"ހައްދު"ގެ 15 ޝޯ ހައުސްފުލްކޮށް ދައްކައިފި

މި މަހުގެ 6 ވަނަ ދުވަހު ދިވެހި ސިނަމާތަކަށްއައި ފިލްމު "ހައްދު" ގެ 15 ޝޯ ހައުސްފުލްކޮށް ދައްކައިފިއެވެ.

ހައުސް ފުލް ޝޯތައް ދައްކާފައިވަނީ އޮލިމްޕަސް އަދި ޝްވެކް މާލެ އާއި ހުޅުމާލެ ސިނަމާގަ އެވެ.

މާލޭ ޝްވެކާއި ހުޅުމާލޭ ޝްވެކްގެ އިތުރުން އޮލިމްޕަހުގައި މި ފިލްމުގެ 18 ޝޯ އަޅުވާއިރު، ބުރާސްފަތި ދުވަހު އައްޑޫ ސިޓީގެ ހިތަދޫ އަދި މަރަދޫ ފޭދޫގައި ވަނީ އަޅުވާފައެވެ. މިމަހުގެ 14 ވަނަ ދުވަހުގެ ރޭ ހދ.ކުޅުދުއްފުށީގައި ފިލްމް އަޅުވާނެ އެވެ. މީގެ އިތުރުން ރާއްޖޭގައި މީހުން ދިރިއުޅޭ ހުރިހާ ރަށެއްގައާއި ބައެއް ރިސޯޓުތަކުގައި ތަރުހީބު ލިބެމުންދާވަރަކަށް ފިލްމު ދައްކަން ހަމަޖެހިފައިވާ ކަމަށް ފައްތާހު ވަނީ ބުނެފައެވެ.

މި ފިލްމްގެ ހުރިހާ ޓިކެޓެއް ވެސް 100 ރުފިޔާއަށް ވިއްކުމަށް ހަމަޖެހިފައިވާއިރު، ފިލްމުގެ ތަރިންގެ ރޯލުން ފެނިގެން ދަނީ މުހައްމަދު ރަޝީދު (ދަރާ)، މަރިޔަމް ޝަކީލާ، އާރިފާ އިބްރާހީމް، ފައުޒިއްޔާ އަދި މަރިޔަމް ހަލީމް، މަރިޔަމް އައްޒަ، އައިމިނަތު ރިޝްފާ އަދި މި ދާއިރާއަށް އަލަށް ތައާރަފްވާ ޝިބާން އަހުމަދު، އަލީ އާޒިމް (ދޮންއައްޔަ) އާއި އަހުމަދު ނަޖާހް އެވެ.

ފިލްމީ ދާއިރާގައި 21 އަހަރުގެ ތަޖުރިބާ ލިބިފައިވާ ފައްތާހުގެ 2014 ގައި ރިލީޒް ކުރި "އާދޭސް" އަށް ފަހު ފައްތާހު ޑައިރެކްޓް ކުރި ހައްދުގައި ވެސް ތަފާތު ކަމެއް ކޮށްލާފައިވެ އެވެ. މި ފިލްމުގައި ހާއްސަ ފެނިލުމެއްގެ ގޮތުގައި، ރާއްޖެ ޓީވީގެ ކުރީގެ ނޫސްވެރިޔާ އަހްމަދު ފައިރޫޒު ފެނިފައިވެ އެވެ. ފައިރޫޒު ފެނިގެން ދަނީ، ފިލްމުގައި އައިމިނަތު ރިޝްފާގެ އަލަތު ފިރިމީހާގެ ގޮތުގަ އެވެ.

މިއީ ވާހަކަ ލިޔުންތެރިޔާ މަހުދީގެ ވާހަކައެއްގެ މައްޗަށް ބިނާކޮށް އުފައްދާފައިވާ ވާހަކައެކެވެ. މި ފިލްގެ މަންޒަރުތައް ނަގާފައި ވަނީ ހއ. ކެލާ، ރ. ވާދޫ، މާލެ އަދި މާލެ ކައިރި ރިސޯޓްތަކުގައެވެ.