ވެރިޔެއްގެ ޒިންމާ އަދާނުކުރެވޭ ކަމަށް ނިންމަވާ، ރައީސް މުއިއްޒު އިސްތިއުފާދެއްވާ ގެޔަށް ވަޑައިގަންނަވަން ޖެހޭ: ޝެއިޚް އިމްރާން
ކޮވިޑުގެ އެންމެ ދަތި ދުވަސްވަރު ރާއްޖޭގެ ރައްޔިތުން ހާލުގަ ނުޖެހޭ ވަރަށް މިހާރު ހާލުގަ ޖެހިފާވަކަމަށް އިމްރާން ވިދާޅުވި
އަދާލަތު ޕާޓީގެ ރައީސް އަދި ކުރީގެ ހޯމް މިނިސްޓަރ ޝެއިޚް އިމްރާން އަބްދުﷲ
ރާއްޖޭގެ އިޤްތިޞާދީ އަދި އިޖްތިމާއީ ހާލަތު ދަށަށް ގޮސްފައިވާ މިދަނޑިވަޅުގައި ރައީސް މުޙައްމަދު މުއިއްޒު އަށް ވެރިޔެއްގެ ޒިންމާ އަދާނުކުރެވޭ ކަމަށް ނިންމަވާ، އިސްތިއުފާދެއްވާ ގެޔަށްވަޑައިގަންނަވަން ޖެހޭކަމަށް އަދާލަތު ޕާޓީގެ ރައީސް އަދި ކުރީގެ ހޯމް މިނިސްޓަރު ޝެއިޚް އިމްރާން އަބްދުﷲ ގޮވާލައްވައިފިއެވެ.
ރާއްޖެޓީވީގެ "ފަލަ ސުރުހީ" ޕްރޮގްރާމްގައި ވާހަކަ ދައްކަވަމުން އިމްރާން ފާހަގަކުރެއްވި ގޮތުގައި، މިހާރު ދައުލަތަށް ވަންނަ އާމްދަނީ ކުރީގެ އަހަރުތަކާ އަޅާބަލާއިރު އެތައް ގުނައެއް އިތުރުވެފައިވީ ނަމަވެސް، ރައްޔިތުންގެ ދިރިއުޅުމުގެ ހާލަތު ވަނީ ކޮވިޑްގެ ދަތި ދުވަސްވަރަށްވުރެވެސް ދަށަށް ގޮސްފައެވެ.
ރައީސް އިބްރާހިމް މުހައްމަދު ޞާލިހްގެ ސަރުކާރުން ކޮވިޑްގެ ތެރޭގައި ދޫކުރި ލޯނުތަކާއި، ލަސްކުރި ކުލިތަކާއި، ދައުލަތަށް ދައްކަންޖެހޭ ފައިސާތަކާއި، އަދި ބޮޑުކުރި ޓެކްސްގެ ފައިދާ މިހާރު ދައުލަތަށް ލިބެމުންދާއިރު، ރައްޔިތުންގެ އަތްމަތި ދަނީ ހުސްވަމުން ކަމަށާއި ތަކެތީގެ އަގު އިންތިހާއަށް މައްޗަށް ގޮސް ރައްޔިތުން އިތުރަށް ނިކަމެތި ވަމުންދާކަމަށް އިމްރާން ވިދާޅުވިއެވެ.
