ރައީސް މުއިއްޒު ލ. އަތޮޅުގެ ދަތުރުފުޅު: އިސްދޫ އަދި ކަލައިދޫ ރައްޔިތުންނަށް ވެވަޑައިގެންނެވި ވައުދުފުޅުތައް

ރައީސް ޑރ. މުހައްމަދު މުއިއްޒު ލ. އަތޮޅަށް ކުރެއްވި ދަތުރުފުޅުގެ ތެރެއިން ލ. އިސްދޫ ކަލައިދޫ އަށް ވަޑައިގެންނެވީ އޮކްޓޯބަރު 2025 ގަ އެވެ.

ރައީސްގެ މި ދަތުރުފުޅުގައި އެރަށުގެ ރައްޔިތުންނާއި ބައްދަލުކުރައްވާ ގިނަ ވައުދުފުޅުތަކެއް ވެވަޑައިގެންނެވި އެވެ.

ފައްޓަވައި ދެއްވި މަޝްރޫއުތައް

ލ. ކަލައިދޫ-ދަނބިދޫ ކޯޒްވޭ ޤާއިމްކުރުމުގެ މަޝްރޫޢުގެ ޢަމަލީ މަސައްކަތް ރަސްމީކޮށް ފެށުން

ލ. ކަލައިދޫ-ދަނބިދޫ ކޯޒްވޭ ޤާއިމްކުރުމުގެ މަސައްކަތަކީ ދިވެހި ދައުލަތުގެ ބަޖެޓުން ޚަރަދުކޮށްގެން، މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރއިން، މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ ޕލކ އާއި ޙަވާލުކޮށްފައިވާ މަޝްރޫޢެކެވެ. މި މަޝްރޫޢު ހަވާލުކޮށްފައިވަނީ 155,941,090.92 ރުފިޔާގެ އަގަށް 550 ދުވަހުގެ މުއްދަތެއްގައި ނިންމުމަށެވެ.

މި މަޝްރޫޢުގެ ދަށުން ކަލައިދޫއާއި ދަނބިދޫއާއި ދެމެދު 111 މީޓަރުގެ ތިން ކަލްވާޓް ސެގްމަންޓާއި ޖުމުލަ 675.6 މީޓަރުގެ ކޯޒްވޭ ސެގްމަންޓާއި އަދި 260 މީޓަރުގެ ރިވެޓްމަންޓް ޖެހުން ހިމެނެ އެވެ.

ލ.އިސްދޫ – ކަލައިދޫ ބޮޑުމަގު ތަރައްޤީ ކުރުމުގެ މަޝްރޫޢުގެ އެއްބަސްވުމުގައި ސޮއިކުރުން

މި މަޝްރޫއުއަކީ ދައުލަތުގެ ބަޖެޓުން ހަރަދުކޮށްގެން، މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރއިން، ރޯޑް ޑިވަލަޕްމަންޓް ކޯޕަރޭޝަނާއި ހަވާލުކުރި މަސައްކަތެކެވެ. މި މަސައްކަތަށް ދައުލަތުގެ ބަޖެޓުން 138،382،550.82 މިލިއަން ރުފިޔާ ހަރަދުކުރުމަށް ވަނީ ހަމަޖެހިފައެވެ. މި މަސައްކަތް ހަވާލުކުރީ 730 ދުވަހުގެ ތެރޭގައި މަސައްކަތް ނިންމާ ގޮތަށެވެ.

ލ. ކަލައިދޫ ބަނދަރު އަޕްގްރޭޑްކުރުމުގެ މަޝްރޫޢު

މި މަޝްރޫއަކީ ދައުލަތުގެ ބަޖެޓުން ހަރަދުކޮށްގެން، މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރއިން، އެމްޓީސީސީއާއި ހަވާލުކޮށްފައިވާ މަސައްކަތެކެވެ. މި މަސައްކަތުގެ އަގަކީ 74،954،226.96 މިލިއަން ރުފިޔާ އެވެ. އަދި މަސައްކަތް ނިންމަން ހަވާލުކޮށްފައިވަނީ 540 ދުވަހުގެ ތެރޭގަ އެވެ.

