ރައީސް މުއިއްޒު ލ. އަތޮޅުގެ ދަތުރުފުޅު: މާބައިދޫ ރައްޔިތުންނަށް ވެވަޑައިގެންނެވި ވައުދުފުޅުތައް
ރައީސްގެ ދަތުރުފުޅުގައި އެރަށުގެ ރައްޔިތުންނާއި ބައްދަލުކުރައްވާ ގިނަ ވައުދުފުޅުތަކެއް ވެވަޑައިގެންނެވި
ރައީސް ޑރ. މުހައްމަދު މުއިއްޒު ލ. މާބައިދޫ ރައްޔިތުންނާއި ބައްދަލު ކުރައްވަނީ
ރައީސް ޑރ. މުހައްމަދު މުއިއްޒު ލ. އަތޮޅަށް ކުރެއްވި ދަތުރުފުޅުގެ ތެރެއިން ލ. މާބައިދޫ އަށް ވަޑައިގެންނެވީ 21 އޮކްޓޯބަރު 2025 ގަ އެވެ.
ރައީސްގެ މި ދަތުރުފުޅުގައި އެރަށުގެ ރައްޔިތުންނާއި ބައްދަލުކުރައްވާ ގިނަ ވައުދުފުޅުތަކެއް ވެވަޑައިގެންނެވި އެވެ.
މަޝްރޫއުތައް
އައިސްޕްލާންޓުގެ މަޝްރޫއު
ޤުރްއާން މަރުކަޒުގެ އިމާރާތެއް އެޅުން
ފިޓްނަސް އެންޑް ރިކްރިއޭޝަން ސެންޓަރު އެޅުން
އެރަށުގެ ރައްޔިތުންނާއި ބައްދަލުކުރައްވާ ރައީސް ވިދާޅުވީ އައިސް ޕްލާންޓްގެ މަޝްރޫޢާއި، ޤުރްއާނާބެހޭ މަރުކަޒުގެ މަޝްރޫޢާއި، ފިޓްނަސް ސެންޓަރުގެ މަޝްރޫޢާ، މި ތިން މަޝްރޫޢުވެސް އިރާދަކުރެއްވިއްޔާ ރަނގަޅަށް ކުރިއަށްދާނެކަމުގެ ޔަޤީންކަން އަރުވާ ކަމަށެވެ.
ސޮއިކުރި މަޝްރޫއުތައް
ލ. މާބައިދޫ ގިރާ ސަރަހައްދު ހިމާޔަތްކުރުމުގެ މަޝްރޫއު
މި މަޝްރޫއުގެ ދަށުން 543 މީޓަރު ބޮޑުހިލައިގެ ރިވެޓްމަންޓް ޖެހުމާއި 85 މީޓަރު ބޮޑުހިލައިގެ ގްރޮއިން ޖެހުން އަދި ގޮނޑުދޮށް ވެލިން މުއްސަނދިކުރުން ހިމެނެ އެވެ. އެމްޓީސީސީއާއި ހަވާލުކުރި މި މަޝްރޫއުގެ އަގަކީ 33،811،797.60 މިލިއަން ރުފިޔާއެވެ. މަސައްކަތް ނިންމަން ހަވާލުކުރީ 210 ދުވަހެވެ.
ލ. މާބައިދޫ ފުޓުބޯޅަ ދަނޑު ގާއިމުކުރުމުގެ މަސައްކަތާއި، ސްކޫލަށް މަލްޓި ޕާރޕަސް ހޯލެއް އިތުރުކުރުމަށް ހަވާލުކޮށްފައިވެ އެވެ.
ރައީސްގެ އިތުރު ވަައުދުފުޅުތައް
- ފުލުހުންގެ މަރުކަޒެއް ގާއިމްކުރުން (ކުޑަ ދުވަސްކޮޅެއްގެ ތެރޭގައި މަސައްކަތް ހަވާލުކުރެވޭނެ)
- ފުޓްސަލް ދަނޑު ނިންމުން (މި އަހަރު ތެރޭގައި މަސައްކަތް ފެށޭނެ)
- ވޮލީ ކޯޓު އެޅުން (އަންނަ އަހަރުގެ ބަޖެޓުގައި ހިމަނައިގެން)
- ހެލްތް ސެންޓަރު 24 ގަޑި އިރަށް ބަދަލުކުރުން (އަންނަ އަހަރުގެ ކުރީކޮޅު)
- ކައުންސިލް އިމާރާތް
- ކަރަންޓު މައްސަލަ ހައްލުކުރުމަށް ފެނަކައިން އިތުރު ޖަނަރޭޓަރު ގެނައުން
ރައީސް ވިދާޅުވީ ހުރިހާ ވައުދެއް ވެސް ފުައްދަވައި ދެއްވާނެ ކަމަށެވެ. އަދި ކުރިއަށް މިއޮތް އަހަރެއްހާ ދުވަސް ވެގެންދާނީ، ސޮއިކުރެވުނު މަޝްރޫޢުތައް، ބާރު ސްޕީޑްގައި ހިނގަމުންގޮސް، ނިމެމުންދާތަން ފެނިވަޑައިގަންނަވާނެ ދުވަސްތަކަކަށް ކަމަށް ވިދާޅުވި އެވެ.