މިސަރަހައްދުގެ ބައެއް ގައުމުތައް ކޮވިޑުގެ ހާލަތުން އަދިވެސް ބޮޑެތި ކަންކަމުން އަރައިނުގަނެވިގެން އެ އުޅެނީ. ރައީސް އިބްރާހިމް މުހައްމަދު ޞާލިހް ގެ ސަރުކާރު ނިމުނުއިރު ކޮވިޑްގަ ދިމާވި ހުރިހާ ބޮޑެތި ދަތިތަކަކުން ހިންދެމިލެވިފަ އޮތީ، ކޮވިޑް ތެރޭގަ ދޫކުރި ލޯނުތަކާ، ލަސްކުރި ކުލިތަކާ، ދައުލަތަށް ދައްކަންޖެހޭ ފައިސާތަކާ، މިހުރިހާ ކަމެއްގެ ފައިދާ، މިހުރިހާ ފައިސާއެއްް ދައުލަތައް ވަނީ 2024 ގަ، ރައީސް މުއިއްޒުގެ ވެރިކަމުގަ. ނަމަވެސް ދިވެހި ރައްޔިތުން މިހާރު ތިބީ ކޮވިޑުގެ ތެރޭގައި ތިބި ހާލަތަށްވުރެ ނިކަމެތި ހާލަތެއްގައި. ދައުލަތައް އެތައްގުނައެއްް އިތުރަށް ފައިސާ ވަންނަމުން ދާއިރު ރާއްޖޭގެ ރައްޔިތުން ދުވަހެއް ދުވަހަކަށް ވަނީ ނިކަމެތިވެ އަތްމަތީގައި ހުރި ފައިސާކޮޅު ހުސްވަނީ، ތަކެތީގެ އަގު އިންތިހާއަށް ވަނީ ބޮޑު، ވެރިއެއްގެ ޒިންމާ ރައީސް މުއިއްޒަށް އަދާކުރެވޭތީތޯ މިހެންވަނީ؟. ވެރިއެއްގެ ޒިންމާ ރައީސް މުއިއްޒަށް ރަނގަޅަށް ކިޔާދެވިއްޖެއްޔާ، އެމަނިކުފާނު އަމިއްލައަށް އެބަޖެހިވަޑައިގަންނަވާ ތިމަންނައަށް އެޒިންމާ އަދާނުކުރެވޭކަން ގަބޫލު ކުރަށްވާ ގެޔަށްވަޑައިގަންނަވަން.އަދާލަތު ޕާޓީގެ ރައީސް އިމްރާން އަބްދުﷲ
މިއަދު ވެރިޔަކަށް ހުންނެވި ރައީސް މުއިއްޒު، ވެރިއެއްގެ ޒިންމާ އަދާނުކުރައްވާ އެ ޒިންމާ އަށް ޚިޔާނާތްތެރިވެ ރައްޔިތުންނަށް އޮޅުވާލަމުންދާތީ، މިސަރުކާރަށް ވޯޓުދިން މީހުންގެ ތެރެއިން ގިނަ މީހުން މީހުން މާޔޫސް ވެފައިވާކަމަށް އިމްރާން ފާހަގަކުރެއްވިއެވެ. އަދި އޭގެ ތެރެއިން ގިނަ ބަޔަކު ރައީސް މުއިއްޒު ވެރިކަމަށް ގެނައުމަށް ވޯޓު ދިނީމޭ ބުނަަންވެސް ލަދުގަންނަ ހާލަތަައް ސަރުކާރުގެ ކަންކަން މިހާރު ގޮސްފައިވާކަމަށް އިމްރާން ވިދާޅުވިއެވެ. ރައީސް މުއިއްޒުގެ ނޭއްގާނީ ސިޔާސަތުތަކުގެ ސަބަބުން، މިހާ ނާގާބިލު ވެރިޔަކު ހޮވުނީ ތިމަންނާމެންގެ ސަބަބުންނޭ ބުނަން އެފަރާތްތަކުން ހަގީގަތުގަވެސް ދެރަވެ ލަދުގަނެ، ޖެހިލުންވާކަމަށެވެ.
ވެރިއެއްގެ އެންމެ މުހިންމު އެއް ސިފައަކީ ރައްޔިތުންނަށް ތެދުވެރިވުމާއި އިޚްލާޞްތެރިވުންކަމަށް އިމްރާން ފާހަގަކުރެއްވިއެވެ. ނަމަވެސް މިއަދު މިފެނިގެންދަނީ ވެރިމީހާގެ މަސްއޫލިއްޔަތު ނުއުފުއްލަވާ، އެ ޒިންމާއަށް ޚިޔާނާތްތެރިވެ، ރައްޔިތުންނަށް އިހުމާލެވެފަވާ މަންޒަރުކަމަށް އިމްރާން ވިދާޅުވިއެވެ. އިމްރާން އިތުރަށް ފާހަގަކުރެއްވި ގޮތުގައި، މުޅި ދައުލަތް މިހާރު ވަނީ ދަރަނިވެރިވެ، ބިކަވެފައެވެ. އަދި ރައްޔިތުންނަށް ލިބެންވާ ފައިސާ ސަރުކާރުގެ ފަރާތްތަކުގެ އަމިއްލަ މަޞްލަޙަތަށް ބޭނުންކުރަމުންދާ ކަމަށް ވެސް އިމްރާން ތުހުމަތުކުރެއްވިއެވެ.
