އަރާގްޗީ އާއި ކޫޕާ ފޯނުން ގުޅުއްވައި "ކުޑަ ވަގުތު ކޮޅަކަށް" މަޝްވަރާ ކުރައްވައިފި

އީރާންގެ ފޮރިން މިނިސްޓަރު އައްބާސް އަރާގްޗީ އާއި، އިނގިރޭސިވިލާތުގެ ފޮރިން ސެކްރެޓަރީ ވައިވެޓް ކޫޕާ ފޯނުން ގުޅުއްވައި މަޝްވަރާ ކުރައްވައިފި އެވެ.

އެކަން ހާމަ ކޮށްފައި ވަނީ އީރާާންގެ ފޮރިން މިނިސްޓްރީ އިންނެވެ. އެ މިނިސްޓްރީ އިން ބުނެފައި ވަނީ، އަރާގްޗީ އާއި ކޫޕާ މަޝްވަރާ ކޮށްފައި ވަނީ "ކުޑަ ވަގުތު ކޮޅަކަށް" ކަމަށެވެ. 

އެގޮތުން ހުކުރު ދުވަހު ކުރިއަށް ގެންދިޔަ ފޯނު މަޝްވަރާގައި ވަނީ ދެ ޤައުމުން އެކުވެގެން މައްސަލަ ތަކަށް ހައްލު ހޯދުމާއި، މަޝްވަރާގެ މަތިން ކަންކަން ކުރިއަށް ގެންދިޔުމުގެ މުހިންމުކަން ފާހަގަ ކުރައްވާފައި ކަމަށް ބުނެފައިވެ އެވެ. 

އިނގިރޭސިވިލާތުގެ ސަރުކާރުގެެ މަސްދަރަކާ ހަވާލާދީ މީޑިއާ ތަކުގައި ބުނެފައި ވަނީ، އީރާންގެ ނިއުކްލިއާ ޕްރޮގްރާމްއާ ގުޅޭ ގޮތުން އުފެދިފައިވާ މައްސަލައިގައި ޑިޕްލޮމެޓިކް ޙައްލެއް ހޯއްދެވުމަށް، އެ ޤައުމުގެ ފޮރިން ސެކްރެޓަރީ ކޫޕާ ބޭނުންފުޅުވާ ކަމަށެވެ. އަދި އެކަމުގެ އިތުރުން، ބައެއް އެހެން މައްސަލަ ތަކުގެ ވާހަކަ ވެސް ކޫޕާ ދައްކަވާފައިވާ ކަމަށް ބުނެފައިވެ އެެވެ. 

މީގެ އިތުރުން އެ މަޝްވަރާ ތަކުގައި ކޫޕާ ވަނީ، އީރާން އިން ހައްޔަރު ކޮށްފައިވާ އިނގިރޭސިވިލާތުގެ ދެ ރައްޔިތުންގެ މައްސަލަ ވެސް ފާހަގަ ކުރައްވާފައި ކަމަށް ރިޕޯޓު ކޮށްފައިވެ އެވެ. އީރާން އިން ވަނީ ޖާސޫސީ ތުހުމަތެއްގައި އިނގިރޭސިވިލާތުގެ ދެ މީހަކު ހައްޔަރު ކޮށްފަ އެވެ. އެ ދެ މީހުން ހައްޔަރު ކޮށްފައި ހުންނަތާ އަހަރަކަށް ވުރެ ގިނަ ދުވަސް ވެއްޖެ އެވެ. ނަމަވެސް، އީރާންގެ ފޮރިން މިނިސްޓްރީ އިން ނެރެފައިވާ ބަޔާނުގައި މި ދެ މީހުންގެ ވާހަކަ ހިމާނަފައި ނުވެ އެވެ. 

އީރާންގެ ފޮރިން މިނިސްޓްރީ އިން ބުނެފައި ވަނީ، އީރާންގެ ނިއުކްލިއާ ޕްރޮގްރާމްއާ ގުޅޭ މައްސަލައިގައި ޔޫރަޕުގެ ތިން ޤައުމަކުން ނަގާފައިވާ ފިޔަވަޅު ތަކަކީ އެއްވެސް ޒިންމާދާރު ކަމެއް ނެތް ކަމެއްގެ ގޮތުގައި އަރާގްޗީ ސިފަ ކުރައްވާފައިވާ ކަމަށެވެ. އެ ތިން ޤައުމަކީ އިނގިރޭސިވިލާތް، ޖަރުމަނު އަދި ފްރާންސް އެވެ. 

އިނގިރޭސިވިލާތާއި، ފްރާންސް އަދި ޖަރުމަނުން ވެސް މިއަހަރުގެ ސެޕްޓެމްބަރު މަހުގެ ތެރޭގައި ވަނީ، އީރާންގެ ނިއުކްލިއާ ޕްރޮގްރާމްއާ ގުޅިގެން އދ އިން އެ ޤައުމަށް ކުރިމަތި ކޮށްފައިވާ ދަތި ކުރުންތަކަށް އަމަލު ކުރަން އަލުން ފަށައިފަ އެވެ. އެކަމާ ގުޅިގެން މީގެ ކުރިން ވެސް އީރާން އިން ވަނީ ކަންބޮޑުވުން ފާޅު ކޮށްފަ އެވެ. 

އީރާން އިން ހައްޔަރު ކޮށްފައި ތިބި އިނގިރޭސިވިލާތުގެ ދެ މީހުންނަކީ، ދެމަފިރިންނެވެ. އުމުރުން 50 އަހަރަށް ވުރެ ގިނަ ދުވަސް ވެފައިވާ މި ދެ މީހުން ހައްޔަރު ކޮށްފައި ވަނީ އީރާންގެ މެދު ތެރޭގެ ސަރަހައްދުން ކަމަށް ބުނެފައިވެ އެވެ. އެއީ އީރާންގެ ކާމަން ސަރަހައްދުން ދަތުރު ކުރަމުން ދަނިކޮށެވެ. އެ މީހުން އެ ހިސާބުން ދަތުރު ކުރަމުން ދިޔައީ، ދުނިޔޭގެ ހުރިހާ ހިސާބަކަށް ދަތުރު ކުރުމުގެ ޕްލޭނެއްގެ ދަށުން ކަމަށް ބުނެފައިވެ އެވެ. 

އީރާން އިން ތުހުމަތު ކޮށްފައި ވަނީ މި ދެ މީހުން ވެސް ފަތުރުވެރިންގެ ގޮތުގައި އެ ޤައުމަށް ވަދެ، ބޭރުގެ އިންޓެލިޖެންސް ސާވިސް ތަކަށް މައުލޫމާތު ހޯދުމަށް މަސައްކަތް ކޮށްފައިވާ ކަމަށެވެ. ނަމަވެސް، އެ ދެ މީހުންގެ އާއިލާ އިން ވަނީ އެކަން ދޮގު ކޮށްފަ އެވެ.