ހޯމް މިނިސްޓްރީގެ ސްޓޭޓް މިނިސްޓަރު އަބްދުލްމަޖީދު މަގާމުން ވަކިކޮށްފި
22 ޖެނުއަރީ 2026 | ބުރާސްފަތި 18:49މަޖީދު މަގާމުގައި ހުންނެވިއިރު، ޑީއެންއާރުގެ ޑޭޓާބޭސްގައި ހުރި މައުލޫމާތު ބޭނުންކޮށްގެން މިނިސްޓްރީގެ ސިޔާސީ އިސްފަރާތްތަކުން ޕީއެންސީ އަށް މެމްބަރުން އިތުރުކުރަން ފޯމު ފޯޖްކޮށް ޕާޓީ ބަދަލުކުރަން މަސައްކަތްކޮށްފައިވާކަން ވަނީ ފަޅާއަރާފަ.
ސްޓޭޓް މިނިސްޓަރު އަބްދުލް މަޖީދު | ރާއްޖެ އެމްވީ
ހޯމް މިނިސްޓްރީގެ ސްޓޭޓް މިނިސްޓަރު އަބްދުލްމަޖީދު މަގާމުން ވަކިކޮށްފި އެވެ.
މައުލޫމާތު ލިބިފައިވާ ގޮތުގައި ހޯމް މިނިސްޓްރީގެ ސްޓޭޓް މިނިސްޓަރު އަބްދުލްމާޖިދު މަގާމުން ވަކިކުރީ ރައީސް ޑރ. މުހައްމަދު މުއިއްޒު އަށް ލިބިވަޑައިގަންނަވާ ބާރުގެ ދަށުންނެވެ.
ނަމަމަވެސް އޭނާ އެ މަގާމުން ވަކިކުރީ ސީދާ ކޮން ސަބަބަކާހުރެ ކަމެއް ނޭނގެ އެވެ.
އެ މަގާމުން އަބްދުލްމަޖީދު ވަކިކުރެއްވިއިރު، ހުންނެވީ ފޮރިން މިނިސްޓްރީގެ ދަށުގައި ބިދޭސީންގެ ކަންކަން ބަލަހައްޓާ ފޮރިން ލޭބާ ޑިޕާޓްމަންޓާއި، ޑިޕާޓްމެންޓް އޮފް ނޭޝަނަލް ރަޖިސްޓްރޭޝަން (ޑީއެންއާރު) ގެ ކަންކަން ބެލެހެއްޓުމާ ހަވާލުވެ އެވެ.
ފާހަގަކޮށްލެވޭ ގޮތުގައި ހޯމް މިނިސްޓްރީގެ ދަށުން ހިނގަމުންދާ ޑީއެންއާރުގެ ޑޭޓާ ބޭސް ގައި ހުރި ފޮޓޯ އާއި މީހުންގެ ޒާތީ މައުލޫމާތު ބޭނުންކޮށްގެން، ހޯމްލޭންޑް މިނިސްޓްރީގެ ސިޔާސީ އިސްފަރާތްތަކުން ވެރިކަން ހިންގާ ޕީއެންސީ އަށް މީހުން ވައްދަން ފޯމުގައި ސޮއި ފޯޖްކޮށް އިނގިލީގެ ނިޝާން ޖަހާ ޕާޓީ ބަދަލުކުރަން މަސައްކަތް ކޮށްފައިވާކަން މީގެ ކުރިން ވަނީ ފަޅާ އަރާފަ އެވެ.
އެކަން ހިނގާކަމަށް ތުހުމަތު ކުރަމުން ދަނިކޮށް ޑީއެންއާރުގެ ތެރޭގައި ފޯމު ފުރުމުގެ މަސައްކަތުގައި ހުންނަވަނިކޮށް ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓަރު އަލީ އިހުސާންގެ ފޮޓޯތައް ވެސް ވަނީ ލީކުކޮށްލާފަ އެވެ. އެކަން އެހެން ހިނގިކަން ހޯމް މިނިސްޓްރީގެ ސްޓޭޓް މިނިސްޓަރު ކަމުގައި ހުންނެވި އަބްދުލްމަޖީދު ވަނީ މީޑިއާގައި ވިދާޅުވެފަ އެވެ. އެހެން ނަމަވެސް ސަރުކާރުން މިިކަމުގައި އެއްވެސް ފިޔަވަޅެއް އަޅާފައެއް ނުވެ އެވެ.
