ޓޯކިޔޯގެ ޓޮޔޮސޫ މަސް މާރުކޭޓުގައި ކަންނެއްޔެއް 3.2 މިލިއަން ޑޮލަރަށް ވިއްކާލައިފި

ޓޯކިޔޯގެ ޓޮޔޯސޫ މަސް މާރުކޭޓުގައި ބޮޑު ނޫ އުރަހަ ކަންނެއްޔެއް 3.2 މިލިއަން ޑޮލަރަށް ނީލަމުގައި ވިއްކާލައިފި އެވެ.

އަހަރުގެ ފުރަތަމަ ނީލަމުގައި ހޯމަ ދުވަހު، ވިއްކާލި މިކަންނެލީގެ ބަދުދަނުގައި 243 ކިލޯ ހުއްޓެވެ. ނީލަމުން ކަންނެލި ގަތީ ކިޔޮމޫރާ ކޯޕް އިންނެވެ. މި ކުންފުންޏަކީ މަޝްހޫރު ސުޝީ ޗެއިން ސުޝީ ޒަންމާއީގެ އޮޕަރޭޓަރެވެ. މި ކުންފުނީގެ ގިނަ އައުޓްލެޓްތައް ޖަޕާނުގެ އިތުރުން އެހެން ގައުމުތަކުގައި ވެސް ހުރެ އެވެ.

Advertisement

"އަހަރުގެ ފުރަތަމަ ކަންނެލިން ހެޔޮ ނަސީބު ލިބޭނެ،" އެކުންފުނީގެ ރައީސް އަދި އަހަރުގެ ފުރަތަމަ ނީލަމުގައި ބޮޑެތި އަގުތައް ހުށަހަޅާ ކަމަށް މަޝްހޫރު ވިޔަފާރިވެރިޔާ ކުންފުނީގެ ރައީސް ކިޔޯޝީ ކިމޫރާ ބުނި ކަމަށް ކިޔޯޑޯ އިން ރިޕޯޓްކޮށްފައިވެ އެވެ. ކިމޫރާ، އަކީ "ޓޫނާ ކިންގް" ގެ ނަމުން މަޝްހޫރުވެފައިވާ ފަރާތެކެވެ.

އެފްޕީން ރިޕޯޓްކޮށްފައިވާ ގޮތުގައި،  ނީލަންކީ ފަރާތުން ނީލަމަށް ފަހު ރިޕޯޓަރުންނަށް ބުނީ އަގު ޖެހުނު މިންވަރުން ހައިރާންކަން ލިބުނު ކަމަށެވެ.

ކަންނެލި ގަތް ކިމޫރާ 2012 ގައި ނޫ އުރަހަ ކަންނެއްޔަކަށް 56.5 މިލިއަން ޔެން ދެއްކި އެވެ. އަދި 2013 ގައި 155 މިލިއަން ޔެން ގެ އަގެއް ކިޔާ މި ދެ ފަހަރަކު ވެސް ރެކޯޑެއް ވަނީ ގާއިމު ކޮށްފަ އެވެ. 2019 ގައި އޭނާ ނޫ އުރަހަ ކަންނެއްޔަކަށް 333.6 މިލިއަން ޔެން (6 މިލިއަން ޑޮލަރު) ދެއްކި އެވެ. މިއީ ވެސް ރެކޯޑް އަގެކެވެ. އެ ފަހަރު ކިޔުނު އަގަކީ މާ ބޮޑު އަގެއް ކަމަށް ރިޕޯޓަރުން ގާތު އޭރު ބުނެފައި އޮތް ނަމަވެސް، އޭނާގެ އަމިއްލަ ރެކޯޑް އޭނާ އަމިއްލަ އަށް މި ފަހަރު މި ވަނީ މުގުރާލާފަ އެވެ.

ޓޯކިޔޯގެ ޓޮޔޮސޫ މަސް މާރުކޭޓު ގައި އަހަރުގެ ފުރަތަމަ ނީލަމަކީ އާންމު ގޮތެއްގައިވެސް ބޮޑެތި އަގުތައް ހުށަހަޅާ ނީލަމެކެވެ.

ފާއިތުވި އަހަރު، ނީލަމުގެ ފުރަތަމަ ކަންނެލި 207 މިލިއަން ޔެން އަށް ގަތީ ސުޝީ ޗެއިނެއް ހިންގާ އޮނޮޑެރާ ގްރޫޕުންނެވެ.

ޓޯކިޔޯ ގެ މަސް މާރުކޭޓުތަކުގައި ނީލަން ކިޔާ މަންޒަރަކީ ފަތުރުވެރިންގެ މެދުގައި މަޝްހޫރު މަންޒަރެކެވެ. ހޯމަ ދުވަހުގެ ނީލަން، އެތަނުގެ ގަޑިން ފަތިހު 05:00 ގައި ފެށި އިރު މަންޒަރު ބަލަން އެތައް ބަޔަކު ޖަމާވެފައި ތިއްބެވެ.

މިލިއަން ޑޮލަރުގެ ކަންނެލި ގަތްތާ އިރު ކޮޅެއްގެ ތެރޭގައި ކިމޫރާގެ ސުޝީ ރެސްޓޯރަންޓްތަކުގައި ކަސްޓަމަރުންނަށް ވަނީ ކާންދީފަ އެވެ.