ދިވެހި ބަހުގެ އެކެޑަމީގެ ރައީސް ގެ މަގާމަށް ޝާކިރު އިންތިޚާބު ކޮށްފި
މިދިޔަ މަހު ޑރ. އަޝްރަފް އަބްދުއްރަހީމް އިސްތިއުފާ ދެއްވުމުން އެ މަގާމަށް ރައީސުލްޖުމްހޫރިއްޔާގެ ފަރާތުން ޝާކިރުގެ ނަން ހުށަހަޅުއްވުމާ އެކު އެކެޑަމީގެ ފަސް މެންބަރުން ވެސް ވޯޓު ދެއްވީ އެ މަގާމަށް ޝާކިރު އައްޔަނު ކުރުމަށް ފެންނަ ކަމަށް. ޝާކިރު ކުރިން އައިކޮމްގެ ޑިރެކްޓަރ ޖެނެރަލް އަދި މީޑިއާ ކައުންސިލްގެ މެންބަރުކަން ކުރައްވާފައިވާ އިތުރުން ދިވެހި ބަހާއި އަދަބިއްޔާތުގެ ދާއިރާއިން ގިނަ އިނާމްތައް ލިބިވަޑައިގެންފައި ވޭ.
ހަސަން ޝާކިރު މުހައްމަދު | ސޯޝަލް މީޑިއާ
ދިވެހިބަހުގެ އެކެޑަމީގެ ރައީސްގެ މަގާމަށް ހަސަން ޝާކިރު މުހައްމަދު އިންތިޚާބު ކޮށްފި އެވެ.
އެ މަގާމަށް ޝާކިރު އިންތިޚާބު ކޮށްފައި ވަނީ މިދިޔަ މަހު 31 ވަނަ ދުވަހު ދިވެހި ބަހުގެ އެކެޑަމީގެ ރައީސް ގެ މަގާމުގައި ކުރިން ހުންނެވި ޑރ. އަޝްރަފް އަބްދުއްރަހީމް އިސްތިއުފާ ދެއްވުމުންނެވެ.
ހެރިޓޭޖް މިނިސްޓްރީގައި ހޯމަ ދުވަހު ބޭއްވި ދިވެހިބަހުގެ އެކެޑަމީގެ މެންބަރުންގެ ބައްދަލުވުމުގައި ރައީސަކު ހޮވަން ނެގި ސިއްރު ވޯޓުގައި އެ ކޮމިޓީގައި ހިމެނިވަޑައިގަންނަވާ ފަސް މެންބަރުން ވެސް ވޯޓު ދެއްވީ ޅެންވެރިޔާ ޝާކިރަށެވެ.
އެ މަގާމަށް ޝާކިރު އައްޔަނު ކުރުމަށް އޭނާ ގެ ނަން އެކެޑަމީ އަށް ފޮނުއްވީ ރައީސް ޑރ. މުހައްމަދު މުއިއްޒު އެވެ. އެއާއެކު އެކެޑަމީގައި ތިއްބަވާ 5 މެންބަރުން ވެސް ވޯޓު ދެއްވީ އެ މަގާމަށް ޝާކިރު އައްޔަނު ކުރުމަށް ފެންނަ ކަމަށެވެ.
ޝާކިރު އެންމެ ފަހުން ހުންނެވީ އިންފޮމޭޝަން ކޮމިޝަން (އައިކޮމް) ގެ ޑިރެކްޓާ ޖެނެރަލްގެ މަގާމުގަ އެވެ. އޭގެ ކުރިން ޝާކިރު ވަނީ މީޑިއާ ކައުންސިލްގެ މެންބަރުކަން ވެސް ކުރައްވާފަ އެވެ.
1998 ވަނަ އަހަރު އާންމު ޚިދުމަތު ގެ ހިތްވަރު ދިނުމު ގެ ގައުމީ އިނާމް ވެސް ލިބިވަޑައިގެންފައިވާ ޝާކިރަށް 2007 ވަނަ އަހަރު ދިވެހި އަދަބިއްޔާތަށް ޚިދުމަތް ކުރުމުގެ ދާއިރާއިންނާއި ދިވެހިބަހުން ވާހަކަ ދެއްކުންތެރިކަމުގެ ރޮނގުން ހިތްވަރުދިނުމުގެ އިނާމުގެ އިތުރުން 2022 ގައި ދިވެހި ބަހާއި އަދަބިއްޔާތުގެ ދާއިރާއިން ގައުމީ އިނާމު ލިބިވަޑައިގެންފައި އެވެ.
