ރައީސް މުއިއްޒުގެ ސިޔާސީ އެޖެންޑާ ހިންގަވަނީ، މަސްތުވާތަކެތީގެ ވަގުފާރިންނާއި އެހެނިހެން ކުށްތައް ހިންގައިގެން ހޯދާ ކަޅު ފައިސާ އިން: އިމްރާން

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސިޔާސީ އެޖެންޑާ ހިންގަވަނީ މަސްތުވާތަކެތީގެ ވަގުފާރިންނާއި އެހެނިހެން ކުށްތައް ހިންގައިގެން ހޯދާ ކަޅު ފައިސާއިން ކަމަށް އަދާލަތު ޕާޓީގެ ރައީސް ޝެއިޚް އިމްރާން އަބްދުﷲ ވިދާޅުވެއްޖެ އެވެ.

ދިވެހިރާއްޖެއިން ގޭންގުތައް ނައްތާލެވިއްޖެ ކަމަށް ރައީސް މުއިއްޒު ވިދާޅުވި ވާހަކަފުޅަށް ރައްދު ދެއްވަމުން އެކްސްގައި ކުރެއްވި ޕޯސްޓެއްގައި ކުރީގެ ހޯމް މިނިސްޓަރު ކަންވެސް ކުރައްވާފައިވާ އިމްރާން ވަނީ ސަރުކާރަށް ވަރަށް ބޮޑަށް ފާޑުވިދާޅުވެފަ އެވެ. އިމްރާން ވިދާޅުވީ ރައީސް މުއިއްޒުގެ ސިޔާސީ އެޖެންޑާ ހިންގަން މަސްތުވާތަކެތީގެ ވަގުފާރިންނާއި އެހެނިހެން ކުށްތައް ހިންގައިގެން ގޭންގުތަކުން ހޯދާ ކަޅު ފައިސާ ވަންނަން ފެށީމާ ރާއްޖެއިން ގޭންގުތައް ނައްތާލެވިއްޖެ ކަމަށް ރައްޔިތުންނަށް ވިސްނައިދޭން އުޅުއްވުމަކީ ނުރައްކާތެރި ކަމެއް ކަމަށެވެ.

އިމްރާން ފާހަގަކުރެއްވި ގޮތުގައި ދައުލަތުގެ އެންމެ މަތީ ވެރިމީހާ ނިކުމެ މި ވާހަކަ މި ގޮތަށް ދައްކަވާއިރު، އެކަމުގެ ސަބަބުން ދިވެހި ގައުމަށް ބޮޑެތި ނޭދޭވޭ އަސަރުތަކެއް ކުރާނެ ކަމަށެވެ. އެގޮތުން މިކަމުގެ ސަބަބުން ދިވެހި ފުލުހުންގެ މަސައްކަތަށް ހުރަސްއެޅި އަދި ބޭރުގެ އިދާރާތަކުން ދިވެހިރާއްޖެއާ މެދު ދެކެމުން އަންނަ ގޮތް ބަދަލުވާނެ ކަމަށް އޭނާ ވިދާޅުވިއެވެ. އަދި ރައީސް މުއިއްޒުގެ މި ވާހަކަތަކުން، ކަޅު ފައިސާ ދޮވެ ސާފުކޮށް "ވައިޓް ކޮލަރ" ކުށްތައް ހިންގަން ސަރުކާރުން ފަހިކޮށް ފުރުސަތު ދޭކަން ހާމަވެއްޖެ ކަމަށް އިމްރާން ވިދާޅުވި އެވެ.

އިމްރާން އިތުރަށް ވިދާޅުވީ މިކަމުން ސާފުވާ ހަގީގަތަކީ، ސަރުކާރުން ގޭންގުތައް ނައްތާލީކީ ނޫން ކަމަށާއި ސަރުކާރުން ގޭންގުތައް މަތީ ހަރުފަތަކަށް ގެންގޮސްދީފި ކަމެވެ.

ސަރުކާރަށް ދެ އަހަރު ފުރުން ފާހަގަކުރުމަށް ހޯމަ ދުވަހުގެ ރޭ ސޯޝަލް ސެންޓަރުގައި ބޭއްވި ޖަލްސާގައި ވާހަކަ ދައްކަވަމުން ރައީސް މުއިއްޒު ވަނީ ދިވެހިރާއްޖޭގައި ހަރަކާތްތެރިވަމުން ދިޔަ ގޭންގުތަކުން ކުށްކުރުން ހުއްޓާލުމަށްފަހު މިހާރު މަސައްކަތް ކުރަމުން ދަނީ އަބުރުވެރި ދިރިއުޅުމެއް އުޅެވޭތޯ ކަމަށް ވިދާޅުވެފައެވެ. އަދި ގޭންގެއްގެ ޝަރުތު ހަމަވާ އެއްވެސް ބަޔަކު މިހާރު ދިވެހިރާއްޖޭގައި ނެތް ކަމަށް ރައީސް ވިދާޅުވިއެވެ.

