ރާއްޖެޓީވީގެ މުވައްޒަފުންގެ އެއް ދުވަހުގެ މުސާރަ ރޮހިންޖާ މުސްލިމުންނަށް
10 ސެޕްޓެމްބަރު 2017 | އާދީއްތަ 13:18މި ޓެލެތޯން ކުރިއަށް ދާނީ މާދަމާގެ 14:30 އަށް
ރާއްޖެޓީވީގެ މުވައްޒަފުން ފަންޑު ފޮއްޓަށް ފައިސާ ހަދިޔާކުރަނީ
މިޔަންމާ ސިފައިން ލާއިންސާނީ އަނިޔާ ދެމުންދާ ރޮހިންޖާ މުސްލިމުންނަށް އެހީވުމަށް ރާއްޖެ ޓީވީން ފަށާފައިވާ ޓެލެތޯނަށް ރާއްޖެ ޓީވީގެ ހުރިހާ މުވައްޒަފުންގެ އެއް ދުވަހުގެ މުސާރަ ހަދިޔާ ކޮށްފި އެވެ.
އާދީއްތަ ދުވަހުގެ މެންދުރު 14:30 އިން ފެށިގެން 24 ގަޑިއިރަށް ކުރިއަށް ގެންދާ މި ޓެލަތޯނަށް އަމިއްލަ ފަރުދުންނާއި ކުންފުނިތަކާއި ޖަމިއްޔާ ޖަމާއަތްތަކުގެ އެހީ ލިބެމުންދެއެވެ.
މި ޓެލެތޯނަށް ރާއްޖެ ޓީވީގެ މުވައްޒަފުން ފައިސާ ހަދިޔާ ކުރުމަށް ބޭއްވި ރަސްމިއްޔާތުގައި ސްޓޭޝަންގެ ޗީފް އޮޕަރޭޓިން އޮފިސަރު ހުސައިން ފިޔާޒު މޫސާ ވިދާޅުވީ މި ޓެލެތޯނުގައި ރާއްޖެ ޓީވީން އިސްނެގި ނަމަވެސް، ލިބޭ ފައިސާ ހަދިޔާ ކުރާނީ ދިވެހިރައްޔިތުންގެ ނަމުގައި ކަމަށެވެ.
"ވީހާ ވެސް ގިނަ ބައެއްގެ އެހީތެރިކަން ރޮހެންޖާގެ މުސްލިމް އަޚުންނާއި އުޚުތުންނަށް ވެދިނުމަށް ގޮވާލަން،" ފިޔާޒު ވިދާޅުވި އެވެ.
މާތް މަގުސަދެއްގައި ފެށި މި ޓެލެތޯނަށް، އެހެން ކުންފުނިތަކުގެ މުވައްޒަފުންގެ ފަރާތުން ވެސް އެއް ދުވަހުގެ މުސާރަ ނުވަތަ ދެވެން އޮތް އެހީތެރިކަމެއް ފޯރުކޮށް ދިނުމަށް ފިޔާޒު އެދިވަޑައިގެންނެވިއެވެ.
"ރޮހިންޖާ މުސްލިމުންނާއެކު ދިވެހިން" މި ނަމުގައި ކުރިއަށް ގެންދާ ޓެލެތޯންގައި ލިބޭ ފައިސާ އޮޑިޓްކޮށް ބެލެހެއްޓުމަށް ހަވާލު ކޮށްފައިވަނީ މިނިވަން އޮޑިޓަރެއްކަމުގައިވާ އެމްއެޗްޕީއޭއާ އެވެ.
