ރޭވިގެން ހިންގާ ބޮޑެތި ކުށްތަކުގައި ހިމެނޭ 5500 އަށް ވުރެ ގިނަ މީހުން ވޭތުވެދިޔަ އަހަރު ހައްޔަރުކޮށްފައިވޭ: ފުލުހުން
ސައިބަރ ކްރައިމްގެ ނުރައްކާ ހުރިހާ އުމުރެއްގެ ހުރިހާ ފަންތިއެއްގެ މީހުންނަށް ކުރިމަތިވޭ
ހުޅުމާލެ ފޭސް-2ގައި ހުންނަ ހިޔާ ފްލެޓު ސަރަހައްދުގައި ފުލުހުން ހަރަކާތްތެރިވަމުންދަނީ
ރޭވިގެން ހިންގާ ބޮޑެތި ކުށްތަކުގައި ހިމެނޭ 5500 އަށް ވުރެ ގިނަ މީހުން ވޭތުވެދިޔަ އަހަރު ހައްޔަރުކޮށްފައިވާ ކަމަށް ފުލުހުންގެ ޚިދުމަތުން ބުނެފިއެވެ.
ބައިނަލްއަގުވާމީ، ފުލުހުންގެ އެއްބާރުލުންދިނުމުގެ ދުވަހާއި ގުޅިގެން ފުލުހުން ބުނީ، އަދުގެ ދުނިޔޭގައި ކުށްކުރުމުގެ ވައްޓަފާޅި ހަލުވި މިނެއްގައި ބަދަލުވަމުން ގޮސް، ސައިބަރ ކްރައިމްގެ ނުރައްކާ ހުރިހާ އުމުރެއްގެ ހުރިހާ ފަންތިއެއްގެ މީހުންނަށް ކުރިމަތިވަމުންދާ ކަމަށެވެ.
އިންޓަނެޓްގެ ފަރުދާގެ ފުރަގަހުގައި ތިބެ، ކާކުކަން ނޭނގޭ ގޮތަށް ހިންގާ ރޭންސަމްވެއަރ އެޓޭކްތަކާއި، ކުޑަކުދިންނަށް ކުރާ އެކި ބާވަތުގެ ގޯނާ އާއި، އިންސާނީ ވަގުފާރީގެ އިތުރުން މަކަރާއި ހީލަތުން ފައިސާ ނިގުޅައިގަތުމުގެ އަމަލުތަކުގެ ސަބަބުން ނަފުސާނީ ގޮތުންނާއި މާލީ ގޮތުން ބޮޑެތި ގެއްލުންތައް ކުރިމަތިވަމުންދާ ކަމަށް ފުލުހުން ބުނެއެވެ.
މިއީ ދުނިޔޭގެ އެކި ޖިއޮގްރަފިކަލް ހިސާބުތަކާ ގުޅިފައި ހުންނަ، ރޭވިގެން ހިންގާ ބޮޑެތި ކުށްތައްކަން ފާހަގަކޮށް ފުލުހުން ބުނީ، މިފަދަ ކުށްތަކަކީ އެއް ގައުމުން އެކަނި މަސައްކަތް ކޮށްގެން ހުއްޓުވުން މުސްތަހީލު ކުށްތަކެއް ކަމަށެވެ.
މީގެ އިތުރުން ފުލުހުން ބުނީ، އިންޓަރޕޯލް އިން މިފަދަ ކުށްތައް ހިންގާ އުކުޅުތައް ދެނެގަނެ، މެންބަރު ގައުމުތައް މި ކަންކަމަށް އަހުލުވެރިކުރުވައި، ތަމްރީނާއި އުނގަންނައިދިނުމުގެ އިތުރުން ބައިނަލްއަގުވާމީ ފެންވަރުގެ ބޮޑެތި އޮޕަރޭޝަންތައް ހިންގަމުންދާ ކަމަށެވެ. އަދި ވޭތުވެދިޔަ އަހަރު ހިންގުނު އޮޕަރޭޝަން ހައިޗީއަށް އެކަނި ބެލި ކަމުގައިވިޔަސް، މިފަދަ ކުށްތަކުގައި ހިމެނޭ 5500 އަށް ވުރެ ގިނަ މީހުން ހައްޔަރުކުރެވި، 400 މިލިޔަން ޔޫއެސް ޑޮލަރުގެ އަގުހުރި ފައިސާއާ މުދާ ހިފެހެއްޓިފައިވާ ކަމަށް ފުލުހުން ބުނެއެވެ.
މިއީ ކާމިޔާބީއެއްކަން ފާހަގަކޮށް ފުލުހުން ބުނީ، ނަމަވެސް ކުރަންޖެހިފައިވާ މަސައްކަތްތައް އިންތިހާއަށް ބޮޑު ކަމަށާއި، ކުށްވެރިން ޓެކްނޮލޮޖީގެ ބޭނުންހިފައި، ކުށުގެ ވައްޓަފާޅި އިންތިހާއަށް ނުރައްކާތެރި މާހައުލަކަށް ބަދަލުކުރަމުން ދާއިރު، ތަންފީޒީ އިދާރާތަކުން ޓެކްނޮލޮޖީއާއި މުވާސަލާތީ ގުޅުމުގެ ތެރެއިން އިދާރާތަކުގެ ގުޅުން ވަރުގަދަކޮށް، އާޓިފިޝަލް އިންޓެލިޖެންސް އިން ލިބެންހުރި ފަސޭހަތައް މަސައްކަތުގައި ބޭނުންކުރަންޖެހޭ ކަމަށެވެ.
ފުލުހުން ބުނީ، އިންޓަރޕޯލްގެ ޚިދުމަތްތައް ފުޅާކޮށް، ޓެކްނޮލޮޖީން ކުރިއަށް ގެންދިއުމަށް ހުއްޓުމެއްނެތި ކުރެވެމުންދާ މަސައްކަތްތަކުގައި އެ އިދާރާގެ ފުރިހަމަ އެހީތެރިކަމާއި އެއްބާރުލުން ފޯރުކޮށްދޭނެކަމުގެ ޔަގީންކަންދޭ ކަމަށާއި، އެއީ ރާއްޖެ ފަދަ ކުދި ގައުމުތަކަށް މިމަގުން ކުރިއަށްދާން ލިބޭ ހިތްވަރެއް ކަމަށެވެ.
ބައިނަލްއަގުވާމީ ގޮތުން ފާހަގަކުރާ ފުލުހުންގެ އެއްބާރުލުންދިނުމުގެ ދުވަސް ފާހަގަކުރަން ފެށީ އިންޓަރޕޯލް އުފެއްދި ތާރީހު ކަމަށްވާ 07 ސެޕްޓެންބަރު 1923 ގެ މުނާސަބަތުގަ 2023 ވަނަ އަހަރުން ފެށިގެންނެވެ. އަދި 2025 ވަނަ އަހަރު މި ދުވަސް ފާހަގަކުރުމަށް ކަނޑައަޅާފައިވާ ޝިއާރަކީ "ފުލުހުންގެ މަސައްކަތުގައި އިންފޮމޭޝަން ކޮމިއުނިކޭޝަން ޓެކްނޮލޮޖީއާއި އާޓިފިޝަލް އިންޓެލިޖެންސް" އެވެ.
