ފަލަސްތީނު ދައުލަތެއް ނެތި އަދި އިސްރާއީލުގެ "އަދާވާތްތެރި އަމަލުތައް" ނިމުމަކަށް ނާންނަހާ ހިނދަކު މެދުއިރުމަތީގައި ސުލްހަވެރި ކަމާއެކު އެކުގައި ދިރި ނޫޅެވޭނެ: އަރަބި ލީގު
މެދުއިރުމަތީގައި ސުލްހަވެރިކަމާ އެކު އެކުގައި ދިރިއުޅެވޭނީ ފަލަސްތީނު ދައުލަތެއް ޤާއިމްވެ، އިސްރާއީލުގެ އަދާވާތްތެރި ޢަމަލުތައް ހުއްޓުމުން ކަމަށް އަރަބި ލީގުން ވަނީ ބުނެފައެވެ. މިސުރާއި ސަޢޫދީ އަރަބިއްޔާއިން ހުށަހެޅި ޤަރާރުގައި ބަޔާން ކޮށްފައި ވަނީ، ފަލަސްތީނުގެ މައްސަލައަށް އިންސާފުވެރި ހައްލެއް ނުލިބި އޮތުމަކީ ސަރަހައްދުގެ ސުލްހައަށް އޮތް އެންމެ ބޮޑު ހުރަހެވެ.
ޣައްޒާ ސިޓީގެ ހުޅަނގު ސަރަހައްދުގައި ހުންނަ މުޝްތަހާ ޓަވަރަށް ދިން އިސްރާއީލުގެ ވައިގެ ހަމަލާތަކުގައި އެ އިމާރާތް އެކުގައި ބިމާ ހަމަވަނީ - ސެޕްޓެމްބަރު 05، 2025
ފަލަސްތީނު ދައުލަތެއް ނެތި އަދި އިސްރާއީލުގެ "އަދާވާތްތެރި އަމަލުތައް" ނިމުމަކަށް ނާންނަހާ ހިނދަކު މެދުއިރުމަތީގައި ސުލްހަވެރި ކަމާއެކު އެކުގައި ދިރިއުޅުމަކީ ހާސިލު ކުރެވޭނެ ކަމެއް ނޫން ކަމަށް އަރަބި ލީގުން ބުނެފިއެވެ.
ބުރާސްފަތި ދުވަހު މިސުރާއި ސައޫދީ އަރަބިއްޔާ އިން ހުށަހަޅައި ފާސްކުރި ޤަރާރެއްގައި، ލީގުން ބުނެފައިވަނީ "ފަލަސްތީނުގެ މައްސަލަ އަށް އިންސާފުވެރި ހައްލެއް ނުލިބުމާއި އިސްތިއުމާރީ ބާރުގެ "އަދާވާތްތެރި އަމަލުތަކަކީ" ސަރަހައްދުގައި "ސުލްހަވެރި ކަމާއެކު އެކުގައި ދިރިއުޅުމަށް" ހުރި މައިގަނޑު ހުރަސްތައް ކަމަށެވެ.
މި ޤަރާރަކީ ގާހިރާ ގައި ހުކުރު ދުވަހު ނިމުނު، ފުޅާ ދާއިރާ އެއްގައި މަޝްވަރާތައް ބޭއްވުނު ބައްދަލުވުމެއްގެ ބައެކެވެ. މި ބައްދަލުވުމުގައި އަރަބި ޤައުމުތަކުގެ ފޮރިން މިނިސްޓަރުން "ސަރަހައްދުގެ ސަލާމަތާއި އެއްބާރުލުމަށް ގުޅިފައިވާ ވިޝަނެއް" ފާސްކުރިއެވެ.
މި ބައްދަލުވުން ބޭއްވުނީ އިސްރާއީލު ސިފައިން ޣައްޒާ ސިޓީ ވަށައިގެން އަސްކަރީ ހަމަލާތައް ވަރުގަދަ ކުރަމުންދާ ދަނޑިވަޅެއްގައެވެ. އަދި އިސްރާއީލުގެ ހައްދުފަހަނައަޅާފައިވާ ކަނާތުފިޔައިގެ ފައިނޭންސް މިނިސްޓަރު ބެޒަލެލް ސްމޮޓްރިޗް "ފަލަސްތީނު ދައުލަތެއްގެ ޚިޔާލު ވަޅުލުމަށް" ވެސްޓް ބޭންކުގެ ބައެއް ސަރަހައްދުތައް އިސްރާއީލުގެ ބިމާ އެއްކޮށްލުމަށް ގޮވާލާފައި ވަނިކޮށްނެވެ.
އޭއެފްޕީ އަށް ފެނިފައިވާ ޤަރާރުގެ ކޮޕީއެއްގައިވާ ގޮތުން، އަރަބި ބްލޮކުން ބުނެފައި ވަނީ އިސްރާއީލުން އަރަބި ބިންތައް ހިސޯރު ކުރަމުންދާހާ ހިނދަކު ނުވަތަ "އިތުރު އަރަބި ބިންތައް ހިސޯރު ކުރުމަށް ނުވަތަ އެނެކްސްކުރުމުގެ ނުސީދާ އިންޒާރުތައް" ދެމުންދާހާ ހިނދަކު މެދުއިރުމަތީގައި ދެމެހެއްޓެނިވި ސުލްހައެއް، އެއްބާރުލުމެއް އަދި އެކުގައި ދިރިއުޅުމަކީ ނުވާނެ ކަމެއް ކަމަށެވެ.
މިސުރާއި އުރުދުން އިން ވަނީ އިސްރާއީލާއެކު ސުލްހައިގެ މުއާހަދާތަކުގައި ސޮއިކޮށްފައެވެ.
ޔުނައިޓެޑް އަރަބް އެމިރޭޓްސް، ބަހްރެއިން އަދި މޮރޮކޯ ވަނީ 2020 ގައި އެމެރިކާގެ މެދުވެރިވުމާއެކު އެއްބަސްވެވުނު އިބްރާހިމް އެކޯޑްސްގެ ދަށުން އިސްރާއީލާއެކު ގުޅުން ގާއިމު ކުރުމަށް އެއްބަސްވެފައެވެ.
ލީގުގެ ޤަރާރުގައި ބުނެފައިވާ ގޮތުން، ދެމެހެއްޓެނިވި ހައްލެއް ބިނާވާން ވާނީ ދެ ދައުލަތުގެ ހައްލަކަށާއި 2022 ގެ އަރަބި ސުލްހައިގެ އިނީޝިއޭޓިވްގެ މައްޗަށެވެ. މި އިނީޝިއޭޓިވްގައި ހުށަހަޅާފައި ވަނީ 1967 ގައި އިސްރާއީލުން ހިސޯރު ކުރި ސަރަހައްދުތަކުން މުޅިން ފައިބައިގެން ދިއުމަށާއި، އޭގެ ބަދަލެއްގެ ގޮތުން އިސްރާއީލާ އެކު ގުޅުން އާންމު ހާލަތަކަށް ގެނައުމެވެ.
މަސްދަރު: އޭއެފްޕީ
