އީރާނުގެ އިތުރު 3 ސެޓެލައިޓް ރަޝިޔާގެ ސޯޔޫޒުން ލޯންޗް ކޮށްފި

އީރާނުގެ އިތުރު 3 ސެޓެލައިޓް ރަޝިޔާގެ ސޯޔޫޒުން ލޯންޗް ކޮށްފި އެވެ.

އިރާނުގެ ދައުލަތުގެ މީޑިއާ ރިޕޯޓުކޮށްފައިވާ ގޮތުގައި، އިރާނުގެ އިތުރު ތިން ސެޓެލައިޓު އާދިއްތަ ދުވަހު ރަޝިޔާގެ ސޯޔޫޒް ލޯންޗަރުތަކުން ފަޒާގެ ތެރެއަށް ފޮނުވާލާފައިވާއިރު، އެމެރިކާއިން ދަތިކުރުމުގެ ފިޔަވަޅު އަޅާފައިވާ މި ދެ ޤައުމުން ދަނީ އެމީހުންގެ ޖައްވީ ގާބިލުކަން އިތުރަށް ތަރައްގީ ކޮށް ފުޅާކުރަމުންނެވެ.

ފަހުގެ އަހަރުތަކުގައި، އިރާނުން އެގައުމުގެ ގާތް އެކުވެރި ރަޝިޔާއަށް ބަރޯސާވާ މިންވަރު އިތުރުވެފައިވެއެވެ. އެގޮތުން، މިފަހަރު ފޮނުވާލި ތިން ސެޓެލައިޓު ބޭނުންކުރާނީ ދަނޑުވެރިކަން، ގުދުރަތީ ވަޞީލަތްތައް އަދި ތިމާވެށި ބެލެހެއްޓުމަށް އެހީތެރިވުމަށެވެ.

އިރާނުގެ ނިއުކްލިއަރ ޕްރޮގްރާމާ ގުޅިގެން ހުޅަނގުގެ ޤައުމުތަކުން އަޅާފައިވާ ފިޔަވަޅުތަކަށް އިޝާރާތް ކުރައްވައި، ރަޝިޔާއަށް ކަނޑައަޅުއްވާފައި ހުންނަވާ އިރާނުގެ ސަފީރު ކާޒިމް ޖަލާލީ ދައުލަތުގެ ޓީވީއަށް ވިދާޅުވީ، "މި ސެޓެލައިޓުތައް އިރާނުގެ ސައިންސްވެރިން ފަރުމާކޮށް އުފައްދާފައިވަނީ ހުރިހާ ދަތިކުރުމުގެ ފިޔަވަޅުތަކާއި، ބިރުދެއްކުންތަކުގެ ތެރެއިން" ކަމަށެވެ.

އަދި އޭނާ އިތުރަށް ވިދާޅުވިއެވެ: "އަޅުގަނޑުމެން (ރަޝިޔާއާ އެކު) ތަފާތު ދާއިރާތަކުގައި މަސައްކަތް ކުރަމުންދަނީ. ބައެއް ކަންކަން ފެންނަން އެބަހުރި، އަނެއް ބައި ކަންކަން ސާފުކޮށްދޭން އަޅުގަނޑުމެން ބޭނުމެއް ނުވޭ."

އިރާނުގެ ރަސްމީ އައިއާރުއެންއޭ ނިއުސް އެޖެންސީން ބުނެފައިވާ ގޮތުގައި މި ތިން ސެޓެލައިޓް – 'ޕަޔާ'، 'ޒަފަރު 2' އަދި ދެވަނަ ޖެނެރޭޝަންގެ 'ކައުސަރ' – ދަތުރު ކުރާނީ ދުނިޔެއާ ގާތް ހިސާބުތަކުގައި ކަމަށެވެ.

އިރާނު ހިމެނިފައިވަނީ ދުނިޔޭގައިވާ ސެޓެލައިޓް ފަރުމާ ކޮށް ލޯންޗް ކުރުމުގެ ގާބިލުކަން ލިބިފައިވާ 11 ވަރަކަށް ގައުމުގެ ތެރޭގަ އެވެ.

2022 ވަނަ އަހަރު ރަޝިޔާއިން ޔޫކްރެއިން ހަނގުރާމަ ފެށިފަހުން އިރާނާއި ރަޝިޔާގެ ގުޅުން ވަނީ ބަދަހިވެފައެވެ. ހުޅަނގުގެ ޤައުމުތަކުން އިރާނަށް ތުހުމަތު ކުރަނީ ރަޝިޔާގެ ހަމަލާތަކަށް މިސައިލްތަކާއި ޑްރޯންތައް ފޯރުކޮށްދޭ ކަމަށެވެ. ނަމަވެސް، ތެހެރާނުން މިކަން ދޮގުކުރެއެވެ.