ތެޔޮ ސްމަގުލް ކުރަމުން ދިޔަ ބޯޓެއް އީރާނުން ހިފަހައްޓައިފި

ތެޔޮ ސްމަގުލް ކުރަމުން ދިޔަ ބޭރުގެ ތެޔޮ ޓޭންކަރެއް އީރާނުގެ ކަނޑުގެ ސިފައިން ހިފަހައްޓައިފި ކަމަށް އީރާނުގެ ސަރުކާރުގެ މީޑިއާއިން ހުކުރު ދުވަހު ރިޕޯޓުކޮށްފި އެވެ.

 ގަލްފު ކަނޑުން އަތުލި މި ޓޭންކަރުން 4 މިލިއަން ލީޓަރުގެ ތެޔޮ ގަވާއިދާ ޚިލާފަށް އުފުލަމުންދިޔަ ކަމަށް އީރާނުން ބުނެއެވެ.

ނަމަވެސް، އެ އުޅަނދުގެ ނަމެއް ނުވަތަ އެއީ ކޮން ގައުމެއްގެ އުޅަނދެއްކަން އޮފިޝަލުން ހާމަކޮށްފައެއް ނުވެއެވެ. އަދި އެއީ ކޮން ދުވަހަކު ހިފެހެއްޓި އުޅަނދެއް ކަމެއްވެސް ބުނެފައެއް ނުވެއެވެ. އެ އުޅަނދުގައި ތިބި 16 ބޭރުގެ ފަޅުވެރިން ކުށުގެ ތުހުމަތުގައި ހައްޔަރުކޮށްފައިވާ ކަމަށް އީރާނުން ބުނެ އެވެ.

އީރާނުގެ ލޯކަލް މީޑިއާ ވެބްސައިޓުތަކުން ވަނީ ހިފެހެއްޓި ކަމަށް ބުނާ ޓޭންކަރުގެ ވީޑިއޯ ފުޓޭޖާއި ފޮޓޯތައް ޝާއިޢުކޮށްފައެވެ.

ފާއިތުވި ހަފުތާގައިވެސް އޮމާން ކަނޑުން ތެޔޮ ޓޭންކަރެއް ހިފަހައްޓާފައިވާ ކަމަށް އީރާނުން ބުނެފައިވެއެވެ. އެ ޓޭންކަރުން 6 މިލިއަން ލީޓަރުގެ ޑީސަލް ގަވާއިދާ ޚިލާފަށް އުފުލަމުންދިޔަ ކަމަށް އޭރު ބުނެފައިވާއިރު، އެ އުޅަނދުގެ ނަމެއް ނުވަތަ އެއީ ކޮން ގައުމެއްގެ އުޅަނދެއްކަން އެ ފަހަރު ވެސް ހާމައެއްކޮށްފަ އެއް ނުވެއެވެ.

އީރާނަކީ ދުނިޔޭގައި ތެލުގެ އަގު އެންމެ ދަށް ގައުމުތަކުގެ ތެރޭގައި ހިމެނޭ ގައުމެކެވެ. އެއީ ތެލަށް ދެމުންދާ ބޮޑެތި ސަބްސިޑީތަކާއި، ގައުމީ ފައިސާގެ އަގު ވަރަށް ބޮޑަށް ދަށްވެފައިވާތީއެވެ. އަގު ހެޔޮ ތެޔޮ އެއްގަމާއި ކަނޑުން ސްމަގުލް ކުރުން ހުއްޓުވުމަށް އީރާނުން ދަނީ ގިނަ މަސައްކަތްތަކެއް ކުރަމުންނެވެ.