ރައީސް ޑރ މުހައްމަދު މުއިއްޒުގެ ސަރުކާރަށް ދެ އަހަރުވެގެން ދިޔައިރު، އައްޑޫ ސިޓީ އަށް އިގްތިޞާދީ ގޮތުން ފައިދާއެއް ވާ ވާކަހަލަ އެއްވެސް ކަމެއް މި ސަރުކާރުން ކޮށްދީފައި ނުވާކަމަށް އިދިކޮޅު އެމްޑީޕީގެ ޕީޖީ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ވިދާޅުވެއްޖެ އެވެ.

ރާއްޖެ ޓީވީގެ ޓީވީ ޓޯކް ޕްރޮގްރާމުގައި ވާހަކަ ދައްކަވަމުން ނާޒިލް ވިދާޅުވީ ރައީސް މުއިއްޒު ވެރިކަމަށް ވަޑައިގަތުމުގެ ކުރިންނާއި ފަހުން ވެސް އައްޑޫގެ ތަރައްގީއަށް ގިނަ މަޝްރޫޢުތަކެއް ކުރިޔަށް ގެންދާނޭ ކަމުގެ ވައުދުތައް ވެވަޑައިގެންފައިވާ ކަމަށެވެ. އެހެން ނަމަވެސް މިއަދާއި ހަމައަށް އެއްވެސް ވައުދެއް ފުއްދައި ނުދޭކަމަށް އޭނާ ވިދާޅުވި އެވެ.

ނާޒިލް ވިދާޅުވީ ބުރިޖު އެޅުމާއި އައްޑޫ ސިޓީގެ ހަންކެޑެ އިންޓަރގްރޭޓަޑް ޓުއަރިޒަމް ޑިވެލޮޕްމަންޓް ޕްރޮޖެކްޓް ފެށުމާއި ޝަންގްރިއްލާ ރިސޯޓު ތަރައްގީ ކުރުން ފަދަ އިގްތިޞާދީ ގޮތުން ފައިދާވާ ބޮޑެތި މަޝްރޫއުތަކެއް ކުރިޔަށް ގެންދާނޭ ކަމުގެ ވައުދު މި ސަރުކާރުން ވެފައިވާ ކަމަށެވެ.

މީގެން އެއްވެސް ވައުދެއް މި ސަރުކާރަށް ނުފުއްދުނުކަން ފާހަގަކުރައްވައި ނާޒިލް ވިދާޅުވީ ސަރުކާރަށް ދެ އަހަރުވެގެން ދާއިރުގައި އައްޑޫ އަށް އިގްތިޞާދީ ގޮތުން ވަޒީފާއެއް އުފެއްދޭނޭ މިންވަރު ވެސް މި ސަރުކާރުން ތަނަވަސްކޮށްދީފައި ނުވާ ކަމަށެވެ.

ނާޒިލް ވިދާޅުވީ އައްޑޫ އަށް އާމްދަނީ އެއް ވަންނާނެ ހަމައެއްވެސް ގޮތެއް މިއަދު ނެތް ކަމަށާއި މިފަދަ ނިކަމެތި ހާލަތެއްގައި އޮތް ތަނެއް އަނެއްކާ ވެސް އިތުރަށް ނިކަމެތިކޮށްލަން މި ސަރުކާރުން މަސައްކަތް ކުރަމުން އަންނަ ކަމަށެވެ.

ނާޒިލް ވިދާޅުވީ އައްޑޫ އަށް މި ސަރުކާރުން އެއްވެސް ކަމެއް ކޮށް ނުދެވުނު އިރު، ރައީސް މުއިއްޒުގެ ރޭވުމުން މިހާރު އެ ގެންދަނީ މުޅި އައްޑޫ ބައިބައިކޮށްލުމުގެ މަސައްކަތް ކުރަމުން ކަމަށެވެ.