ސަރުކާރުގެ ބެލުމުގެ ދަށުގައި ޓޯކޮށްފައި ހުރި ގިނަ އަދަދެއްގެ އަގުބޮޑު އުޅަނދުތަކަކަށް ބޮޑެތި ގެއްލުންތަކެއް ދީފި
މާފަންނު ޓޯޔާޑަށް 3 މީހަކު ވަދެ އުޅަނދުތަކަށް ގެއްލުން ދިނީ ޑިއުޓީ އޮފިސަރު ބްރޭކަށް ދިޔަ ވަގުތު
މާފަންނު ޓޯޔާޑުގައި ޓޯކޮށްފައިވާ އުޅަނދުތަކަކަށް ބަޔަކު ގެއްލުން ދީފަ
މާފަންނު ޓޯޔާޑުގައި ފުލުހުންގެ ބެލުމުގެ ދަށުގައި ހުރި ގިނަ އަދަދެއްގެ އުޅަނދުތަކަކަށް ހޯމަ ދުވަހުގެރޭ އިރާކޮޅުގެ ވަގުތެއްގައި ބަޔަކު ބޮޑެތި ގެއްލުން ތަކެއް ދީފިއެވެ.
ރާއްޖެއެމްވީ އަށް މައުލޫމާތު ލިބިފައިވާގޮތުން، 3 މީހަކު މާފަންނު ޓޯޔާޑަށްވަދެ އެތަނުގައި ޓޯކޮށްފައިވާ އުޅަންދުތަކަކަށް ގެއްލުންދީފައި ވަނީ، އެތަނުގައި ޑިއުޓީ ކުރާ ހަމައެކަނި ފުލުސް އޮފިސަރު ބްރޭކަށް ދިޔަ ވަގުތުގައެވެ.
ކޮންމެ ދުވަހެެއްގެ އިރުއޮއްސި ހަޔަކުން ފެށިގެން އިޝާ ނަމާދު ބަންގި ގޮވުމާ ހަމައަށް މާފަންނު ޓޯޔާޑުގައި ފުލުހުންގެ ފަރާތުން ޑިއުޓީ އަދާނުކުރާ ކަން ރާއްޖެ އެމްވީ އިން ހޯދި ހޯދުމުން އެނގިފައިވެއެވެ. ސީސީޓީވީ ފޫޓޭޖުން ދައްކާގޮތުގައި، މި 3 މީހުން ޓޯޔާޑަށް ވަދެފައިވަނީ މާފަންނު ދުވާ ޓްރެކް ސަރަހައްދުގައި ހުރި ދޮރެއް ހަލާކުކޮށްލުމަށްފަހުއެވެ. އަދި ގަލުން ހަމަލާދީ އުޅަނދުތަކުގެ ބިއްލޫރިތައް ތަޅާލާފައިވާ މަންޒަރު ވެސް ސީސީޓީވީ ފޫޓޭޖުން ފެންނަކަމަށް މައުލޫމާތު ލިބެއެވެ. ގެއްލުންދީފައިވާ އުޅަނދުތަކުގެ ތެރޭގައި ގިނައިން ހިމެނެނީ ހަތަރު ފުރޮޅުލީ އުޅަނދުތަކެވެ.
2025 ވަނަ އަހަރުގެ ޖެނުއަރީ މަހު، ރައީސް މުއިއްޒުގެ އިރުޝާދުގެ ދަށުން، މި ބިން އެފްއޭއެމް އަތުން އަތުލައި، ވަގުތީ ގޮތުން ޓޯޔާޑެއްގެ ގޮތުގައި ބޭނުންކުރުމަށް ހޯމް މިނިސްޓްރީ އާ ހަވާލުކުރެވުނެވެ. މިއީ މާލޭގެ މަގުތަކުގައި ހަތަރު ފުރޮޅުލީ އުޅަނދުތައް ނުރަނގަޅު ގޮތުގައި ޕާކުކުރުމުގެ މައްސަލަ ހައްލުކުރުމަށް އެޅުނު ފިޔަވަޅެއް ކަމަށް ސަރުކާރުން ވަނީ ބުނެފައެވެ.
މާލެ ތެރޭގައި ހަތަރު ފުރޮލީ އުޅަނދުތައް މަގު ބޭނުންކުރާ ފަރާތްތަކަށް އުނދަގޫވާގޮތަށް ޕާކުކޮށްފައި ހުންނަ ކަމުގެ ޝަކުވާ އިތުރުވާން ފެށުމުން، 2025 ވަނަ އަހަރުގެ ޖެނުއަރީ މަހު ސީދާ ރައީސް މުއިއްޒުގެ އިރުޝާދުގެ ދަށުން މިބިން އެފްއޭއެމް އަތުން އަތުލާ ވަގުތީ ގޮތުން ޓޯޔާޑެއްގެ ގޮތުގައި ބޭނުން ކުރުމަށް ހޯމް މިނިސްޓްރީ އާ ހަވާލުކުރީ. ޖެނުއަރީ މަހުން ފެށިގެން ހޯމް މިނިސްޓަރު އިހްސާން ވަނީ ރާއީސް މުއިއްޒުގެ އަމުރަށް އުޅަނދުތައް ޓޯކުރަން ފަށާފަރާއްޖެ އެމްވީ އަށް މައުލޫމާތު ދެއްވި ފަރާތް
އިތުބާރު ހުރި މަސްދަރަކުން މައުލޫމަތު ދެއްވި ގޮތުގައި، މި ޓޯޔާޑަކީ އެކަށީގެންވާ ރައްކާތެރިކަމުގެ ފިޔަވަޅުތަކެއް ނެތި ހިންގާ ތަނެކެވެ. ތަނުގެ އިންފާރު ވަކިކޮށްފައި ނުވުމާއި، އެންމެ ފުލުހަކު ޑިއުޓީގައި ބެހެއްޓުމަކީ ކަންބޮޑުވާންޖެހޭ ކަމެއްކަމަށް އެ މަސްދަރު ފާހަގަކުރިއެވެ.
