ހުޅުމާލެ ފޭސް 2 ގެ ހިޔާ ފްލެޓް 11 ވަނަ ޓަވަރުގެ އެޕާޓްމަންޓެއްގައި މިއަދު ރޯވި އަލިފާންގަނޑު އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ނިއްވާލައިފިއެވެ.

އެމްއެންޑީއެފްއިން މަޢުލޫމާތު ދިންގޮތުގައި، އަލިފާން ރޯވެފައިވަނީ އެ ޓަވަރުގެ 3 ވަނަ ފަންގިފިލާގައި ހުރި އެޕާޓްމަންޓެއްގެ ބެލްކަނީގައި ހަރުކޮށްފައި ހުރި އެކްޒޯސްޓަކުން ކަރަންޓް ޝޯޓްވުމުގެ ސަބަބުންނެވެ. މި ހާދިސާގެ މަޢުލޫމާތު ފަޔަރ އެންޑް ރެސްކިޔު ސަރވިސްއަށް ލިބިފައިވަނީ މިއަދު 11:25 ހާއިރުގައެވެ.

އެމްއެންޑީއެފްއިން އިތުރަށް ހާމަކުރިގޮތުގައި، މަޢުލޫމާތު ލިބުމާއެކު ވަގުތުން ފަޔަރފައިޓަރުން އެ ސަރަހައްދަށް ގޮސް އަވަސް ފިޔަވަޅުތަކެއް އަޅައި، އަލިފާންގަނޑު ވަނީ ނިއްވާލާފައެވެ. މި ހާދިސާގައި އެއްވެސް މީހަކަށް އަނިޔާއެއް ވެފައިނުވާކަން އެމްއެންޑީއެފްއިން ފާހަގަކުރިއެވެ.

ނަމަވެސް، އަލިފާނުގެ ސަބަބުން އެޕާޓްމަންޓުގެ ބެލްކަންޏަށް ބައެއް ގެއްލުންތައް ވެފައިވާކަމަށް އެމްއެންޑީއެފްއިން ބުނެފައިވެއެވެ. މިފަދަ ހާދިސާތައް ތަކުރާރުވިޔަ ނުދިނުމަށްޓަކައި، ގޭގައި ބޭނުންކުރާ ކަރަންޓު ތަކެތި ރައްކާތެރިކަމާއެކު ބެހެއްޓުމަށް ސަމާލުވުމަށް އެމްއެންޑީއެފްއިން ވަނީ އާންމުންނަށް އިލްތިމާސްކޮށްފައެވެ.