ރާއްޖެއިން މިއަހަރު ހައްޖަށް ދިޔަ ހައްޖުވެރިން ބުރާސްފަތި ދުވަހުން ފެށިގެން ރާއްޖެ އަންނަން ފަށާނެ ކަމަށް އިސްލާމިކް މިނިސްޓްރީން ބުނެފި އެވެ.
މިނިސްޓްރީން ބުނީ ހައްޖު ކޯޕަރޭޝަނުގެ ހަވާލުގައި ހައްޖަށް ދިޔަ މީހުން ފިޔަވާ އެހެން ހުރިހާ ގުރޫޕުތަކުގެ ހައްޖުވެރިން ރާއްޖެ އަންނާނީ ސްރީ ލަންކާގައި ޓްރާންސިޓް ކޮށްފައި ކަމަށެވެ.
ރާއްޖެ އައުމަށް އެންމެ ފުރަތަމަ ހަމަޖެހިފައިވަނީ ޒައީ ގުރޫޕްގެ ހަވާލުގައި ހައްޖަށް ދިޔަ 101 ހައްޖުވެރިންނެވެ. އެގޮތުން މިގުރޫޕްގެ ހައްޖުވެރިން ރާއްޖެ އައުމަށް ސައޫދީ އަރަބިއްޔާގެ ޖިއްދާއިން ފުރާނީ ބުދަ ދުވަހުގެ ރޭ ސައުދީ ގަޑިން 7:25 ގައެވެ. އެމީހުން ރާއްޖެ އައުމަށް ހަމަޖެހިފައިވަނީ ރާއްޖެ ގަޑިން ބުރާސްފަތި ދުވަހުގެ ހެނދުނު 8:15 ގައެވެ.
ސިސިލްފަރު ހައްޖު އެންޑް އުމްރާ ގްރޫޕުގެ ހަވާލުގައި ހައްޖަށް ދިޔަ މީހުންގެ ފުރަތަމަ ފްލައިޓް ރާއްޖެ އައުމަށް ހަމަޖެހިފައިވަނީ މިމަހުގެ 11 ވަނަ ދުވަހުގެ ހެނދުނު 8:15 ގައެވެ. މީގެ އިތުރުން އެ ގްރޫޕުގެ ހަވާލުގައި ހައްޖަށް ދިޔަ ހައްޖުވެރިންގެ ދެވަނަ ފްލައިޓް ރާއްޖެ އައުމަށް ހަމަޖެހިފައިވަނީ މިމަހުގެ 14 ވަނަ ދުވަހުގެ ހެނދުނު 8:15 ގައެވެ.
އަލްހަރަމައިން ހައްޖު އެންޑް އުމްރާ ގުރޫޕުގެ ހަވާލުގައި ހައްޖަށް ދިޔަ 102 ހައްޖުވެރިން ރާއްޖެ އައުމަށް ހަމަޖެހިފައިވަނީ މި މަހުގެ 12 ވަނަ ދުވަހުގެ ހެނދުނު 8:15 ގައެވެ.
ހައްޖު ކޯޕަރޭޝަންގެ ހަވާލުގައި ހައްޖަށް ދިޔަ ހައްޖުވެރިން އެނބުރި ރާއްޖެ އަންނަން ފަށާނީ ކުރިއަށް އޮތް ހުކުރު ދުވަހުން ފެށިގެންނެވެ. ހައްޖު ކޯޕަރޭޝަންގެ ހަވާލުގައި ހައްޖަށް ދިޔަ މީހުން ރާއްޖެ އައިސް ނިމޭނީ މިމަހުގެ 29 ގަ އެވެ. އެގޮތުން ހައްޖު ކޯޕަރޭޝަންގެ ފުރަތަމަ ފްލައިޓް ރާއްޖެ އައުމަށް ހަމަޖެހިފައިވަނީ މި މަހުގެ އަށް ވަނަ ދުވަހުގެ މެންދުރުފަހު 14:15 ގަ އެވެ. އަދި ދެވަނަ ފްލައިޓު މި މަހުގެ 10 ވަނަ ދުވަހުގެ މެންދުރުފަހު 15:50 ގައި އައުމަށް ހަމަޖެހިފައިވާއިރު ތިން ވަނަ ފްލައިޓް އައުމަށް ހަމަޖެހިފައިވަނީ މި މަހުގެ 11 ވަނަ ދުވަހުގެ މެންދުރުފަހު 14:15ގަ އެވެ. އަދި ހައްޖު ކޯޕަރޭޝަންގެ ހަތަރުވަނަ ފްލައިޓް ރާއްޖެ އައުމަށް ހަމަޖެހިފައިވަނީ މި މަހުގެ 13 ވަނަ ދުވަހުގެ ހެނދުނު 7:15 ގަ އެވެ.