ސަރުކާރުގެ ކުންފުނި ތަކުގެ ޚަރަދު ބޮޑުވެ، ގިނަ ކުންފުނިތައް ގެއްލުމުގައި ހިންގަމުން އަންނައިރު، އެކަމާ ގުޅޭ ގޮތުން ސަރުކާރުން އެއްވެސް އެއްޗެއް ބުނެފައި ނުވޭ. ސަރުކާރު ހިއްސާވާ ކުންފުނި ތަކުގއި އިންތިހާ އަށް ވައްކަމާއި، ކޮރަޕްޝަން އޮތް ކަަމުގެ ތުހުމަތު ވަނީ އަމާޒުވެފައި.
އިކޮނޮމިކް މިނިސްޓަރު މުޙައްމަދު ސައީދު
ސަރުކާރު ހިއްސާވާ ގިނަ ކުންފުނި ތަކެއް ހިންގަމުން އަންނަނީ ގެއްލުމުގައި ކަމަށް ބުނެ، ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ނެރެފައިވާ ރިޕޯޓާ ގުޅޭ ގޮތުން ސުވާލު ކުރުމުން ޖަވާބެއް ދެއްވުމަށް، އިކޮނޮމިކް މިނިސްޓަރު މުޙައްމަދު ސައީދު ދެކޮޅު ހައްދަވައިފި އެވެ.
ޕީސީބީ އިން ނެރެފައިވާ ރިޕޯޓެއްގައި ބުނެފައި ވަނީ، ސަރުކާރު ހިއްސާވާ ކުންފުނި ތަކުގެ ތެރެއިން 12 ކުންފުންޏެއް ހިންގަމުން އަންނަނީ ގެއްލުމުގައި ކަމަށެވެ. އެގޮތުން މިއަހަރުގެ ފުރަތަމަ ކުއާޓަރުގައި ޖުމުލަ 280 މިލިއަން ރުދިޔާާގެ ގެއްލުން ވެފައިވާކަން ވަނީ ހާމަ ކޮށްފަ އެވެ. އޭގެ ތެރޭގައި މީގެ ކުރިން ފައިދާ ގައި ހިންގަމުން އައި ކުންފުނިތައް ވެސް ހިމެނެ އެވެ.
ބުރާސްފަތި ދުވަހު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި އެކަމާ ގުޅޭ ގޮތުން ރާއްޖެ ޓީވީ އިން ސުވާލު ކުރުމުން މިނިސްޓަރު ސައީދު އެންމެ ފުރަތަމަ ވިދާޅުވީ ސީދާ ކޮން ކުންފުންޏެއްކަން ބުނެދިނުމަށް ވަރަށް ބޮޑަށް އެދިލައްވާ ކަމަށެވެ. އޭރުން އެ ވާހަކައެއް ދައްކަން ފަސޭހަ ވާނެ ކަމަށް މިނިސްޓަރު ސައީދު ވިދާޅުވި އެވެ.
އެއާ އެކު އެ ކުންފުނި ތަކުގެ ތެރޭގައި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީ) އާއި، މޯލްޑިވްސް އެއާޕޯޓްސް ކޮމްޕެނީ ލިމިޓެޑު (އެމްއޭސީއެލް) އަދި ފެނަކަ ކޯޕަރޭޝަން ފަދަ ކުންފުނިތައް ހިމެނޭ ކަމަށް ދެންނެވުމުން، މިނިސްޓަރު ސައީދު ވަނީ ޖަވާބު ދެއްވަން ދެކޮޅު ހައްދަވާފަ އެވެ.
ޖަވާބު ދެއްވުމުގެ ބަދަލުގައި މިނިސްޓަރު ސައީދު ވިދާޅުވީ، އެ ސުވާލު އެ ކުންފުނި ތަކުގެ މެނޭޖުމަންޓުގައި އެހުމަށެވެ.
