އޮގަސްޓު މަހު މީރާއަށް 1 ބިލިއަން ރުފިޔާ ލިބިއްޖެ
ޖުމުލަ 10.9 ބިލިއަން ރުފިޔާ ލިބިފައިވޭ
މޯލްޑިވްސް އިންލަންޑް ރެވެނިއު އޮތޯރިޓީ
ފާއިތުވި އޮގަސްޓު މަހު މީރާއަށް 1 ބިލިއަން ރުފިޔާ ބަލައިގެންފައިވާ ކަމަށް އެ އޮތޯރިޓީން ހާމަކޮށްފިއެވެ.
މި ޢަދަދާއެކު މި އަހަރުގެ މިހާތަނަށް މީރާއަށް ބަލައިގަތް އާމްދަނީގެ ޖުމުލަ ވަނީ 10.9 ބިލިއަން ރުފިޔާއަށް އަރާފައެވެ.
މީގެ ތެރެއިން އެންމެ ގިނަ އާމްދަނީއެއް ލިބިފައި ވަނީ ޖީ.އެސް.ޓީ އިންނެވެ. އެއީ އޮގަސްޓު މަހު ލިބުނު ޖުމުލަ އާމްދަނީގެ 46.9 އިންސައްތަ ނުވަތަ 469.4 މިލިއަން ރުފިޔާ އެވެ.
ދެން އެންމެ ބޮޑު އާމްދަނީއެއް ލިބިފައިވަނީ ލޭންޑް އެކުއިސިޝަން އެންޑް ކޮންވާޝަން ފީ (16.2 އިންސައްތަ ނުވަތަ 161.8 މިލިއަން ރުފިޔާ) އިންނެވެ.
މީގެ އިތުރުން، ބިޒްނަސް ޕްރޮފިޓް ޓެކްސް (12.7 އިންސައްތަ ނުވަތަ 126.9 މިލިއަން ރުފިޔާ)، ގްރީން ޓެކްސް ( 5.2 އިންސައްތަ ނުވަތަ 52.2 މިލިއަން ރުފިޔާ) އަދި އެއަރޕޯޓު ސަރވިސް ޗާޖް އިން (4.4 އިންސައްތަ ނުވަތަ 44.4 މިލިއަން ރުފިޔާ) ލިބިފައިވާކަން ތަފާސް ހިސާބުތަކުން ދައްކައެވެ.
އޮގަސްޓު 2017 ގައި މީރާއަށް ބަލައިގަތް އާމްދަނީގެ ތެރޭގައި 39.7 މިލިއަން އެމެރިކާ ޑޮލަރު ހިމެނޭ ކަމަށް ވެސް މީރާއިން ބުންޏެވެ.
