އާޓިފިޝަލް އިންޓެލިޖެންސް (އޭއައި) އިން އުފެއްދި އަޑެއް ބޭނުން ކޮށްގެން އެމެރިކާގެ ސްޓޭޓް ސެކްރެޓަރީ މާކޯ ރޫބިއޯގެ ގޮތުގައި ހެދިގެން، ބޭރުގެ ތިން ޤައުމެއްގެ ޚާރިޖީ ވަޒީރުންނާ އެމެރިކާގެ ދެ ސިޔާސީ ފަރާތަކާ މީހަކު ފޯނުން މުއާމަލާތް ކޮށްފިއެވެ.

ރޮއިޓާސް އިން ރިޕޯޓު ކޮށްފައިވާ ގޮތުގައި ޖޫން މަހުގެ މެދުތެރޭގައި، އެ ފަރާތުން މިނިސްޓަރުންނާއި، އެމެރިކާގެ ގަވަރނަރަކަށާއި، ކޮންގްރެސްގެ މެންބަރަކާ ސިގްނަލް މެސެޖިންގ އެޕް މެދުވެރިކޮށް ގުޅާފައިވާކަމަށް ސްޓޭޓް ޑިޕާޓްމަންޓްގެ ޑޮކިއުމެންޓެއްގައި ބުނެފައިވެއެވެ.

އިތުރަށް ބުނެފައިވަނީ މި މީހާ ދެ ހާލަތެއްގައި ވޮއިސް މެއިލް ބޭނުން ކޮށްފައިވާ އިރު، ތިންވަނަ ކޭސް ގައި ސިގްނަލް މެދުވެރިކޮށް މުއާމަލާތް ކުރުމަށް އެދި ޓެކްސްޓް މެސެޖެއް ފޮނުވާފައިވާ ކަމަށެވެ.

"އެ ފަރާތުގެ މަޤްޞަދަކަށްވީ އާޓިފިޝަލް އިންޓެލިޖެންސް އިން އުފައްދާފައިވާ ޓެކްސްޓާއި ވޮއިސް މެސެޖުތައް ބޭނުންކޮށްގެން އަމާޒު ކުރެވުނު ފަރާތްތަކަށް ނުފޫޒު ފޯރުވުމެވެ. މިކަމުގެ ބޭނުމަކީ މަޢުލޫމާތު ނުވަތަ އެކައުންޓްތަކަށް ވަނުމެވެ،" ސްޓޭޓް ޑިޕާޓްމަންޓުން ޑިޕްލޮމެޓިކް މިޝަން ތަކަށް ފޮނުވި މެސެޖެއްގައި ބުނެފައިވެއެވެ.

މި މިހާގެ މި އަމަލާ ބެހޭ ގޮތުން ފުރަތަމަ ރިޕޯޓު ކުރީ ވޮޝިންގްޓަން ޕޯސްޓުން ނެވެ.

ޖުލައި 3 ވަނަ ދުވަހު ފޮނުވާފައިވާ ސްޓޭޓް ޑިޕާޓްމަންޓުގެ މެސެޖް ހުރިހާ ޑިޕްލޮމެޓިކް އަދި ކޮންސިއުލާ ޕޯސްޓުތަކަށް ފޮނުވާފައިވެއެވެ. އަދި މުވައްޒަފުންނަށް ވަގު އެކައުންޓްތަކާއި މީހުންގެ ގޮތުގައި ހެދިގެން އުޅޭ މީހުންނާ ބެހޭ ގޮތުން ބޭރުގެ ބައިވެރިން ހޭލުންތެރި ކުރުމަށް ބުނެފައިވެއެވެ.

"މި އަމަލުން ޑިޕާޓްމަންޓަށް ސީދާ ސައިބަރ ނުރައްކަލެއް ނެތް ނަމަވެސް، އަމާޒު ކުރެވުނު ފަރާތްތަކަށް ނުފޫޒު ފޯރުވިއްޖެނަމަ، ތިންވަނަ ފަރާތަކާ ހިއްސާ ކޮށްފައިވާ މަޢުލޫމާތު ހާމަވެދާނެއެވެ،" މެސެޖުގައި ބުނެފައިވެއެވެ.

ކޭބަލްގައި އޭޕްރީލް މަހު ހިންގާފައިވާ މި ބާވަތުގެ އެހެން ކަމަކަށް ވެސް އިޝާރާތް ކޮށްފައިވެއެވެ. އެ މަސައްކަތް ނިސްބަތް ކޮށްފައި ވަނީ ރަޝިއާއާ ގުޅުންހުރި ހެކަރަކަށެވެ. އޭނާގެ މަސައްކަތް އަމާޒު ކުރި ފަރާތްތަކުގެ ތެރޭގައި ކުރީގެ ސްޓޭޓް ޑިޕާޓްމަންޓުގެ އޮފިޝަލުން ހިމެނެއެވެ.

އެ ފަރާތުން ބޭނުން ކޮށްފައިވަނީ ސްޓޭޓް ޑިޕާޓްމަންޓްގެ ފޭކް އީމެއިލް އެޑްރެސް އެއް ކަމަށް މި ޚަބަރުގައި ވެއެވެ.

އެ ކެމްޕޭނުގައި، އެ ފަރާތުން ސްޓޭޓް ޑިޕާޓްމަންޓުގެ އޮފިޝަލެއްގެ ގޮތުގައި ހެދިގެން ޕްރައިވެޓް ޖީމެއިލް އެކައުންޓްތަކަށް މެސެޖު ފޮނުވާފައިވާ ކަމަށް އެމެރިކާގެ ސްޓޭޓް ޑިޕާޓްމަންޓުން ބުނެފައިވެއެވެ.