ލޯކަލް ކައުންސިލް އަދި ޑަބްލިއުޑީސީގެ އެމްޑީޕީ ޕްރައިމަރީގެ ވޯޓުލުން މިއަދު 2:30ން 08:00ށް ކުރިއަށް ދާނެ
އެމްޑީޕީގެ ލޯކަލް ކައުންސިލް އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ޕްރައިމަރީ ވޯޓުލުން ޖެނުއަރީ 16 ވަނަ ދުވަހު މެންދުރުފަހު 2:30ން ރޭގަނޑު 8:00ށް ކުރިއަށްދާނެ.
އެމްޑީޕީގެ ކުރީގެ ޕްރައިމަރީ އެއްގެ ތެރެއިން ނަގާފައިވާ ފޮޓޯ އެއް | ސޯޝަލް މީޑިއާ
ލޯކަލް ކައުންސިލް އަދި އަންހެނުންގެ ތަރައްޤީ އަށް މަސައްކަތްކުރާ ކޮމިޓީގެ އެމްޑީޕީގެ ޕްރައިމަރީގެ ވޯޓުލުން މިއަދު އޮންނާނެ އެވެ.
އެމްޑީޕީ ލޯކަލް ކައުންސިލް އަދި ޑަބްލިއުޑީސީގެ ޕްރައިމަރީގެ ވޯޓުލުން ކުރިއަށް ދާނީ ޖެނުއަރީ 16 ވާ ހުކުދު ދުވަހުގެ މެންދުރު ފަހު 2:30ން ރޭގަނޑު 08:00 އަށެވެ.
ކުރިއަށް އޮތް ކައުންސިލު އަދި ޑަބްލިއުޑީސީ އިންތިޚާބުގައި އެމްޑީޕީގެ ކެންޑިޑޭޓުންގެ ގޮތުގައ އިންތިޚާބުގައި ވާދަ ކުރުމަށް ކައުންސިލް އިންތިޚާބަށް 510ށް ވުރެ ގިނަ ކެންޑިޑޭޓުން، ޑަބްލިއުޑީސީ އަށް 190 އަށް ވުރެ ގިނަ ކެނޑިޑޭޓުން ހުށަހަޅާފައިވެ އެވެ.
ޖުމްލަ 65 ވޯޓު ފޮށި ބަހައްޓަން ހަމަޖެހިފައިވާ އިރު އޭގެ ތެރޭގައި ހިމެނެނީ، މާލޭގައި އަތޮޅުތަކަށް ޚާއްސަކޮށްގެން ބަހައްޓާ 14 ފޮށި އަދި މާލޭގެ ދާއިރާތަކަށް ޚާއްސަކޮށްގެން މާލޭގައި 17 ވޯޓު ފޮށްޓާއި، މާލެއިން ބޭރުގައި ބަހައްޓާ 34 ވޯޓު ފޮށްޓެވެ.
މާލޭގައި ވޯޓު ފޮށިތައް ބަހައްޓާ ގޮތަށް ބަލާ އިރު، މަޖީދިއްޔާ ސްކޫލްގައި 4 ވޯޓު ފޮށި، ގަލޮޅު މަދަރުސާގައި 2 ވޯޓު ފޮށި، އިސްކަންދަރުގައި 3 ވޯޓު ފޮށި، ހިރިޔާ ސްކޫލްގައި 4 ވޯޓު ފޮށި، މުހިއްޔުއްދީން ސްކޫލްގައި 1 ވޯޓު ފޮށި، ގާޒީ ސްކޫލްގައި 2 ވޯޓު ފޮށި އަދި ކާމިލް ދީދީ ސްކޫލްގައި 1 ވޯޓު ފޮށި ބަހައްޓާނެ އެވެ. މީގެ އިތުރުން މާލޭގައި އަތޮޅުތަކުގެ މީހުންނަށް ޚާއްސަކޮށްގެން ބަހައްޓާ 14 ވޯޓު ފޮށި ހުންނާނީ ކަލާފާނު ސްކޫލްގަ އެވެ.
މީގެ އިތުރުން އަތޮޅުތަކުގައި ބަހައްޓާ ވޯޓު ފޮށިތަކުގެ ތެރެއިން އެންމެ ގިނަ ވޯޓު ފޮށިތައް ބެހެއްޓުމަށް ހަމަޖެހިފައި ވަނީ ގދ.އަތޮޅު ތައުލީމީ މަރުކަޒުގަ އެވެ. އެއީ ތިނަދޫގެ ދާއިރާތަކަށް ޚާއްސަ ވޯޓު ފޮށިތަކެވެ. މީގެ އިތުރުން ބޮޑެތި އާބާދީ ހުރި ތަންތަަނަށް ބަލާ ނަމަ ލ.ގަމު ދާއިރާގައި 3 ވޯޓު ފޮށި ބަހައްޓަ އެވެ. އައްޑޫ ސިޓީގައި 2 ވޯޓު ފޮށި، ސ. ހުޅުދޫގައި އެއް ވޯޓު ފޮށި ބަހައްޓާ އރިު ފުވައްމުލައް ސިޓީގައި 1 ވޯޓު ފޮށި، ގދ. އަދި ގއ.ގައި 2 ވޯޓު ފޮށި ބެހެއްޓުމަށް ވަނީ ހަމަޖެހިފަ އެވެ.
