ފެނަކައިގެ ކުރީގެ އެމްޑީ ސައީދަށް ބޭސްފަރުވާ ކުރުމުގެ ފުރުސަތު ނުދޭތީ އާއިލާ އިން ކަންބޮޑުވުން ފާޅުކޮށްފި
ޑޮކްޓަރުންގެ ލަފާގައި ސައީދަކީ އެކަހެރި ބަންދުގައި ބެހެއްޓޭނެ ހާލަތެއްގައި ހުރި މީހެއް ނޫން ކަމަށް ބުނެފައިވާއިރު، ފަރުވާއަށް ހުރަސް އަޅަމުން ދިއުމުން އާއިލާއިން ވަނީ ކަންބޮޑުވުން ފާޅުކޮށްފަ. ސިއްހީ ހާލަތަށް ރިއާޔަތްކޮށް ބޭސްފަރުވާގެ ފުރުސަތު ނުދިނުމަކީ އިންސާނިއްޔަތާ ޚިލާފު ކަމެއް ކަމަށް ކުރީގެ ފޮރިން މިނިސްޓަރު ޝާހިދު ވެސް ވަނީ ވިދާޅުވެފަ.
ފެނަކައިގެ ކުރީގެ އެމްޑީ އަހުމަދު ސަޢީދު މުހައްމަދު | ފެނަކަ ކޯޕަރޭޝަން
ފެނަކަ ކޯޕަރޭޝަންގެ ކުރީގެ މެނޭޖިންގ ޑައިރެކްޓަރ އަހުމަދު ސަޢީދު މުހައްމަދުގެ ސިއްހީ ހާލަތު ގޯސްވަމުންދާއިރު، އޭނާއަށް ބޭނުންވާ އެކަށީގެންވާ ބޭސްފަރުވާގެ ފުރުސަތު ފަހިކޮށްދީފައި ނުވާތީ އާއިލާ އިން ކަންބޮޑުވުން ފާޅުކޮށްފި އެވެ.
ރާއްޖެއެމްވީ އާ ވާހަކަ ދައްކަމުން ސައީދުގެ އާއިލާގެ ފަރާތުން ބުނީ އަސާސީ ބޭސްފަރުވާގެ ހައްގަކީ ކޮންމެ އިންސާނަކަށްމެ ލިބިދޭންޖެހޭ ހައްގަކަށް ވާއިރު، ސިއްހީ ހާލަތަށް ރިއާޔަތް ކޮށް ސައީދަށް ބޭނުންވާ ފަރުވާގެ ފުރުސަތު ދިނުމަށް ގޮވާލާ ކަމަށެވެ.
ސައީދުގެ ސިއްޚީ ހާލަތާ މެދު ކަންބޮޑުވުން ފާޅުކޮށް އާއިލާގެ ފަރާތުން އިތުރަށް ބުނީ އިންސާނެއްގެ ދިރިހުރުމުގެ ޙައްޤަށް އުނިކަން އަންނަ ގޮތަށް ރައީސުލްޖުމްހޫރިއްޔާގެ ބާރުތައް ބޭނުންކުރުމަކީ ބަލައިގަނެވޭނެ ކަމެއް ނޫން ކަމަށެވެ.
ސައީދުގެ ސިއްހީ އެސެސްމެންޓްތަކުން، އޭނާއަކީ ޖަލުގެ އެކަހެރި ބަންދެއްގައި ބެހެއްޓޭނެ ފަދަ ސިއްހީ ހާލަތެއްގައި ހުރި މީހެއް ނޫންކަމާއި، އޭނާގެ ފުރާނަ އަށް ނުރައްކާވެދާނެކަން ސާފުކޮށް އެނގެން އޮތްއިރު ވެސް، ބޭސްފަރުވާ އަށް ލުއިތަކެއް ދިނުމަށް އިންކާރު ކުރުމަކީ ގަސްތުގައި ދެވޭ އަނިޔާއެއް ކަމަށް އާއިލާ އިން ދަނީ ބުނަމުންނެވެ.
މިކަމުގައި ހިއުމަން ރައިޓްސް ކޮމިޝަނާއި ކަމާބެހޭ ދައުލަތުގެ މުއައްސަސާތަކުން ޒިންމާދާރު ކަމާއެކު ފިޔަވަޅު އެޅުމަށް ވެސް އާއިލާ އިން ވަނީ ގޮވާލާފަ އެވެ.
މިކަމާ ގުޅޭގޮތުން ކުރީގެ ފޮރިން މިނިސްޓަރު އަދި އެމްޑީޕީގެ ރައީސް އަބްދުﷲ ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވީ، ސައީދަކީ ހިތުގެ ބަލިމީހަކަށްވެފައި، އޭނާއަށް ބޭނުންވާ ބޭސްފަރުވާ ރާއްޖެއިން ލިބެން ނެތް ކަމަށެވެ. ނަމަވެސް، އެ ފަރުވާ ހޯދުމަށް ރާއްޖެއިން ބޭރަށް ދިއުމުގެ ފުރުސަތުތަކަށް ތަކުރާރުކޮށް ހުރަސްއަޅަމުން ދިއުމަކީ އިންސާނިއްޔަތާ ޚިލާފު، އަދި އެއްވެސް ގޮތަކަށް ބަލައިގަނެވޭނެ ކަމެއް ނޫން ކަމަށް ޝާހިދު ފާހަގަކުރެއްވި އެވެ.
ސައީދުގެ ސިއްހީ ހާލަތާ ގުޅޭގޮތުން ޑޮކްޓަރުން ދެއްވާފައިވާ ލަފާގައި، އޭނާއަކީ ޖަލުގައި އެކަހެރިކޮށް ބެހެއްޓޭ ފަދަ ސިއްހީ ހާލަތެއްގައި ހުރި މީހެއް ނޫން ކަމަށް ބުނެފަވީ ނަމަވެސް، އެ ފުރުސަތުތައް ބަންދުކޮށް، ބޭސްފަރުވާގެ ހައްގުން މަހުރޫމް ކުރަމުންދާ ދިއުމަކީ ކަންބޮޑުވާ ކަމެއް ކަމަށެވެ.
ޝާހިދުގެ ޕޯސްޓުގައި އިތުރަށް ވިދާޅުވީ، ދައުލަތުން ރައްޔިތުންނާ މެދު އަމަލުކުރަންވާނީ އިންސާފުވެރިކަމާއި އިންސާނިއްޔަތުކަން އިސްކޮށްގެން ކަމަށެވެ.
