައިސާ ނުލިބޭ ކަމަށެވެ.
އަޅުގަނޑުމެންނަށް ފޮރިން މިނިސްޓްރީއިން އަންގާފަ އޮތް އެ ފައިސާ ޖަމާކުރަން ފޮނުވާފައި އޮތް ކަމަށް. އޭރުގެ ޔޫތު މިނިސްޓްރީ އަށް ޖަމާކުރަން ފޮނުވާފަ އޮތް ކަމަށް ދެން ވެރިކަން ބަދަލުވެ ދެ އަހަރުވެގެން ދިޔައިރުގައި އަޅުގަނޑުމެންނަށް މިއުޅެނީ މިތަނަށް ހަމަޖެހުން ފަންޑު ނުލިބިގެން، މިތާގެ ފަރުނީޗަރު ނުހޯދިގެން މިއުޅެނީ.ފޯކައިދޫ ކައުންސިލް ގެ ރައީސް އަހުމަދު އާސިފް
މީގެ އިތުރުން އާސިފް ވިދާޅުވި ކައުންސިލް އިން މެނޭޖް ކޮށްގެން ކޮމިއުނިޓީ ސެންޓަރުގައި ކޮންމެސް ވަރަކަށް ހިދުމަތްތަކެއް ދޭ ކަމަށެވެ. އެހެން ނަމަވެސް އެތަނަށް ބޭނުންވާ ފަރުނީޗަރާއި އެހެނިހެން ކަންކަން ނުނިމި ހުރީ އެ ފަންޑު ނުލިބިގެން ކަމަށް އާސިފް ވިދާޅުވި އެވެ.
ފާހަގަކޮށްލެވޭ ގޮތުގައި ފޯކައިދޫ ގެ މި ޕްރޮޖެކްޓް އަކީ އެހެން ޕްރޮޖެކްޓްތަކާއި ހިލާފަށް މަސައްކަތް ނިމި ފަންޑު ވެސް ހަމަ ޖެހިފައިވާ ޕްރޮޖެކްޓެކެވެ. އަދި އިންޑިއާ ސަރުކާރުގެ އެހީގަ ހަމަޖެހިފައިވާ ފަންޑު، 2 އަހަރު ވީއިރު ފޯކައިދޫ ކައުންސިލް އަށް ޖަމާނުކުރާކަން ވެސް ފާހަގަކޮށްލެވެ އެވެ.
