ޖަޕާނުގެ ޤާނޫނު ހަދާ މަޖިލީހުގައި އަންހެނުންނަށް ޚާއްޞަ ފާޚާނާ އިތުރުކުރުމަށް ހުށަހެޅި ޕެޓިޝަނެއް ގައި އެ ގައުމުގެ ބޮޑުވަޒީރު ސޮއި ކުރައްވައިފި

ޖަޕާނުގެ ޤާނޫނު ހަދާ މަޖިލީހުގައި އަންހެނުންނަށް ޚާއްޞަ ފާޚާނާ އިތުރުކުރުމަށް ހުށަހެޅި ޕެޓިޝަނެއްގައި އެ ގައުމުގެ ބޮޑު ވަޒީރު ސޮއި ކުރައްވައިފި އެވެ.

ޖަޕާނުގެ ޤާނޫނު ހަދާ މަޖިލީހުގައި އަންހެން މެންބަރުންގެ ނިސްބަތް އިތުރުވަމުންދާތީ، އެކަމާ އެއްވަރަށް މަޖިލިސް ކުރާ ގޭގައި އަންހެނުންނަށް ޚާއްޞަ ފާޚާނާ އިތުރުކުރުމަށް ގޮވާލާ ހުށަހެޅި ޕެޓިޝަނެއްގައި، ބޮޑުވަޒީރު ސަނޭ ޓަކައިޗީ ހިމެނިވަޑައިގަންނަވާހެން 60 އަށްވުރެ ގިނަ އަންހެން މެންބަރުން ވަނީ ސޮއިކުރައްވާފައެވެ.

2024 ވަނަ އަހަރުގެ އޮކްޓޫބަރު މަހު ބޭއްވި އިންތިޚާބުގައި، 465 ގޮނޑި ހިމެނޭ ތިރީގެއަށް ރެކޯޑު އަދަދަކަށް އަންހެނުން ވަނީ އިންތިޚާބުވެފައެވެ. އެއީ ޖުމްލަ 73 އަންހެން މެންބަރުންނެވެ. މީގެ ކުރިން އެންމެ ގިނައިން އަންހެން މެންބަރުން އިންތިޚާބުވީ 2009 ވަނަ އަހަރުއެވެ. އެއީ 54 މެންބަރުންނެވެ.

އިދިކޮޅު މެންބަރެއް ކަމަށްވާ ޔަސުކޯ ކޮމިޔާމާ ވިދާޅުވި ގޮތުގައި، މަޖިލީހުގެ ޖަލްސާތައް ފެށުމުގެ ކުރިން ފާޚާނާ ކައިރީގައި ވަރަށް ދިގު ކިއޫތައް އޮވެއެވެ. އަދި ޖަލްސާ ފެށުމުގެ ކުރިން ފާޚާނާއަށް ދިއުމުގެ އުންމީދު ބައެއް މެންބަރުން ދޫކޮށްލަން ޖެހޭ ހާލަތްތައް އަންނަ ކަމަށްވެސް އެހެން މެންބަރަކާ ޙަވާލާދީ އޭނާ ފާހަގަކުރެއްވިއެވެ.

މަޖިލިސް ކުރާ މާލަން ކައިރީގައި ހުންނަނީ އެންމެ ދެ ކޮޓަރި ހިމެނޭ އެންމެ ފާޚާނާއެކެވެ. މުޅި އިމާރާތުގައި އަންހެނުންނަށް ޚާއްޞަ 9 ފާޚާނާ ހުރި ނަމަވެސް، ފިރިހެނުންނަށް ޚާއްޞަ 12 ފާޚާނާގައި ޖުމްލަ 67 ފާޚާނާ ކޮޓަރިއާއި ކުޑަކަމުދާ ތަންތަން ހުރެއެވެ.

އިދިކޮޅު ކޮންސްޓިޓިއުޝަނަލް ޑިމޮކްރެޓިކް ޕާޓީގެ މެންބަރު ކޮމިޔާމާ އިތުރަށް ވިދާޅުވީ، މަޖިލީހުގެ މުވައްޒަފުންނާއި ޒިޔާރަތްކުރާ މީހުންވެސް ބޭނުންކުރަން ޖެހެނީ ހަމަ މި މަދު ފާޚާނާތައް ކަމަށްވާތީ ވަރަށް ދަތިވާ ކަމަށެވެ. 