އަޅުގަނޑު އިހަށްދުވަހު އަހާލައިފިން ހޯމް މިނިސްޓަރު ކައިރީގައި ކޮބާ މިހާރު ކިތައް ގޭންގު ކަނޑައެޅިއްޖެ ހެއްޔޭ، ހޯމް މިނިސްޓަރު ވަރަށް އުފާވެލާފައި ވިދާޅުވީ މިހާރު ނެތޭ، ތިމަންނަމެން ޕީޖީއަށް ފޮނުވައިގެން ޕީޖީ ވިދާޅުވިޔޭ ނެތޭ އަދި ތިޔަ ޝަރުތު ހަމަވާ އެއްވެސް ގޭންގެއް. ކުރީގައި މި ގޭންގުތަކުގައި އުޅުނު ހުރިހާ ފަރާތްތައް އެކަން ހުއްޓާލައިފި، ގޭންގް ކުށް ހުއްޓާލައިފި، މިހާރު އެ ބޭފުޅުން އެ ކުދިން ޒުވާނުން، މިހާރު ވިޔަފާރި ކުރުމާއި އަބުރުވެރި ދިރިއުޅެއް އުޅެވޭތޯ ނޯމަލް ލައިފްއަކަށް ގޮސްފި

ރައީސް ޑރ. މުހައްމަދު މުޢިއްޒު

ނަމަވެސް ރައީސް މުއިއްޒުގެ މި ވާހަކަފުޅާ ފުށުއަރާ ގޮތަށް މި ސަރުކާރުގެ ހޯމް މިނިސްޓްރީގެ ނައިބު މުހައްމަދު ޝަހީދު ވަނީ ގޭންގުތަކުގެ ތަފާސްހިސާބު ފުލުހުން އެ މިނިސްޓްރީއާ ހިއްސާކޮށްފައިވާ ކަމަށް ޓީވީ ޕްރޮގްރާމެއްގައި ވިދާޅުވެފައެވެ.

ޝަހީދު ވިދާޅުވި ގޮތުގައި ރާއްޖޭގައި 83 ގޭންގު މިހާރު ހަރަކާތްތެރިވަމުން ދާއިރު، އެ ގޭންގުތަކުގައި 3،600 މީހުން ކުށްކުރުމުގައި އުޅެއެވެ. އަދި ވެރިރަށް މާލޭގައި އެކަނި ވެސް 45 ގޭންގު ހަރަކާތްތެރިވާ ކަމަށް ހޯމް މިނިސްޓްރީގެ ނައިބު ވިދާޅުވިއެވެ.

މާލޭގައި ހަރަކާތްތެރިވާ ގޭންގުތަކުގެ މެންބަރުންގެ ގޮތުގައި 2،500 މީހުން ހަރަކާތްތެރިވާ ކަމަށް ވެސް ޝަހީދު ވިދާޅުވިއެވެ. އަދި ގޭންގުތަކުގައި ގާތްގަނޑަކަށް 85 ކުޑަކުދިން ހަރަކާތްތެރިވާކަން އެނގިފައިވާ ކަމަށް ވެސް އޭނާ ވިދާޅުވިއެވެ.

ރައީސް މުއިއްޒުގެ ވާހަކަފުޅާއި ހޯމް މިނިސްޓްރީގެ ނައިބުގެ ވާހަކަތަކާ ދެމެދު ފެންނަ ބޮޑު ތަފާތުގެ ސަބަބުން، ގޭންގުތަކާ ގުޅޭ ގޮތުން ސަރުކާރުން ރައްޔިތުންނަށް ދެމުން އަންނަ މައުލޫމާތުގެ ސައްހަކަމާ މެދު ވަނީ ސުވާލު އުފެދިފަ އެވެ. އިމްރާންގެ ތުހުމަތުތަކާއެކު، މި މައްސަލައިގައި ސަރުކާރުން ރައްޔިތުންނަށް ހަގީގަތް ސާފުކޮށްދޭން ޖެހޭ ކަމަށް ގިނަ ރައްޔިތުން ފާހަގަކުރެ އެވެ.