ސްޓެލްކޯގެ މެނޭޖިންގ ޑިރެކްޓަރުކަމުގެ މަގާމުން އާދިއްތަ ދުވަހު ވަކިކުރި ހުސައިން ފަހުމީ، ރައީސް އޮފީހުގެ އިސް މަގާމަކަށް އައްޔަނު ކޮށްފިއެވެ.

ސްޓެލްކޯއިން ފަހުމީ ވަކިކޮށް، އެ މަގާމަށް މިފްކޯއިން ވަކިކުރި އަހުމަދު ޝަމާހް ރަޝީދު ވަނީ އައްޔަންކޮށްފައެވެ. އަދި ހޯމަ ދުވަހު ރައީސް އޮފީހުގެ ޕްރިންސިޕަލް ސެކްރެޓަރީ އޮން ޕޮލިސީ އެންޑް މެނިފެސްޓޯގެ މަގާމަށް ފަހުމީ ވަނީ އައްޔަނުކޮށްފަ އެވެ.

ރައީސް ޑރ މުހައްމަދު މުއިއްޒުގެ ވެރިކަމުގައި ރައީސް އޮފީހުގެ ޕްރިންސިޕަލް ސެކްރެޓަރީންގެ މަގާމަކީ މިނިސްޓަރުން ފެންވަރުގެ މަގާމުތަކެކެވެ. މި މަގާމަށް ފަހުމީ އައްޔަނު ކޮށްފައިވަނީ ސްޓެލްކޯގެ އެމްޑީގެ މަގާމުން ވަކިކުރިތާ 24 ގަޑިއިރު ނުވަނީސްއެވެ.

ސްޓެލްކޯގައި 27 އަހަރުގެ ދިގު މުއްދަތަކަށް ޚިދުމަތްކޮށްފައިވާ ފަހުމީ، އެ ކުންފުނީގެ އެމްޑީގެ މަގާމުން ވަކިކުރި ސަބަބެއް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން (ޕީސީބީ) އިން ހާމަކޮށްފައެއް ނުވެއެވެ.

ނަމަވެސް، މާލެ އާއި ހުޅުމާލެއިން ކަރަންޓު ކެނޑޭ މައްސަލަ އާއި ކަރަންޓު ބިލުގެ އަގު ބޮޑުވުމުގެ މައްސަލައިގައި ގިނަ ރައްޔިތުންގެ ނުރުހުން ފަހުމީއަށް އަމާޒުވެފައިވާކަން ފާހަގަކުރެވެއެވެ. އޭނާ އެ މަގާމުން ވަކިކުރާނެ ކަމުގެ އަޑުތައް ފެތުރެން ފެށިތާ ގިނަ ދުވަސްތަކެއް ވެފައިވާއިރު، އެ މަގާމުން ވަކިކުރުމަށްފަހު އިތުރު މަގާމެއް ދޭނެކަން ކުރިން އެނގިފައެއް ނުވެއެވެ.

ފަހުމީ ރައީސް އޮފީހުގެ މަގާމަށް އައްޔަނުކުރުމާއެކު، އޭނާގެ މަސްއޫލިއްޔަތުތަކުގެ ތެރޭގައި ސަރުކާރުގެ ސިޔާސަތުތައް އެކުލަވާލުމާއި ވަޢުދުތައް ތަންފީޒުކުރުމުގެ މަސައްކަތްތައް ހިމެނޭނެއެވެ.