ޖަޕާނުގެ މަޖިލިސް އިމާރާތަކީ 1936 ވަނަ އަހަރު ބިނާކޮށްފައިވާ ތަނެކެވެ. އެއީ އަންހެނުންނަށް ވޯޓުލުމުގެ ޙައްޤު ލިބުމުގެ 10 އަހަރު ކުރިއެވެ. އަންހެނުންނަށް ވޯޓުލުމުގެ ޙައްޤު ލިބުނީ 1945 ގައެވެ. އަދި ފުރަތަމަ ފަހަރަށް އަންހެން މެންބަރުން މަޖިލީހަށް އިންތިޚާބުވީ 1946 ގައެވެ.

މި އިމާރާތަކީ ތިން ބުރިއަށް ހަދާފައިވާ ވަރަށް ބޮޑު އިމާރާތެކެވެ. އިމާރާތުގެ މެދުތެރެއިން 9 ބުރިއަށް އުސްކޮށް ހުރި އިރު، މުޅި އިމާރާތުގެ ބޮޑުމިނަކީ ގާތްގަނޑަކަށް ދެ ފުޓުބޯޅަ ދަނޑުގެ ބޮޑުމިނެވެ.

ޖަޕާނު ސަރުކާރުން ކުރިން އަމާޒު ހިފީ 2020 ވަނަ އަހަރުގެ ނިޔަލަށް ހުރިހާ ދާއިރާއަކުންވެސް އިސް މަޤާމުތަކުގެ 30 އިންސައްތައަކީ އަންހެނުން ކަމުގައި ހެދުމަށެވެ. ނަމަވެސް އެ އަމާޒަށް ނުފޯރުމުން، މިހާރު ވަނީ އެ މުއްދަތު އިތުރު 10 އަހަރަށް ފަސްކޮށްފައެވެ.

މިހާރު މަޖިލީހުގެ ތިރީގޭގައި އަންހެނުންގެ ނިސްބަތަކީ ގާތްގަނޑަކަށް 16 އިންސައްތައެވެ. އަދި މަތީގޭގެ 125 ގޮނޑީގެ ތެރެއިން އަންހެނުންނަށް ލިބިފައިވަނީ 42 ގޮނޑިއެވެ.

މިދިޔަ އަހަރުގެ އޮކްޓޫބަރު މަހު ޖަޕާނުގެ ފުރަތަމަ އަންހެން ބޮޑުވަޒީރުގެ މަޤާމާ ޙަވާލުވެވަޑައިގަތް ޓަކައިޗީ ވަނީ، އޭނާގެ ކެބިނެޓުގައި އަންހެނުންގެ ނިސްބަތް ނޯޑިކް ޤައުމުތަކާ އެއްވަރަށް އިތުރުކުރައްވާނެ ކަމަށް ވަޢުދުވެވަޑައިގަންނަވާފައެވެ. ނަމަވެސް، 19 މެންބަރުން ހިމެނޭ އޭނާގެ ކެބިނެޓަށް މިހާތަނަށް އައްޔަންކުރައްވާފައިވަނީ އެންމެ ދެ އަންހެން ބޭފުޅުންނެވެ.

ޖަޕާނުގައި އަންހެނުންނަށް ޚާއްޞަ ފާޚާނާގެ ދަތިކަން އޮތީ ހަމައެކަނި މަޖިލީހަކު ނޫނެވެ. މުޅި ޤައުމުގެ ޢާންމު ތަންތަނުގައިވެސް އަންހެނުންގެ ފާޚާނާ ކައިރީގައި ދިގު ކިއޫތައް އޮތުމަކީ ޢާންމު ކަމެކެވެ. ކުރީގެ ބޮޑުވަޒީރު ޝިގެރޫ އިޝީބާވެސް ވަނީ، އަންހެނުންނަށް ހިތްހަމަޖެހުމާއެކު ދިރިއުޅެވޭނެ މުޖުތަމަޢެއް ބިނާކުރުމަށްޓަކައި، އަންހެނުންނަށް ޚާއްޞަ ފާޚާނާގެ ވަސީލަތްތައް ރަނގަޅުކުރުމަށް މަސައްކަތް ކުރައްވާނެ ކަމަށް ވިދާޅުވެފައެވެ.