ރައްޔިތުންނާއި ބައްދަލުކުރައްވާ ރައީސް ވިދާޅުވެފައިވަނީ މިއީ އެމަނިކުފާނުގެ ރިޔާސީ އިންތިޚާބުގައި، ރައްޔިތުންނަށް، ދެ ރަށުގެ ރައްޔިތުންނަށް ވެފައިހުރި ގިނަ ވަޢުދުތަކެއް ފުއްދުމުގެ ގޮތުން، ޢަމަލީގޮތުން ފެށިގެންދާ މަޝްރޫޢުތައް ކަމަށެވެ. އަދި ސޮއިކުރެވުނު މަޝްރޫޢާއި، ޢަމަލީގޮތުން ފެށިގެންދިޔަ މަޝްރޫޢުތައް އިރާދަކުރެއްވިއްޔާ، ވަރަށް ހަލުވި ދުވެލީގައި، ވަރަށް އިސްކަމެއްދީގެން، ރަނގަޅަށް ކުރިއަށް ގެންގޮސް ނިންމައިދޭނެކަމުގެ ޔަޤީންކަން، ދެ ރަށުގެ ރައްޔިތުންނަށް އަރުވާ ކަމަށެވެ.

އިސްދޫ - ކަލައިދޫ އަށް ވެވަޑައިގެންނެވި ވައުދުފުޅުތައް

ޞިއްޙީ ނިޒާމު ރަނގަޅު ކުރުމަށްޓަކައި، އޮކްޓޯބަރު މަސް ނިމެންވާއިރަށް 30 އެނދުގެ ޒަމާނި ހޮސްޕިޓަލެއް އެޅުމަށް ސޮއިކުރެވޭތޯ މަސައްކަތް ކުރެވޭނެ ކަމަށް ރައީސް މުއިއްޒު ވިދާޅުވި އެވެ.

ކުޅިވަރުގެ ދާއިރާއިންވެސް އެކި ދަނޑުތައް އެޅުން، ފުޓްސަލް ދަނޑުގެ ޓާރފް ބަދަލުކުރުން، އަލަށް ވޮލީކޯޓު އަޅައިދިނުން، ހޭންޑްބޯލް ކޯޓު އަޅައިދިނުން، މިއީ ރާވާފައި ހުރި ކަންކަން ކަމަށް ރައީސް ވިދާޅުވި އެވެ. އަދި އަންނަ އަހަރުގެ ބަޖެޓުގައި ވޮލީކޯޓު، ހޭންޑްބޯލް ކޯޓު، އަދި ފިޓްނަސް އެންޑް ރިކްރިއޭޝަން ސެންޓަރު އަޅާނެ ކަމަށް ރައީސް ވިދާޅުވި އެވެ. އަދި ވޮލީކޯޓު، ހޭންޑްބޯލް ކޯޓު، އަދި ފިޓްނަސް އެންޑް ރިކްރިއޭޝަން ސެންޓަރު އަންނަ އަހަރުގެ ބަޖެޓުގައި ހިމެނޭނެ ކަމަށް ރައީސް ވިދާޅުވި އެވެ.

އިތުރު ޖަނަރޭޓަރުތައް ގެނައުމާއި، މިހާރު ހަދަމުންދާ ޕަވަރހައުސް ނިންމުމާއި އެކަމަށްޓަކައި ކުރަންޖެހޭ މުހިންމު މަސައްކަތްތައް ކުރިއަށް ގެންދާނެ ކަމަށް ރައީސް ވިދާޅުވި އެވެ.

"ވިޒިޓަރ އިކޮނޮމީ"، މި ސިޔާސަތުގެ ދަށުން ހެރިޓޭޖް ޓޫރިޒަމް މި ރަށުގައި ކުރިއެރުވުމަށްޓަކައި، ކަންކަން ކުރިއަށް ގެންދިއުމަށް ނިންމާފައިވާ ކަމަސް ރައީސް ވިދާޅުވި އެވެ.