އެންއައިސީޔޫގައި ބެކްޓީރިއާ ފެތުރި ގިނަ ކުދިންނަށް ބަލިޖެހުނީ އައިޖީއެމްއެޗްގައި ޑިސްއިންފެކްޓެންޓު ހުސްވެފައި ހުއްޓާ: އާޒިމް
އިންދިރާ ގާންދީ މެމޯރިއަލް ހޮސްޕިޓަލްގެ ކުޑަކުދިންނަށް ފަރުވާދޭ ޔުނިޓުގައި އެމްޑީއާރުއޯ ކިޔާ ނުރައްކާތެރި ބެކްޓީރިއާއެއް ފެތުރި ފަސް ކުދިންނަށް ވަނީ ބަލިޖެހިފަ
މޭޔަރު އާދަމް އާޒިމް: (އައިޖީއެމްއެޗް)ގެ ކުޑަކުދިންނަށް ފަރުވާދޭ ޔުނިޓު، އެންއައިސީޔޫގައި އެމްޑީއާރުއޯ ކިޔާ ނުރައްކާތެރި ބެކްޓީރިއާއެއް ފެތުރި، ކުދިންތަކެއްގެ ހާލު ދެރަވީ ޑިސްއިންފެކްޓަންޓް ހުސްވެފައި ވަނިކޮށް
އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގެ ކުޑަކުދިންނަށް ފަރުވާދޭ ޔުނިޓު، އެންއައިސީޔޫގައި މަލްޓި ޑްރަގް ރެސިސްޓެންޓް އޯގަނިޒަމްސް (އެމްޑީއާރުއޯ) ކިޔާ ނުރައްކާތެރި ބެކްޓީރިއާއެއް ފެތުރި، ކުދިންތަކެއްގެ ހާލު ދެރަވީ 'ޑިސްއިންފެކްޓަންޓް' ހުސްވެފައި ވަނިކޮށް ކަމަށް މާލޭގެ މޭޔަރު އާދަމް އާޒިމް ވިދާޅުވެއްޖެ އެވެ.
އާޒިމް މިފަދައިން ވިދާޅުވީ ހޮނިހިރު ދުވަހު އެކްސްގައި ކުރެއްވި ޕޯސްޓެއްގައެވެ.
އައިޖީއެމްއެޗްގެ އެންއައިސިޔޫގައި ފަރުވާދިން މަދު ކުދިންތަކަށް ނުރައްކާތެރި ބެކްޓީރިއާއެއް ޖެހިފައިވާކަން އެ ހޮސްޕިޓަލުން ހާމަކުރީ ބުރާފަތި ދުވަހުގައެވެ. އޭގެ ތެރެއިން ހާލު ދެރަވި ކުދިން އިތުރު ފަރުވާއަށް ރާއްޖޭން ބޭރަށް ފޮނުވުމުގެ މަސައްކަތް ކުރަމުން އަންނަ ކަމަށް އެ ހޮސްޕިޓަލުން ހުކުރު ދުވަހު ވަނީ ބުނެފައިވެއެވެ.
އެ މައްސަލައާ ގުޅޭ ގޮތުން އެކްސްގައި އާޒިމް ވިދާޅުވީ އައިޖީއެމްއެޗުން ޑިސްއިންފެކްޓަންޓު ހުސްވެފައިވާ ކަމަށާއި ގިނަ އަދަދެއްގެ ކުދިންނަށް އެ ބަލި ޖެހުނީ އައިޖީއެމްއެޗުން، ޑިސްއިންފެކްޓަންޓު ހުސްވެފައި ހުއްޓައި ކަމަށެވެ.
ހޮސްޕިޓަލްތަކުގައި ސާފުކުރުމަށް ބޭނުންކުރާ ޑިސްއިންފެކްޓެންޓްތަކަކީ ބެކްޓީރިއާ، ވައިރަސް އަދި ފަންގަސް ފަދަ ތަފާތު ޕެތޯޖަންތަކާ ދެކޮޅަށް މަސައްކަތްކުރާ އެއްޗެކެވެ.
އާޒިމް ވިދާޅުވީ މާލެ ސިޓީގެ ރައްޔިތުންނާއި ރާއްޖޭގެ ގިނަ ރައްޔިތުން ފަރުވާ ހޯދަމުންދާ މައި ހޮސްޕިޓަލްގެ ސިއްހީ ޚިދުމަތުގެ ކަންކަން މިހާ ދަށަށް ގޮސް، ބޮއްސުންލައި ދިޔުމަކީ ބަލައިގަނެވޭނެ ކަމެއް ނޫންކަމަށާއި އެތައް ރައްޔިތުންނެއް ދަނީ ބޭސް ފަރުވާއަށް ސަލާން ޖަހައި، ބޭސް ސިޓީއަށް ބޭސްނުލިބޭ ކަމުގެ ޝަކުވާތައް ކުރަމުން ކަމަށެވެ.
