ފަލަސްޠީނުގެ ދައުލަތް ބަލައި ގަތުން ހުއްޓާލުމަށް، އިސްރާއީލް އިން ފްރާންސް އަށް ގޮވާލައިފި

ފަލަސްޠީނުގެ މިނިވަން ދައުލަތް ބަަލައި ގަތުމަށް ފްރާންސް އިން ކުރަމުން އަންނަ މަސައްކަތް ހުއްޓާލުމަށް، އިސްރާއީލް އިން ފްރާންސް އަށް ގޮވާލައިފި އެވެ.

ފަލަސްޠީނުގެ މިނިވަން ދައުލަތް ބަލައި ގަންނަން ނިންމާފައިވާކަން ފްރާންސްގެ ރައީސް އިމަނުއެލް މެކްރޮން ވަނީ އިއުލާން ކުރައްވައިފަ އެވެ. އަދި މި މަހު އދ ގެ ޖެނަރަލް އެސެމްބްލީގައި އެކަން ރަސްމީކޮށް އިއުލާން ކުރާނެ ކަމަށް ވެސް ވަނީ ނިންމަވައިފަ އެވެ.

އެއާއެކު ފްރާންސް އިން އަންނަނީ ފަލަސްޠީނުގެ މިނިވަން ދައުލަތް ޤާއިމު ކުރުމަށް ގިނަ މަސައްކަތްތަކެއް ކުރަމުންނެވެ. ފްރާންސްގެ ފަހަތުން އިނގިރޭސިވިލާތް، ކެނެޑާ، އޮސްޓްރޭލިއާ އަދި ބެލްޖިއަމް ފަދަ ޤައުމު ތަކުން ވެސް ވަނީ ފަލަސްޠީނުގެ މިނިވަން ދައުލަތް ބަލައި ގަންނަން ނިންމައިފަ އެވެ.

އެމެރިކާގެ ނިއު ޔޯކުގައި ހުންނަ އދ ގެ މައި މަރުކަޒުގައި އޮންނަ ޖެނަރަލް އެސެމްބްލީގައި ފަލަސްޠީނުގެ މިނިވަން ދައުލަތް ބަލައި ގަތުމުގެ ކަންކަން ޗެއާ ކުރަނީ ފްރާންސްގެ އިތުރުން ސައުދީ އަރަބިއްޔާ އެވެ. ދާދި ފަހުން ފްރާންސްގެ ރައީސް މެކްރޮން ވަނީ، އެކަމާ ގުޅިގެން ސައުދީގެ ވަލީ އަޙުދު މުޙައްމަދު ބިން ސަލްމާންއާ ވެސް މަޝްވަރާ ކުރައްވައިފަ އެވެ.

އެކަމާ ގުޅިގެން އިސްރާއީލްގެ ފޮރިން މިނިސްޓަރު ގިޑިއަން ސާރް ވަނީ، ފަލަސްޠީނުގެ މިނިވަން ދައުލަތް ބަަލައި ގަތުމަށް ފްރާންސް އިން ކުރަމުން އަންނަ މަސައްކަތް މުރާޖާ ކުރުމަށް ގޮވާލައިފަ އެވެ. މިފަދައިން އޭނާ ގޮވާލާފައި ވަނީ، ފްރާންސްގެ ފޮރިން މިނިސްޓަރު ޖީން ނޮއެލް ބަރޮޓްއާ އެކު ފޯނު މެދުވެރިކޮށް ކުރި މަޝްވަރާ ތަކުގަ އެވެ.

އިސްރާއީލްގެ ފޮރިން މިނިސްޓްރީ އިން ނެރެފައިވާ ބަޔާނެއްގައި ބުނެފައި ވަނީ، ފްރާންސް އިން މިހާރު އަމަލު ކުރަމުން އަންނަަ ގޮތުގެ ސަބަބުން، އިސްރާއީލް އާއި އެ ޤައުމުގެ އަމިއްލަ މަސްލަޙަތު ތަކަށް ގެއްލުން ލިބެމުން އަންނަ ކަަމަށެވެ. މީގެ އިތުރުން، ފްރާންސް އިން އެފަދަ މަސައްކަތް ތަކެއް ކުރާހާ ހިނދަކު، ފްރާންސްގެ ރައީސް މެކްރޮންގެ ދަތުރުފުޅަށް އެއްވެސް ޖާގައެއް ނޯންނާނެ ކަމަށް ވެސް ފާހަގަ ކޮށްފައިވެ އެވެ.

އިސްރާއީލް އިން މިފަދަ ފިޔަވަޅު ތަކެއް އަޅަން ނިންމާފައި ވަނީ، ފަލަސްޠީނުގެ ދައުލަތް ޤަބޫލު ކުރުމަށް ފްރާންސް އިން ކުރަމުން އަންނަ މަސައްކަތްްތަކާ ދެކޮޅު ހެދުމުގެ ގޮތުންނެވެ. އިސްރާއީލް އިން ދެކޭ ގޮތުގައި، އިސްރާއީލް އާއި ހަމާސް ޖަމާއަތާ ދެމެދު ކުރަމުން އަންނަ ހަނގުރާމައިގެ ތެރޭގައި ފްރާންސް އިން މިފަދަ ފިޔަވަޅެއް އެޅުމަކީ އިސްރާއީލްގެ ސަލާމަތާއި ރައްކާތެރި ކަމަށް އޮތް ނުރައްކަލެކެވެ.

ފްރާންސް އަކީ ޒަމާނުއްސުރެ އިސްރާއީލްއާ ގާތް ގުޅުމެއް ބާއްވަމުން އައި ޤައުމަކަށް ވީ ނަމަވެސް، ފަލަސްޠީނުގެ މައްސަލައިގައި ދެ ޤައުމުގެ ސިޔާސަތުތައް ތަފާތުވެފައިވާކަން ފާހަގަ ކުރެވެ އެވެ. ފްރާންސް އިން ޤަބޫލު ކުރާ ގޮތުގައި ދެ ދައުލަތުގެ ޙައްލަކީ، މިހާރު ހިނގަމުން އަންނަ ހަނގުރާމަ ނިމުމަކަށް ގެނައުމަށް އޮތް އެންމެ އެކަށީގެންވާ މަގެވެ.