އެންމެ ކުޑަމިނުން ތަނުގެ އިންފާރު ވެސް ވަކިކޮށްފަ ނުވާއިރު، މި ބޮޑު ސަރަހައްދުގައި ޑިއުޓީ އަދާ ކުރަން ހުންނަނީ އެންމެ ފުލުހެއް ކަމަށާއި ތަނަށް ވަންނަން ބޮޑު ގޭޓެއް ހަދާފައި ވިޔަސް، މިތަނަށް ވަދެވޭނެ ކިތަންމެ ގޮތެއް ހުރެއެވެ.
އެފްއޭއެމް ޓާފް ދަނދުތަކުގައި ޕްރެކްޓިސް ކުރާ ފަރާތްތަކުން ވެސް ކޮންމެ ދުވަހަކު ވެސް މައި ގޭޓު ބޭނުން ނުކޮށް މިތަނަށް ވަންނަނީ ވަށައިގެންވާ ފެންސް ތަކުގައި ހަދާފައިވާ ބޮޑެތި ބާގަނޑުތަކުންނެވެ. މިއީ ވެސް އުސޫލެއްގެ ގޮތުން މިކަން ހިނގަން ވާނެ ގޮތެއް ނޫންކަމަށާއި، މިކަމަކީ ފުލުހުންނަށް އެނގިގެން ކޮންމެ ދުވަހަކު ކުރާ ކަމެއް ވިޔަސް ސަރުކާރާ އެފްއޭއެމް އާއި އޮންނަ އަންޑަސްޓޭންޑިން އެއްގެ ސަބަބުން މިކަމުގައި އެއްވެސް ފިޔަޅެއް މިހާތަނަށް އަޅާފައިނުވާކަމަށް ރާއްޖެއެމްވީ އަށް މައޫލޫމާތު ލިބިފައިވެއެވެ.
ކުޑަކޮށެއް ނުދާނެ މިކަމެއް، ފުލް ކޮންޓްރޯލް ނެތްތަނެއް ފުލުހުންނާ ބަލާށޭ ކިޔާފަ ގަދަކަމުން ހަވާލުކުރީމާ ވަނީ މިހެން. ކުރާށޭ ބުނީމަ ފުލުހުން ކުރާނެ. ވަގުތީ ގޮތުން ދީފަ މިއޮތީ މަގުމަތި ތަރުތީބު ކުރާށޭ ކިޔާފަ. ތަރުތީބު އެބަކުރޭ އެކުރާ ގޮތަކަށް. އެކަމު މިތަނަށް ވައްދާ އެއްވެސް އުޅަދެއްގެ ސަލާމަތީ ސަލާމަތީ ކަންކަން ކަށަވަރު ކުރެވޭނެ އެއްވެސް ގޮތެއް ނެތް.ރާއްޖެ އެމްވީ އަށް މައުލޫމާތު ދެއްވި ފަރާތް
ތަނުގެ ސެކުއިރިޓީ ބަލަހަައްޓަން ހުންނަ ފުލުސް އޮފިސަރު ބްރޭކަށްދާ ވަގުތަކީ ކޮންމެ ދުވަހަކު ވެސް އިރުއޮއްސި ހަޔަކުން އިޝާ ނަމާދު ބަންގި ގޮވުމާ ދެމެދެވެ. މިވަގުތުގައި އެތަން އޮންނަނީ ޑިއުޓީ ކުރާނެ ފުލުހަކު ނެތި ދޫކޮށްލާފައެވެ. މީގެ އިތުރުން ޓޯޔާޑެއްގެ ގޮތުގައި މިތަން ބޭނުންކުރަން ފެށިތާ އަހަރެއް ވާން ކައިރި ވެފައި ވީއިރު، މިތަނުގައި ޑިއުޓީ އަދާކުރާ ފުލުސް އޮފިސަރު ފާޚާނާ ކޮށްލާ، ނަމާދުކޮށް ކައިބޮއެ ހަދާނެ އިންތިޒާމެއް ވެސް ގާއިމު ވެފައި ނެތްކަން އެތަން ބަލަން ދިޔަ މި ނޫހުގެ ނޫސްވެރިންނަށް ފާހަގަ ކުރެވެއެވެ.
އުޅަނދުތަކަށް ގެއްލުން ދިން މައްސަލަ ގަލޮޅު ޕޮލިސް ސްޓޭޝަނުން ތަޙުޤީޤު ކުރަމުންދާކަން ކަށަވަރުކޮށްދީފައިވީ ނަމަވެސް، މައްސަލައިގައި "ވަރަށް އެހެން ކަހަލަ ކަންތައްތަކެއް" ހިމެނޭތީ އިތުރު މައުލޫމާތު ހާމަކުރެވެން ނެތްކަމަށް މައްސަލަ ބަލާ އިންވެސްޓިގޭޝަން އޮފިސަރު ވަނީ ވިދާޅުވެފައެވެ.
