އުޅަނދު ރަޖިސްޓަރީ ކުރަން ގަރާޖު އޮތުން އަދިވެސް ލާޒިމު: ޓްރާންސްޕޯޓު
ޓްރާންސްޕޯޓު މިނިސްޓްރީން ބުދަ ދުވަހު ނެރުނު ބަޔާނެއް ގައި ބުނީ، ލުއިކޮށްދިނުމުގެ ގޮތުން ކޮށްދިން ކަމަކީ ގަރާޖާ ގުޅޭ ގޮތުން ހުށަހަޅަން ޖެހޭ ބައެއް ލިޔުންތައް ހުށަހަޅަން ނުޖެހޭ ގޮތަށް ހެދުން ކަމަށް.
ވެލާނާ އިންޓަރނޭޝަނަލް އެއަރޕޯޓަށް ދަތުރުކުރަމުންދާ ކާރުތަކެއް
ކުރިއެކޭ ވެސް އެއްގޮތައް އެއްގަމު އުޅަނދު ރަޖިސްޓަރީ ކުރަން އަދިވެސް ގަރާޖު ޖާގަ އޮތުން ލާޒިމު ކަމަށް ޓްރާންސްޕޯޓު މިނިސްޓްރީން ބުނެފި އެވެ.
މިކަމާ ބެހޭ ގޮތުން ބައެއް ފަރާތްތަކަށް އޮޅުން އަރާފައިވާ ކަމަށް ބުނެ އެ މިނިސްޓްރީން ބުދަ ދުވަހު ނެރުނު ބަޔާނެއް ގައި ބުނީ، ލުއިކޮށްދިނުމުގެ ގޮތުން ކޮށްދިން ކަމަކީ ގަރާޖާ ގުޅޭ ގޮތުން ހުށަހަޅަން ޖެހޭ ބައެއް ލިޔުންތައް ހުށަހަޅަން ނުޖެހޭ ގޮތަށް ހެދުން ކަމަށެވެ.
އެ ގޮތުން ގަރާޖާ ގުޅޭ ގޮތުން މާލެ ސިޓީ ކައުންސިލް ނުވަތަ ހައުސިންގ ޑިވެލޮޕަމަންޓް ކޯޕަރޭޝަން (އެޗްޑީސީ) އިން ދޫކުރާ، އިމާރާތް ގަރާޖެއްގެ ގޮތުގައި ބޭނުން ކުރުމުގެ ހުއްދަ އާއި މާލެ ސިޓީ ކައުންސިލުން ނުވަތަ އެޗްޑީސީ އިން ދޫކުރާ ވެހިކަލް ގަރާޖު ޕާމިޓް އާއި ގަރާޖުގެ ވެރިފަރާތުގެ އިއުތިރާޒެއް ނެތް ކަމުގެ ލިޔުމާއި، ވެރިފަރާތުގެ އައިޑީ ހުށަހަޅަން އޮންނަ އޮތުން ބަދަލު ކޮށް 1 ޖަނަވަރީ 2026 އިން ފެށިގެން ހުށަހަޅަން ޖެހޭނީ އިމާރާތް ގަރާޖެއްގެ ގޮތުގައި ބޭނުން ކުރުމުގެ ހުއްދަ އާއި ގަރާޖު ވެރިފަރާތުގެ އިއުތިރާޒެއް ނެތް ކަމުގެ ލިޔުމާއި ވެރިފަރާތުގެ އައިޑީ ކަމަށެވެ.
ޓްރާންސްޕޯޓުން ބުނީ މި ބަދަލު ގެނައީ، އިދާރީ ގޮތުން ގަރާޖު ކުރުމާ ގުޅޭ ކަންކަން ކަށަވަރު ކުރާނެ ގޮތްތައް ކަނޑައެޅުމުގައި ކުރިން ވަކި ދެ އިދާރާ އަކުން ވަކި ދެ ހުއްދަ ނަގަންޖެހޭ މައްސަލައިގައި ދިމާވާ ދަތިތައް ކުޑަކުރުމުގެ ގޮތުން ކަމަށެވެ.
މީގެ އިތުރުން 2009 ވަނަ އަހަރު ގަރާޖު ލާޒިމު ކުރުމުގެ ކުރިން އަދި ކަނޑައެޅިގެން ވަކި ގަރާޖެއް ރަޖިސްޓަރީ ކޮށްފައި ނުވާ އުޅަނދުތަކުގެ ވެރިފަރާތް ބަދަލު ނުކުރެވި އޮންނަ މައްސަލަ ގައި ޝަކުވާ ހުށަހަޅަމުންދާތީ، މިހާރުވެސް މާލޭ ޒޯނުގައި ރަޖިސްޓަރީ ކޮށްފައިވާ މިފަދަ އުޅަނދުތަކަށް އިތުރު ގަރާޖު ލިޔުމެއް ހުށަހެޅުމަކާ ނުލައި ވެރިފަރާތް ބަދަލު ކުރެވޭނެ އިންތިޒާމު ހަމަޖެހިފައިވާ ކަމަށް ވެސް ޓްރާންސްޕޯޓު މިނިސްޓްރީން ބުނެފައިވެއެވެ.
މިނިސްޓްރީން އިތުރަށް ބުނީ، ގަރާޖު އިންސްޕެކްޓް ކުރުމުގެ މަސައްކަތް ކުރިއެކޭ އެއްގޮތައް ކުރިއަށް ގެންދާނެ ކަމަށެވެ.
ޓްރާންސްޕޯޓު މިނިސްޓްރީ އިން ވަނީ، އުޅަދުފަހަރުގެ އަހަރީ ފީ ނުވަތަ ޖޫރިމަނާ ނުދައްކާ ހުރި ކަމުގައިވީނަމަވެސް، ރަޖިސްޓަރީ ކެންސަލްކުރެވޭނެ ގޮތް ހަދާފަ އެވެ. މީގެކުރިން، ދައްކަންޖެހޭ ހުރިހާ ފައިސާ އެއް ދައްކައި ނިމެންދެން ރަޖިސްޓްރީ ކެންސަލްކުރުމުގެ ފުރުސަތެއް ނޯވެ އެވެ. އެހެން ނަމަވެސް މިނިސްޓްރީން ބުނީ، ރަޖިސްޓްރީ ކެންސަލްކުރުމުގެ ހުއްދަ ދެވުނު ނަމަވެސް، ދައްކާފައިނުވާ އަހަރީ ފީ ނުވަތަ ޖޫރިމަނާ އުޅަނދުގެ ވެރިފަރާތުން ދައްކަން ޖެހޭނެ ކަމަށެވެ.