އާޒިމް ވަނީ ސަރުކާރުގެ މުއައްސަސާތަކުން ކުރާ ބޭކާރު ޚަރަދުތައް ކުޑަކޮށް، ރައްޔިތުންގެ ޞިއްޙީ ފަރުވާ އަދި އެހެނިހެން އަސާސީ ޚިދުމަތްތަކަށް އިސްކަންދިނުމަށް ވެސް ގޮވާލައިފައެވެ.
އެ މައްސަލައާ ގުޅިގެން އައިޖީއެމްއެޗުގެ މީޑިއާ އޮފިޝަލް "ރާއްޖެ އެމްވީ" އަށް ވިދާޅުވީ އެ ހޮސްޕިޓަލުގައި ޑިސްއިންފެކްޓަންޓްގެ ގޮތުގައި އެކި ބްރޭންޑް ތައް ބޭނުންކުރަމުން އަންނަ ކަމަސާއި އެގޮތުން އެއް ބްރޭންޑެއް ހުސްވުމުން އަނެއް ބްރޭޑްގެ ޑިސްއިންފެކްޓަންޓް އެއް ގެންނަކަމަށެވެ. އަދި އައިޖީއެމްއެހުގައި ޑިސްއިންފެކްޓަންޓް ހުސްވެފައި ހުރި ކަމަށް ދެކެވޭ ވާކަހަތަތަކީ ކަނޑައެޅިގެން ދޮގެއް ކަމަށް އެ ހޮސްޕިޓަލުގެ މީޑިއާ އޮފިޝަލް ވިދާޅުވިއެވެ.
ހޮސްޕިޓަލުގައި ޑިސްއިންފެކްޓަންޓްގެ ގޮތުގައި އެކި ބްރޭންޑް ތައް ބޭނުންކުރަމުން އަންނަނީ އެގޮތުން އެއް ބްރޭންޑެއް ހުސްވުމުން އަނެއް ބްރޭޑްގެ ޑިސްއިންފެކްޓަންޓް އެއް އެބަ ގެންނަން. އަދި އައިޖީއެމްއެޗުގައި ޑިސްއިންފެކްޓަންޓް ހުސްވެފައި ހުރި ކަމަށް ދެކެވޭ ވާކަހަތަތަކީ ދޮގެއް. ޑިސްއިންފެކްޓް ކުރުމަށް ބޭނުންކުރާ ސޮލިއުޝަން އަދި ވައިޕްސް ވެސް އެބަހުރި. އެ ބޭނުންކުރަމުން ދަނީއައިޖީއެމްއެޗްގެ މީޑިއާ އޮފިޝަލް
މީގެ އިތުރުން، އެންއައިސީޔޫގައި ފެތުރުނީ އެމްޑީއާރުއޯގެ ސަބަބުން ކުދިންނަށް ޖެހޭ ބައްޔެއް ކަމަށް ބުނެ ކުރެވޭ ތުހުމަތުތައް ވެސް އެ ހޮސްޕިޓަލުން ވަނީ ދޮގުކޮށްފައެވެ.
އެ މައްސަލައާ ގުޅޭ ގޮތުން މިދިޔަ ބުރާސްފަތު ދުވަހު އައިޖީއެމްއެޗުން ނެރުނު ބަޔާނުގައި ބުނީ އެންމެ ފުރަތަމަ އެ ބެކްޓީރިއާގެ ކޭހެއް ފެނުނީ މިދިޔަ މާޗު މަހުގެ 27ގައި، 28 ހަފުތާއަށް ވުރެ ކުރިން އުފަންވެގެން އެންއައިސީޔޫގައި ފަރުވާ ދެމުންދިޔަ ކުއްޖެއްގެ ހަށިގަނޑުން ނެގި ސާމްޕަލަކުން ކަމަށެވެ. އަދި މިދިޔަ މަހު 15ގެފަހުން އިތުރު ކޭހެއް ރިޕޯޓުކޮށްފައިނުވާ ކަމަށް ވެސް އެ ހޮސްޕިޓަލުގެ ބަޔާނުގައި ބުނެފައި ވެއެވެ،
އައިޖީއެމްއެޗް ހޮސްޕިޓަލުން ބުނީ ބެކްޓީރިއާއަށް ޕޮޒިޓިވްވި ފަސް ކުދިންނަށް ފަރުވާ ދެނީ ރައްކާތެރިކަމުގެ ފިޔަވަޅުތަކާ އެކުގައި ކަމަށާއި ބެކްޓީރިއާއަށް ޕޮޒިޓިވްވި ކުދިންގެ ތެރެއިން ހާލު ގޯސްވި ދެ ކުދިން އިތުރު ފަރުވާއަށް މިހާރު ރާއްޖެއިން ބޭރަށް ފޮނުވާފައިވާ ކަމަށް ވެސް އެ ހޮސްޕިޓަލުން ބުނެ އެވެ.
