ސްމަގްލް ކޮށްގެން ބޭރު ކުރަން އުޅުނު ގިނަ އަދަދެއްގެ ރަން، ހޮންގކޮންގ ގެ އިދާރާތަކުން ހިފަހައްޓައިފިއެވެ. ރަން ސްމަގްލް ކުރުމުގެ އެންމެ ބޮޑު ހާދިސާގައި 146 ކިލޯގެ ރަން ފެނިފައިވަނީ އެއިން މެޝިންގެ ބައިބައި ހަދައިގެން ވަގަށް ބޭރުކުރަން މަސައްކަތް ކުރަނިކޮށެވެ.  މިއީ މިގޮތަށް މިހާތަނަށް އަތުލައިގަނެވުނު އެންމެ ގިނަ ރަން ކަމަށްވެސް ޚަބަރުތައް ބުނެއެވެ.

އަތުލައިގަނެވުނު ރަނުގެ އަގު 10 މިލިއަން ޑޮލަރަށް އަރާއިރު، މިކަން ކުރުމުގައި އިސްކޮން ހަރަކާތްތެރިވި 31 އަހަރުގެ ފިރިހެނަކު ވަނީ ހައްޔަރުކޮށް ކަފާލާތުގެ ދަށުން ދޫކޮށްލާފައެވެ.

ހޮންގކޮންގ ގައި ސްމަގްލް ކުރުމަކީ ބޮޑެތި އަދަބުތައް ކަނޑައެޅިފައިވާ ކުށެކެވެ. މިގޮތުން ހަތް އަހަރު ދުވަހާހަމަޔަށް ޖަލު ހުކުމް ކަނޑައެޅިފައި ވެއެވެ.

މިފެނުނު ރަނުގެ މައްސަލައިގައި ކަސްޓަމް އޮފިޝަލުން ބުނެފައިވަނީ މިޖަރީމާ ހާމަވެފައިވަނީ ޖަޕާނަށް ފޮނުވަން ތައްޔާރު ކޮށްފައިވާ ދެ އެއާ ކޮންޕްރސަރ ޗެކް ކުރަން އުޅުމުގެ ތެރޭގައި، ފެނުނު ތަކެތީގައި އާދަޔާޚިލާފް "ޓެކްސްޗަރ" އަކާ ބަރުދަނެއް ހުރުމުން ޝައްކު ވެގެން ބެލުމުންނެވެ. ރަގަޅަށް ބެލިއިރު ދޭތީގެވެސް އެތެރޭގެ ބައިތަކާ ގިއަރުތައް، އިސްކުރުތައް އަދި މޯޓަރުގެ އެކިބައިތައް ހުރީ ރަނުން ހަދާފަ ކަމަށް ހޯމަ ދުވަހު ސަރުކާރުން ނެރުނު ބަޔާނެއްގައި ބުނެފައި ވެއެވެ.

ހޮންގކޮންގ ގެ ކަމާބޭ އިދާރާތަކުން ބުނެފައިވާ ގޮތުގައި މިއީ ޖަޕާނުގެ ބަޔަކު އަޑީގަ ތިބެގެން ޓެކްސް އިން ބަރީއަ ވުމަށް ހިންގާފައިވާ ޖަރީމާއެއް ކަމަށް ބެލެވެއެވެ.

ހޮންގކޮންގ އަކީ ރަނުގެ ވިޔަފާރި އެންމެ ފުޅާ ދާއިރާއެއްގައި ކުރާ އެއްގައުމެވެ. ނަމަވެސް ޖިއޯ ޕޮލިޓިކަލް މައްސަލަތަކާހެދި އެގައުމުގައިވެސް ރަނުގެ އަގު އަންނަނީ އުފުލެމުންނެވެ.