އަޅުގަނޑު ވަރަށް ބޮޑަށް އެދެން އެ ސުވާލު، ސީދާ ކޮން ކުންފުންޏެއްކަން ވިދާޅުވެއްޖިއްޔާ، އޭރުން އެ ވާހަކައެއް އަޅުގަނޑަށް ދައްކަން ފަސޭހަ ވާނެ. އެހެން ނަމަވެސް، އެއަށް އެންމެ ލާއިގު، އެ ވާހަކަ ދެއްކުމަށް އެންމެ ރަނގަޅު ބޭފުޅުންނަށް ވާނީ މިނިސްޓްރީ އޮފް ފިނޭންސް އަދި އެ ކުންފުނި ތަކުގެ މެނޭޖުމަންޓާ ވާހަކަ ދައްކައިގެން. އަޅުގަނޑަކަށް ހީ ނުވޭ ތި ސުވާލަށް ސީދާ، ވަކި ވަކި ކުންފުނީގެ ބިހާފުގައި އަޅުގަނޑަށް އެއްޗެއް ދަންނަވަން ވާނެހެން.މުޙައްމަދު ސައީދު / އިކޮނޮމިކް މިނިސްޓަރު
މިނިސްޓަރު ސައީދު ޖަވާބެއް ދެއްވާފައި ނުވާއިރު، ސަރުކާރުގެ ގިނަ ކުންފުނިތައް ގެއްލުމުގައި ހިންގަން ޖެހި، އެތައް ބައެއްގެ ފާޑު ކިޔުން ވަނީ ސަރުކާރަށް އަމާޒުވެފަ އެވެ. އެގޮތުން ސަރުކާރުގެ ކުންފުނި ތަކުގެ ޚަރަދުތައް އިންތިހާ އަށް ބޮޑުވެ، ވަޒީފާ ތަކަށް އިންތިހާ އަށް މީހުން ވައްދާ ކަމުގެ ކަންބޮޑުވުން ވެސް ވަނީ އެތައް ބަޔަކު ފާހަގަ ކޮށްފަ އެވެ.
އެގޮތުން އެ ރިޕޯޓުގައި ވެސް ފާހަގަ ކޮށްފައިވާ ގޮތުގައި، ސަރުކާރު ހިއްސާވާ ކުންފުނި ތަކުގައި 37،900 އަށް ވުރެ ގިނަ މުވައްޒަފުން މަސައްކަތް ކުރެ އެވެ. މިއީ ސިވިލް ސާވިސްގައި މަސައްކަތް ކުރާ މުވައްޒަފުންނަށް ވުރެ، 7000 މުވައްޒަފުން އިތުރު އަދަދެކެވެ.
ބައެއް ކުންފުނި ތަކުގެ ތެރޭގައި މީގެ ކުރިން ސާފު ފައިދާ ގައި ހިންގަމުން އައި ކުންފުނިތައް ވެސް ހިމެނެ އެވެ. އެގޮތުން، މި ސަރުކާރު ވެރިކަމާ ހަވާލުވުމާ ހަމައަށް، އެމްޓީސީސީ އަކީ ފައިދާގައި ހިންގަމުން އައި ކުންފުންޏަކަށް ވީ ނަމަވެސް، އެންމެ ފަހުގެ ރިޕޯޓުގައި ބުނެފައި ވަނީ މިއަހަރުގެ ފުރަތަމަ ކުއާޓަރުގައި ވެސް އެމްޓީސީސީ އަށް 19.66 މިލިއަން ރުފިޔާގެ ގެއްލުންވެފައިވާ ކަމަށެވެ.
ސަރުކާރުގެ ކުންފުނި ތަކުގެ ޚަރަދު ބޮޑުވެ، ގިނަ ކުންފުނިތައް ގެއްލުމުގައި ހިންގަމުން އަންނައިރު، އެކަމާ ގުޅޭ ގޮތުން ސަރުކާރުން އެއްވެސް އެއްޗެއް ބުނެފައި ނުވެ އެވެ. ސަރުކާރު ހިއްސާވާ ކުންފުނި ތަކުގއި އިންތިހާ އަށް ވައްކަމާއި، ކޮރަޕްޝަން އޮތް ކަަމުގެ ތުހުމަތު ވަނީ އަމާޒުވެފަ އެވެ. ޕީސީބީގެ ރިޕޯޓުގައި ގެއްލުންވެފައިވާ ކަމަށް ފާހަގަ ކޮށްފައިވާ ކުންފުނި ތަކުގެ ތެރޭގައި ވެސް، އެ ތުހުމަތު އަމާޒުވެފައިވާ ކުުންފުނިތައް ވެސް ހިމެނެ އެވެ.
އެގޮތުން ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އަށް 113.73 މިލިއަން ރުފިޔާގެ ގެއްލުން ވެފައިވާ ކަމަށް ބުނެފައިވާއިރު، އެ ކުންފުނީގައި ކޮރަޕްޝަންގެ އެތައް މައްސަލައެއް އޮތް ކަމަށް ވަނީ ތުހުމަތުވެފަ އެވެ. މީގެ އިތުރުން ކޮރަޕްޝަންގެ އެތައް މައްސަލައެއް ފެންމަތިވެފައިވާ ފެނަކަ ވެސް ވަނީ، 33.72 މިލިއަން ރުފިޔާ އިން ގެއްލުންވެފަ އެވެ.
